泰國遊記～泰好食篇～

Mar 28 2015

上星期workshop休息4天，
其實今次係同所有公司同事一齊去左泰國吃喝玩樂！
因為今次航班班次唔係太好，唔係好夠時間，
所以4日遊行程非常緊密。
大家都知道我本身都認自己係買野精，
點知今次都輸晒比其他同事，因為佢地買野既程度係瘋癲過我好多，
我1/4篋去都係半篋返，佢地就喪買到塞滿篋。
不過今次買野就唔講住，講左野食先，
我地都好鍾意食酸酸辣辣既野，泰國真係岩晒，
今次就同大家分享左泰好食先啦～

去到泰國既第一日，落左機已經4點幾喇，
所以我地到埗後去左酒店附近既Terminal 21醫肚先！

呢度頂樓有間泰式餐廳感覺都幾正宗，所以就揀左佢，
由於餐廳名係泰文，所以都搵唔返個名比大家，
上到頂樓電梯轉右就係架喇！

果然呢度大部分菜式既味道都非常好。
尤其係蘑菇salad(中上)，酸味岩岩好，辣度又非常夠，
就算有芫茜，個味道都係好好，好match，
我地都有同事唔係太鍾食芫茜，但都話好食。
冬蔭公湯(中下)既味道都好香濃，
係食左咁多間之中最好既。
而蟹餅(右下)又真係啖啖蟹肉，
入面全部都好似係鮮蟹肉扒鬆整左個餅，
唔似有混左粉，平時食呢啲都覺得炸粉多過料，呢度就好真材實料。
炸菜(左上)加上個辣辣地既sauce都好特別，
河粉(左下)同豬頸肉(右上)就麻麻，
河粉比較厚身同煙韌，唔似一般咁爽身同薄，
而豬頸肉就太少份量，味道都係一般，

不過佢個sauce就好好味，同黎沾其他野食都得！
大家都食到lam lam脷，
而且呢度既野食好平，夾埋都係食左1300bhat左右。
食完野之後就去左shopping，
shopping完又去左地庫果層食雪糕！

之前去過日韓台都會去呢間baskin robbins雪糕店食，
佢喺泰國都有好多分店，水門區、機場等等既地方都會有，
我通常見一次食一次，
佢既味道夠多，份量足，我又唔鍾意太花巧既雪糕，
而佢地真係每隻味都唔似係人工香料味，而係真係果種味道。
我試過有次去台灣叫4球，真係食唔晒，
一個人食2-3球都已經好夠

今次都唔例外，叫左3球(左上)！
士多啤梨有士多啤梨味，mint choco有mint choco味，
咖啡杏仁拖肥又極濃咖啡、杏仁同奶味！
簡直係絕配！！
今次有其他同事，揀其他味，又可以試多幾款，
同事Christy就揀左綠茶同朱古力chips，
綠茶真係好似飲緊好濃既綠茶咁，朱古力都好香，
而Yuki就揀左棉花糖味同berries味，
估唔到棉花糖味都同食緊棉花糖既味係一樣！
不過個紫紫粉粉個顏色真係會嚇親人

第二日我地去左Siam Central World 7樓一間泰北餐廳食lunch，
呢間KUM POON都幾出名，好多雜誌都有推介過，
而因為佢地點方便，所以就黎左食喇。
同埋我地成班上晝係咁行黎行去shopping，
個個都勁肚餓，一入座就叫左非常多野食。

我地叫左芒果糯米飯、烤牛肉、烤豬頸肉、
炸雞翼、春卷、木瓜沙律、蘑菇沙律、肉碎，
呢度既泰式食物不過不失啦，但就無前一日果間咁惹味，
估唔到最後點既芒果糯米飯先係最好食，
係大家一致認為係好食，
椰汁好香，糯米飯煙韌得黎唔痴牙，又甜甜地，
芒果好香甜，唔會係酸同爽果種，真係very good！

