慳，網購家電

以前要返工，基本上只有周末才會在家下厨，家裏最近剛完成了裝修厨房的工程，現在不用上班，厨房當然是每天逗留最久的地方。除了保留蒸爐，其餘厨房裏的家電，我恨恨地一次過換，因為忍夠了發展商預設的產品，想像到好用極有限。

對於厨房裏的家電，我有少少要求，要內外在美兼備，雖然未去到要頂級專業名牌這麼誇張，但買買下，花上兩三萬元都冇走雞，要慳真係要做師奶的強項──四圍格價。

今次我想同大家分享一個網上的格價購物網站，雖然除了家電之外，還有很多其他東西售賣，但我今次主攻家電部份，其他的有待各位自己發掘喇。

早在幾年前我已幫襯www.price.com.hk (香港格價網)，近日還推岀了apps，更加方便。我以前買過空氣清新機及抽濕機，都真係慳咗唔少，後來都有推介俾身邊朋友，但十個有九個朋友第一個反應都係──「信唔信得過㗎？」、「平咁多？會唔會騙人的？」、「水貨嚟㗎？」……，總之一句講晒就係傳統的一群怕中招，即使俾貴幾百甚至幾千蚊，都係要去幾間壟斷香港的電器店購買實物貨品。

講真，我初時都有懷疑過，所以一開始試買部平平哋的空氣清新機，試試運氣，整個過程順利、快捷、方便，足不岀戶，所需產品送到府上。其實他們平宜的原因是省卻鋪租、燈油火爉、員工及電視廣告等費用，開支少了，自然可以在產品上提供更優惠的價錢。

以下就分享怎樣網購平靚正產品啦。

小貼士：

• 家電價格如海鮮價，天天不同，選中商戶後，直接打電話去問有冇貨，及確定最新的價錢為準。
• 留意幾乎全部送貨都要另加費用，一般非離島及有電梯的，送貨由＄100－＄150。
• 記住問付款方式，有送貨時現金付款、收貨後過數入銀行戶口，亦有口頭訂貨後要全數過戶，才安排送貨，這個當然最令人不放心，而我今次買這個焗爐幫襯那間就係要先入晒全數先送貨。他們解釋沒有存貨的貨品，要直接跟代理訂購後，由代理商直接送貨到府上。
• 收貨後，有些商戶未必會即時俾返收據你，記住打去叫他們寄回正式收據呀，保養要用。
• 購買前，建議先到showroom或電器店運吓吉，了解實物的呎寸、功能等後，看看是否真係啱自己用。

缺點：

• 冇實物睇，冇現場人員服務，講解產品資料。
• 要一次付全數，不設分期付款，亦不可簽咭。變相冇得儲任何積分或使用任何優惠積分。
• 沒有任何贈品。
• 不是所有品牌及型號都齊全。多提供熱門品牌產品。

查詢：

香港價格網 www.price.com.hk

Electrolux http://www.electrolux.com.hk

Siemens http://www.siemens-home.com.hk