日本奶奶的宅配

4月消費稅由5%加到8%後買野更加要諗過度過。
平時去超市最唔想畀錢買嘅，係葱！
喺香港街市買餸明明免費夾多條䓤，
但喺呢度就要成十幾蚊一束（￥147）！
椰菜1個￥238、薯仔3個￥247、靚啲嘅番茄可以貴到 ￥437兩個！

有一日田中媽媽問我，喺東京生活最唔慣係乜﹖
「蔬菜好貴！」
之後佢就不時由鄉下宅配一大箱蔬果來
蘋果、西蘭花、薯仔、柑、芉頭……
全部蔬果都係出自田中家門前塊田、
由田中媽媽親手種植，有機蘋果零舍鮮甜！

有時佢仲會寄啲自家特製漬物來，
仲貼心送上食材同Memo教我自己整！

我最鍾意係呢道「白菜蘋果淺漬」，
將切好嘅白菜同蘋果放入袋，
倒入喺日本超市一定搵到嘅「浅漬けの素」，
（田中媽媽話如果跟包裝個指引就會太重口味，要落少啲）
大概浸到菜嘅3分1到⋯⋯
然後唧出空氣、紮好，放入雪櫃過一晚夜就食得！

白菜嘅鮮甜加上清新嘅蘋果香，
當沙律食方便又健康！

上個月田中YoYo生日，
田中媽媽寄左杏仁蛋糕同一啲小禮物來，
有園藝書、教人做體操嘅手巾同DIY花紋膠紙⋯⋯

其實全部都係畀我！哈哈！
梗係YoYo話佢知我最近學人搞Gardening！*.+ﾟ★☆感d(≧▽≦)b激☆★ﾟ+.*

禮尚往來，我由香港帶左盒老婆餅送畀佢，
仲話佢知以前畀人話「貨不對辦」時，
會反駁：「你估老婆餅入面真係有老婆咩！」

勁Old School ( W )