每個男人都希望實現嘅幸福畫面

當女朋友成日話：「你都冇諗過我哋嘅將來嘅⋯⋯？」

吊兒郎當嘅外表，腦入面充滿幸福嘅憧憬。

Text, Iamge: 莎比亞

「咁你要講下畀我聽，我先知㗎嘛！」女朋友就係會日日提住同我結婚後，日子會點過。

咁啱嗰日心事mode 啟動咗，我將天下間所有男人都希望實現嘅幸福畫面，一一晒講比女朋友聽⋯⋯

首先，我會有一份高不成，低不就嘅工作，每日畀上司訓話，每晚OT幾個鐘，壓力大到就嚟崩潰。

但我會仍然好努力咁做牛做馬，因為屋企有個老婆要養，幾辛苦都頂硬上。

終於捱到放工，就即刻收到妳嘅WhatsApp：「我已經煮緊飯喇，你一陣番到嚟就食得。」

一打開屋企嘅大門，妳笑臉迎人咁問：「等咗你番嚟好耐喇！」然後再幫我揼幾下個膊頭：「今日辛唔辛苦呀？」

枱上面全部都係我鍾意食嘅餸⋯⋯

「Cut！喂，你真係諗得太過份喇喎！」女朋友打斷我嘅幸福。

佢再話，等我講個現實你聽啦。

第一，我返工都會返到好辛苦，分分鐘OT得仲耐過你。

第二，我同你一樣咁攰，所以冇可能係煮好飯等你，好大機會一齊食飯盒。

第三，你之前應承過做晒所有家務，不過我唔會咁無人性嘅，星期一至六你負責⋯⋯

「星期日由妳做番！？」

「唔係，星期日唞一日，留番星期一再做，OK？」

「OK⋯⋯」我有得唔OK咩⋯⋯

然後，輪到女朋友講佢嘅憧憬。

「好簡單，同你一樣！」

我暗喜，原來佢都係希望做個賢淑嘅老婆。

「多謝妳。」我感動到握緊佢隻手。

「你仲未明⋯⋯」女朋友都緊握住我雙手：「同你一樣，由你等我放工、煮飯、揼骨、洗衫洗碗掃地倒垃圾！多謝你！」

我嘅心情即刻好似馬國明失落視帝咁沉咗一沉，因為我知道，不久嘅將來，呢啲畫面真係會實現⋯⋯唉，算喇，睇嚟都係唔好幻想太多。

————————————–

【更多文章】
FB: 莎比亞
Follow IG睇拍拖Sweet相：sapeiar