抑鬱不可恥

其實好多人，如我…從來不會想到情緒病會發生在自己身上。

總是覺得我意志力強呀，有咩風浪未見過，我控制到我自己。

但其實愈是外表剛強的，愈是覺得自己得嘅，其實最唔得！

就係因為自我要求高，因為唔衰得，因為覺得自己搞得掂，所以愈緊張，成日以為自己處理緊個壓力，其實係意志上扼緊自己，但個腦同身體其實已經承受唔到！

當然，後來是終於倒下了..未試過真正有情緒病嘅會唔完全明白到當中係身心多困擾，而身邊總有人同你講加油呀，唔好咁啦，點點點。

我話你知，患病嗰段日子，個腦根本function唔到，諗嘢方面好有問題。而且會覺得好累好累，係身心都好累…. 我嗰陣除咗負能量爆燈，成日覺得自己好無用好廢，甚至出現很多器官功能衰退嘅問題……. 真係屋漏兼逢連夜雨。

我知道好些人會好討厭抑鬱症(佢哋討厭因為覺得麻煩)，但我發現那是誤解。

我也遇過有些朋友其實沒有確診抑鬱，只是自己純粹脾氣唔好，於是成日話自己抑鬱，要人就。所以令有些人以為抑鬱的人好煩。(如覺得自己抑鬱，最好求診找適當的治療呢，真的，別辛苦自己呢)

真正抑鬱緊邊有力量去叫人就吖，自己都照顧唔到自己，甚至成日想收埋自己….

我發病時 我冇講到畀家人，甚至最好嘅朋友知道

佢哋都係我完全好番晒之後先知我發生過咁大件事嘅 (所以呢衰啲講真係死咗都唔知我咩事)

因為我個性格就唔鍾意將自己嘅負能量四圍散播，我覺得每個人，每個家庭本身都已經有好多煩惱…..

我唔想將自己嘅問題加喺人哋上面，而且就算家人或者朋友知道，其實都幫唔到你，反而佢哋嘅關心同埋擔心可能會令到我更加大壓力，所以我成件事都係收收埋埋，淨係得我嘅另一半知道…..

我感恩嗰陣有能力睇私家醫生（私家醫生，仲要係精神科專科係好貴嘅，一個星期藥閒閒地都千七至二千尾！）但因為睇私家，所以藥嘅副作用比較細，同埋快好好多，即使減藥時，都舒服好多。

相比起睇政府嘅朋友，我知道我好幸福了。

嗰陣我算是很快痊癒，因為全因心理醫生同我講咗個好恐怖嘅事實。

醫生話：人就係因為成日太緊張太繃緊，所以腦神經線先會長期扯住，然後因為長期我哋唔畀佢放鬆，於是神經線出現萎縮，於是個腦開始disorder！因為個腦function唔到，於是出現焦慮同抑鬱等問題。

藥物可以令佢放鬆番，但係如果一個人諗嘢嘅方法唔改變，神經線依然都會繼續萎縮。而長期萎縮咗嘅神經線係會壞死嘅，唔會再生長番。所以有些病人要食一世藥就係咁解。

醫生問我：你想唔想你食一世藥？你想唔想你個腦function唔到？藥只係輔助，最重要係你自己！你唔改變你睇嘢嘅角度同諗嘢嘅方法，你唔會好的！

所以佢教我諗嘢，凡事都不要worry about worry，即係未發生嘅唔好諗唔好估，即使發生唔好嘅嘢咪下次做好佢囉！

其實我哋亦控制唔到所有嘢，但可以控制自己嘅心態！！

醫生呢番說話對我來講係當頭棒喝，

因為個腦對我來說好重要！我唔想以後壞腦呀！你知我做創作架，所以我要自己好就要自己識諗！

要自己識諗就係咩都唔應該再諗！！！！！

因為我就係諗太多，擔心太多根本未發生的事，因為我想控制嘅嘢太多，最後先令我抑鬱同焦慮。

如果你問我當時焦慮症，除咗自己之外其實仲有乜嘢，作為身邊的人可以幫到手呢？

其實對我嚟講，我覺得靜靜地聆聽就已經好夠。

焦慮症嚴重病發嘅時候最好其實呢靜靜地，畀當事人好好休息，但又最好表示下關心啦。如果佢唔想出來唔想講就唔好迫佢。

其實意見係可以講的，重點係態度，事關本身已經自我形象好低，你仲好高姿態用第三者角度去教化(尤其係長輩呀，另一半呀都要小心因為你嘅心急同著緊，令人很受壓)，若果又不是過來人的話，更是會令人很躁底的!!!如果唔知唔識去安慰或畀意見，選擇寧靜地在身邊陪伴就夠了!!

情緒病者，都要明白情緒要有缺口宣洩，每個人都需要有唔同嘅朋友。

我自己有啲朋友係好鍾意鬧我嘅，好鬼鍾意鬧醒我！有啲朋友就係好溫柔咁你聽嘢嘅….

我情緒病嘅時候，情緒好反覆。有時想人哋鬧我就會打畀嗰d 惡人，要佢哋鬧到我爽。有時又想純粹有個人去聆聽，嗰陣就搵啲溫柔嘅朋友聽。

千祈唔好怕將自己嘅問題講出嚟，唔好覺得情緒病就等於神經病！！

就如醫生都講其實香港大部分嘅人好多都有情緒病，只不過係有冇病發咁解嘅啫。

要知道負面情緒，抑鬱，焦慮，或者係唔開心，都係好正常。成日要畀人睇自己好開心，成日做到最強先唔正常，哈哈！

人呢始終都係人，真係會有搞唔掂嘅時候，搞唔掂嘅時候要搵人幫，或者搵醫生，或者搵專家幫手係無問題架!!!搵幫手唔等於懦弱的!!

有時諗番轉頭情緒病嘅嗰段時間我都幾感恩。雖然嗰段時間係完全無咩自理能力，而且做唔到嘢。但係呢就好似畀自己放咗一個精神健康嘅假期一樣。

因為曾經抑鬱症，焦慮症過，先至會明白咩叫識諗嘢，咩叫做唔畀壓力自己。如果冇發生呢件事，我仍然會每日營營役役的迫自己，同武裝自己。

休息是為了走更遠嘅路…… 累了就躺下來吧，不用怪責自己。

人生係有好長嘅時間，只要仲有健康，你仲會有好多嘅時間 去忙碌，有多嘅時間去實現夢想，有好多嘅時間去生活，只要你個腦仲function到，只要你仲健康……

祝福每一位精神情緒都健康!!!

又是最老土的一句，共勉之。

By maysum

Fb: maysumofficial

Website:wahahafactory.com