慢活，遊花墟 （下）

行完華泰聯，一路往前走，途經必聞到陣陣蛋糕香味，呢個時候，口痕痕又想繼續行，我就會在Uncle Fong超羣麵包西餅，買底雞蛋仔（＄15），跟住仲要打包一至兩個日式芝士蛋糕（＠＄21）返屋企同家人分享。推介必食的雞蛋仔外脆內軟，周末時必大排長龍，注意雞蛋仔要下午三點後先開賣，我影相當日未夠鐘，緣慳一面。

Uncle Fong超羣麵包西餅

查詢：九龍太子道西182號金寶樓地下A鋪 2309 2608

另一邊內街，花墟道，新裝修的繽紛鮮花，我巡例都會入去逛逛，以前嘅繽紛感覺較娘，入的花都較大路及本地化，最多嘅就係玫瑰、百合及桔梗等，冇乜驚喜可言，花當然新鮮，索價亦合理，仲有積分咭，消費＄1就1分，滿1000分就可換＄100現金券，變相大約九折。同時可用於繽紛其他店，不只限買鮮花。近年，可能競爭大，終於見佢入返多啲進口花材， 如豌豆花及鬱金香，後者仲多咗好多顏色及不同品種揀。

繽紛鮮花

查詢：九龍太子花墟道16號鋪 2380 7876

最後要介紹的一間鮮花店，就是差不多行到街尾的興發鮮花，佢其實做批發多於零售，所以全部花材都係一筒筒放，包到實，雖然都歡迎散買，但就要逐一問價錢，因冇標明實價，推介原因係佢基本上你想要的花材都可以買到，不過就需預先訂購，鋪面不會放置所有花材。你可以預早上網訂購，或親自去查詢，睇下你想要的花材有冇得訂。幾年前，我幫好友束一個結婚花球，她很喜歡淡蜜桃色的庭園玫瑰，但當時，我到花墟逛了好幾遍都找不到，最終我就拿著雜誌的圖片去問，點知真可以幫我們從外地訂到，我和朋友開心了大半天！

興發鮮花

查詢：九龍太子花墟道56－58號鋪 2397 3218

www.hingfatflower.com

講咗咁耐，睇完花，行到攰，最好就係坐低歎杯咖啡。喺興發行前多幾步，就會見到一間好似外地先會岀現的花店，門口排滿木箱及日本進口盆栽植物，甫進去左邊是鮮花櫃位，不論質素及價錢都是非一般級數（即係貴嘢！）講真我冇幫襯過佢，但係入嚟感受下氣氛，齋睇都能令我心花怒放。再鑽進去，就是我提過的隱世咖啡小店，全木配上綠色植物的裝潢，好樸實舒服，帶本書去看，呷口咖啡或花茶，真係可以hea足半天。

查詢：Hay Fever Floral & Gifts

九龍太子花墟道62－64號鋪 2397 0668