朱古力, 愈黑愈好?
今早同客傾開食朱古力， 雖然明知係高熱量， 但有時真係忍唔住想食兩粒， 惟有同自己講： 黑朱古力含有多啲可可Cocoa， 而可可有抗氧化作用， 所以照道理， 黑朱古力應該無咁肥， 健康啲。
咁係咪愈黑愈健康？
原來又未必。
黑朱古力去到最盡， 99%， 雖然糖份最低 (每安士只得少於1克糖)， 但可可本身有苦澀味， 食到咁甘， 應該已經享受唔到吃朱古力本身的樂趣， 而且 30克當中有15克是脂肪 (可可脂)， 卡路里並非特別低。
綜合不同濃度的朱古力 (同一 L字品牌)， 反而建議 85%黑朱古力 各方面的比例最好。 一方面比較低甜度 (每安士含約4克糖， 比牛奶朱古力的12.6克糖低 2/3)。
黑朱古力另外有驚喜的是， 可可含有纖維， 以 85% 黑朱古力為例， 每安士含約5克纖維， 多過一碗菜。 纖維高， 食完飲多杯水， 有飽肚感， 較易控制份量。
當然， 不同牌子的朱古力配方略有不同， 只能作個參考， 但其實， 最肥的並非純朱古力， 而是有餡的， 如酒心、焦糖、果仁， 甚至是朱古力做的各式甜點。
所以如果突然心血來潮想吃粒朱古力， 買85%黑朱古力好了。