大家都知女仔係有兩個胃，食甜野就即刻掃晒喇～
呢餐食左1900bha左右，感覺有啲唔值，
建議大家想試正宗泰菜既話，可以去local商場入既餐廳，
通常小店既味道會更加好。
夜晚我就約左一個抽泰國model朋友食飯，
係喺下晝食果間餐廳對面，不過都係麻麻。
班同事就去左做massage，真係識嘆。

第三日我地先去批發市場，之後又喺Siam shopping同食lunch，
今次就去左Central World 3樓既一間叫laem Cha Reon-seafood-既餐廳，
呢間係專係海鮮既泰式餐廳，
無錯，黎到泰國梗係要狂食泰國野，所以我地都盡量搵返泰國野食，
同埋梗係要食下佢地既海鮮，我自己雖然唔食蝦蟹，
但同事都鍾意食同有其他野食，所以最後揀左呢間喇!

可能因為太多外國遊客黎呢度，反而比較少本地人，
所以呢度既野食都做得無咁酸同無咁辣，
我地就覺咁樣無咁地道同無咁好食，都係無第一間咁正宗，
不過我地喺第一間見到唔少外國人食唔到太辣，

所以呢度應該係為左迎合外國人而做到咁。
呢度既重點原來唔係海鮮，而係左上面果碟青色sauce！
因為真係非常夠「酸+辣」！！
我諗呢個sauce係佢地店好出名，因為入座後就會每人比一碟，
初時我地直接去沾少少黎試都覺得好辣，但又好過癮，
好新鮮青檸味道同辣椒味道，仲攪得好勻好碎好溶，
用黎點魚餅同其他野食都好正。
而今次呢個海鮮冬蔭公湯就幾好飲，
蝦又好大隻同彈牙（同事講返話好食），
大慨有半隻手掌咁大隻架。
呢餐就食左1500bhat左右，係咁多餐入面最貴既，
不過對比返香港個價，其實都係好值。
補充好體力之後又係shopping time！

去左翟道翟行market，唔知係咪焗雨既關係，
呢度真係又熱又焗，成身都流住汗，
行行下真係頂唔順，同事就去左買呢個椰子雪糕食。

未食呢個雪糕之前，店主比左一杯椰青水我地飲，
哇我地一飲第一啖，真係碌大對眼對望一齊話好正！
椰子味好清甜好濃，之後我地都有直情買個椰青飲。
講返呢個雪糕，黎到真係一定要食，
一食落去真係解晒暑～
好清甜好夠凍！加上椰青水真係一流！
只係35baht一大個，仲可以加topping，
如果大家去到翟道翟行到好攰想抖下，
呢個係一個好好既選擇。

夜晚去左碼頭市集night market asiatique，呢度好多外國既餐廳，
所以今次就揀左間日本餐廳食野，
呢間日本餐廳叫做IBUSHI-GINJIRO，一落船直行轉右就會見到。

日本野就無咩好介紹喇～
不過估唔到呢度既野飲好好飲！
呢兩杯青檸梳打冰同椰子沙冰，味道好好，
我覺得杯青檸梳打冰係咁多日飲左咁多杯之中最好飲，
唔會過酸唔會過甜，
之前果啲都好似加左糖水或者人工味道，
呢杯就真係好香青檸味，好fresh。
而同事杯椰子沙冰就好似加左10隻椰子落去咁，
日月精華都喺齊度，超級香濃！
飲到底仲有椰子肉添！真係極力推介！

其實泰國係我去咁多旅行去得最多次既地方，
因為我自己好鍾意食泰式酸辣野，
我建議大家想食正宗既泰菜，又唔怕污糟既話，
可以去街邊既小販檔度食，
而我每次去都係有泰國朋友帶路，呢啲好多menu係泰文，
如果唔識泰文，就可以去local商場入面既小店，都係比較正宗。
今次就分享到呢度，
黎緊仲會有其他同事既shopping分享、
好物雷品、skincares/makeup物品等等既分享，
記得留意住喇～