情侶間最正確嘅 WhatsApp溝通方法
WhatsApp有時真係好累事，成日都因為同女朋友溝通不良而誤會對方。
例如有時佢Send張自拍嚟，我又影番張自拍畀佢，點知佢話：「我唔係要你影番畀我呀，我係要你讚我靚呀！」我當堂黑人問號⋯⋯
Text, Image: 莎比亞
又有時佢同我講：「落緊雨呀，冇帶遮，成頭濕晒。」但佢之後再講咗第二樣嘢，佢就會Quote番轉頭話：「頭先做咩冇關心我？」我又中伏咁答：「你講咗其他嘢⋯⋯我以為話題已過⋯⋯」
再咁落去唔係辦法，於是我同女朋友提議一個「正確嘅 WhatsApp溝通方法」。
首先，我同女朋友解釋：「其實我覺得呢，有時鬧交係唔關我哋事，係WhatsApp嘅錯！因為睇唔到語氣，所以一件大事會變小事，或者有時Skip埋睇唔到⋯⋯」
女朋友都有啲明白，不過都話：「有啲位好明顯㗎⋯⋯係你蠢先Sense唔到啫！」
我知道我冇反駁嘅空間，所以和議：「係，我知我唔太適應妳，但妳講下畀我聽點做啦，我下次會做好！」
然後，佢慢慢咁逐個Message解釋番畀我聽，完美嘅回覆應該係點。
簡單得出一個結論，重要嘢唔用啲唔啱Grammar嘅英文講，都係打番中文，而大家都當WhatsApp只係一個閒聊嘅溝通工具，冇咩大件事，唔開心嘢都係電話或者真人見住面講，尤其鬧交，千祈唔可以WhatsApp解決！
女朋友都同意唔太睇重WhatsApp嘅對應，不過至少唔好已讀不回。
咁WhatsApp有咩用？
平時我好少開口氹女朋友，因為太難為情，不過女朋友就好鍾意我讚佢，就連WhatsApp同佢講：「我愛妳」、「妳好靚」、「好想攬住妳」都會好開心。
所以，稱讚女朋友成為WhatsApp最新嘅使用方法，平時講唔出口嘅肉麻嘢，盡情喺WhatsApp大講特講，或者多一句就多一句。
女朋友都會成日喺WhatsApp唔該我，多謝我，做一個有禮貌嘅女朋友（當然真人都係）。
識得用，其實WhatsApp都係一個充滿樂趣、充滿甜蜜嘅溝通地方。
拎起電話，睇一睇，窩心笑一笑。
————————————–
