我所愛的大帽山 – 單車遊

大帽山，雖然是香港最高峰，但一直都不是我最愛的香港山峰，只記得小時侯舅父家住美孚，反天一到零度，舅父便開車帶我們上大帽山山頂睇結霜 (是的，上大帽山睇霜這無聊活動由幾十年前已開始) ，以前一直以為山腰停車場就是山頂，原來只是山腰。之後行山多次經過大帽山，但大多是行馬路，行到無咩感覺。

最近因為腳踭痛，一個多星期無跑步，唯有踩吓單車，可惜踩單車的運動量遠不及跑步，便由錦田屋企出發踩上大帽山，希望可以燃燒吓脂肪，首次取道大棠郊野公園出發，逆走麥徑，沿途上上落落，去到大帽山茶水亭已無力再上山頂。

隔了一天，已決心上波波頂，取道較短的荃錦公路，諗住平時揸車由山腳至大帽山郊野公園入口好似最多都係十多分鐘，還以為最多三十幾分鐘應該搞得掂，怎料，條車路又多彎啲斜路又好斜，坐到個pat真係好痛，中途又好肚餓，但卻不能停下來，條路咁斜停下來一定起唔番步，結果死捱之下，要一小時才能上到大帽山茶水亭，即隊一麥精再加燒賣補充體力，再死頂一小時上波波頂。

平時在大帽山頂，都係來去匆匆咁上山落山，但因為當日好攰，要停低一下舒緩吓，發現原來在這裡，由元朗、錦田、青馬橋、青沙橋至維港都可以見到，如果有遊客到香港，除了山頂，好應該介紹他們上大帽山呢!

唔係做生意的大帽山茶水亭「蓮姐」

平時行山經過獅子亭，老實說如果唔係太肚餓， 我都唔停低幫襯，皆因我覺得服務態度好緊要，最怕幫襯人家仲要被「西面」對待。
大帽山茶水亭的蓮姐卻剛相反，就算唔肚餓唔口渴，都值得幫襯，因她跟本不是做生意，對所有的行山友都無微不致。上星期首次踩單車到茶水亭，我們點了一份燒賣，唔知我個樣係咪餓都係人都睇得出，我們食哂這份燒賣後，蓮姐突然夾多兩粒燒賣給我們；隔了一天再幫襯，我們又點了一份燒賣，也許我個樣又太餓，食完後她又夾了兩隻糖心蛋給我們，她說這兩隻蛋爆開咗唔靚，著我們捱義氣食埋佢，請我們食嘢仲要我們唔好介意隻蛋個樣唔夠靚。

之後跟她傾了一會，她竟然記得幾個月前我們在附近跑步時在路上跌了車匙，問我們搵唔搵到 (點解可以咁好記性!)。還記得，好耐之前我們付錢離開後才發現她計少了錢，之後再到訪時叫她收番上次未找的數，但她卻唔肯收……….難怪她是被受所有行山友的愛戴，下次除了吃燒賣，一定要吃她整的、連發哥都推介的糖心蛋呢!