慳妹必選之－好用小物推介

Dec 14 2015

我地公司真係位位同事都係購物控，
一班女仔圍埋一齊實係講緊近期買左啲咩好野，
我地梗係唔會咁自私得自己知，
當然會分享埋比我地忠實既讀者知道啦！
同樣對扮靚有興趣既朋友，
就唔可以錯過今篇既分享啦！

Joan:

Precious Garden Hand cream (约20hkd 購自日本京都)
呢隻牌子hand cream其實量係上年無意中係日本旅行買,
第一眼見到都係覺得個樣好靚,
去日本旅行又想買返made in japan嘅野做手信,
最重要佢價錢一d都唔貴,
我就買左三款最鐘意嘅味道返黎啦!
唔係睇番包裝都唔知係kose出品!
而加暫時都未見過香港有得買~
一開黎試我就已經好後悔點解唔買多幾支,
真係連送都唔想送比人啊!

點解?
有睇開我地試用都應該知我真係dry爆,
就算同事們試完會好潤唔乾我都即刻吸收哂,
勁誇張!!!
呢支cream？對我呢d dry爆嘅人黎講都夠潤,
而且仲有光澤感,最重要唔笠,
味道方面雖然唔係天然嘅果香花香,
不過淡淡地又甜甜地,個人就幾like啦!
今個冬天會去日本嘅朋友仔可以買黎試下啦!

香水仔 (購自15蚊店)
除左我地老板係香水控外,
其實我地幾個同事都好迷香水~
咁岩有一次出街太趕急香水都唔記得搽,
搽慣香水嘅你都知一日無用都會周身唔舒服,
無意中入左一間賣家品嘅鋪頭,點知有香水賣,

我更係即試啦,
咁就發現左佢,
佢嘅味道好似我用外嘅其中一支香水(Balmain EAU D’lvoire)
而且只係15hkd,我真係二話不說即刻買,
仲買埋其他味道,不過都係最鐘意粉紅色果隻,
細細支勁方便,仲送左比我班香水控同事~
不過而家真係唔知邊度有得買啦!

Christy:

K-Palette持久防水立體雙頭1 Day Tattoo眉筆約＄100多
話說Janice早前去日本出trip,
我梗係去八下佢買左咩正野番黎啦！
見到佢買左支新眉筆，
我都偷左黎試用下（haha…..)
點知試完覺得好正自己即刻去買番支,
佢係日本買大約＄80幾蚊，
抵過係香港買，
去開日本旅行既朋友就可以留意下～

呢款眉筆有兩邊頭，
一邊係液體狀，一邊係眉粉，
佢都有幾色揀，我就揀左深啡色。

我鐘意佢顏色夠自然，唔會太深色or太淺色，
畫上去好易handle, 好易就畫到條好sharp既眉，
另一邊既眉粉就可以畫埋眉頭，
畫得好soft,好靚架～仲好持久添。

Before & After

SHISEIDO嘉美艷容露約$30
早兩個月去左台灣旅行，
我同班朋友當然即刻search下有咩係必買啦！
見好多台灣朋友都會推介買呢支SHISEIDO艷容露，
所謂艷容露，其實佢係支有調理作用既化妝水，
咁岩係屈臣氏見到時，都好猶豫買唔買……
原因係因為實在太平啦！！！！！
咁鬼大支賣港幣＄30蚊唔洗，真係好驚lor~
不過因為網上太多好評，而且見係SHISEIDO出品，
所以都即管買黎試試～

原本買完都唔記得左佢，
不過早排因為太夜訓又食得太多煎炸野，
所以塊面生左好多黑頭粉刺不特止，

仲出左好多有濃頭既酒米……
醒起買左呢支野就即刻開黎試下用，
佢支野分上層係水狀，下層係粉狀，
需要搖勻使用。

（搖勻後。。）
聞落有少少酒精味，
不過通常調理油脂去黑頭粉刺既護膚品都有酒精成份，
因為可以幫助殺菌，

我會先全面抹，再係有需要既位置敷多陣，
敷上去會涼涼地但都無「拿」既感覺，
第二日有濃頭既酒米竟然謝左好多，
之後都無再出咁多酒米暗瘡啦！
雖然佢咁work,
不過我唔建議乾皮膚日日用，
因為有酒精成份既野都會幾乾，
我都係有需要先會拎黎用,
或者剩係敷係有問題位置。
可以話係油皮膚同痘痘肌朋友既平價恩物。

Yuki:

LB gel liner pencil 約$50
LB呢個品牌可能對大家黎算陌生，
其實佢係2013年於日本成立，
以開架彩妝產品為主。
由人氣女模LENA FUJII代言，
價錢大眾化所以受好多少女歡迎架！
我自己本身對眼都幾油，
用眼線筆成日都甩，
早前去日本行街時見到呢個LB眼線筆，
我覺得佢包裝幾型仔就買左。

旋轉式筆芯，唔洗刨好方便，
帶出街用就最正！

筆既尾部有個小型筆刨可以將筆頭刨尖啲，
畫出黎既線條就更幼細，
設計好貼心呀！

我揀左黑色，畫出黎好實色，
顏色好飽和～
今次出門我都唔記得帶眼線筆，
所以就即刻開左黎用，
點知效果都幾驚喜，
行全日街對眼都無化過，
只係甩左極極極極小。。。。
好good!
雖然無影對眼比大家睇，
不過都做左個小測試！
畫係手背濕水再抹都唔甩，
用油抹一下都唔算甩太多～
防溶效果真係唔錯！

後來我先知LB已經進駐左莎莎，
不過係日本買就會抵啲又可以退稅。

LB Lip stick 約＄50多
第二樣被我入選既佳作一樣係來自LB～
試完眼線筆又順便試埋佢其他產品，
臨近秋冬，最近都好想買番支nude色唇膏～

我自己個嘴係極乾，超易甩皮，
呢支唇膏一試上手就覺得好滋潤好creamy,
不過佢顏色選擇唔多，得4色揀，
分別有紅色、粉紅色、nude色同玫紅色，
我就當然買左今季最like既nude色啦！
呢隻色nude得黎唔會太病，
搽上去低調得黎又好有氣息～

我個嘴除左極乾，嘴色都偏深，
不過呢支唇膏一搽就已經遮到唇色，
唔洗用concealer都做到nude lip效果，
雖然都有少少唇紋（其實係我個嘴真係太乾），
不過都keep到全日唔甩皮，真係幾唔錯！
幾十蚊既價錢好抵玩，
睇黎我都會去買埋其餘幾隻色啦。。。