平嘢都有好嘢 護膚品推介
雖然不時都收到唔少專櫃品牌送來產品試用，但我總係有鋪行藥房或睇上架平產品的癮，唔係淨係外遊先行藥房，支持本地消費，我都會成日光顧如龍城藥房、莎莎、卓悅，甚至萬寧及屈臣氏等，時不時都有驚喜發現，他們都經常引入唔少日、韓細牌產品，又平又好用，唔駛飛都可以買到好嘢用。啱啱就敗咗啲質素唔錯的平價產品，大家行過都可以買嚟粗用吓。
推介1. 白滑豆腐面膜
日本豆腐盛田屋豆腐面膜 $198 （指定萬寧有售）
之前喺日本雜誌見過佢踪影，已經心思思好想買嚟用，因為個人對含豆腐成份的護膚品有好感，用過幾款日本不知名的豆腐紙面膜都覺得用完皮膚又白又滑，今次見到是搽的豆腐面膜，要即刻買嚟試呀！選用日本非基因改造的大豆製成，當中仲含乳酪、蜂王漿及紫蘇葉精華，全部都是食得落肚的食材成分，仲話明溫和到連孕婦都用得，啱晒我這個孕媽媽啦。
一打開，見到面膜質地真係好似Greek Yogurt咁，軟滑厚乳霜狀。
建議最佳效果是浸住浴敷，記住要厚敷，盡量搽到遮到膚色為止。不過我家沒有浴缸，沖完涼敷一樣得。
試後感：潔面後，我厚敷5分鐘，之後以濕的潔面海棉抹乾淨，皮膚好明顯白滑咗，仲感覺又軟又彈，日日用都得，唔駛二百蚊就有交易，真係日日厚敷都唔肉痛呀！
推介2. 速遮毛孔 透薄CC cream
Sugao Air-Fit CC cream SPF23 PA+++ 各$132 （指定萬寧有售）
韓牌嘅CC creamy就試得多，其實都有唔少日牌出品，最近就留意到萬寧新引入咗呢隻日本藥房細牌，據說經常成為日本藥房3甲的熱賣產品，見到忍唔住買嚟玩吓。
一唧出嚟，質地似梳夫厘，好易推得好薄，不似其他CC cream咁會令立立，佢反而十分啞緻，感覺好滑。
試後感：我屬乾性皮膚，我揀咗#Moist嚟試，今次試半邊臉俾大家睇，效果一目了然，我用手指往外推開搽勻我的右邊臉（即圖左邊），明顯見到皮膚白滑咗，效果都幾自然唔覺太厚妝，估佢唔到遮瑕效果都唔錯，（我搽埋眼周，對比我的黑眼圈就知，都遮得唔錯，又不現乾紋）。驚喜位還有佢遮毛孔效果出奇理想，搽完，鼻翼及鼻頭較粗大的毛孔都遮到。惟一缺點係，持久度始終不如粉底，走落街幾小時，感覺甩咗唔少。想扮素顏效果持久啲，就要補得密啲喇。
推介3. 十蚊雞的可愛手霜
Herbacin Glycerine Handcream $10 (龍城大藥房)
今時今日，$10真係幾乎連一串魚蛋都就嚟買唔到，但竟然仲俾我買到好用又可愛的潤手霜！來自德國出品，以洋甘菊及甘油等為主要成分，細細盒放喺化妝袋超方便，送禮自用都好啱呵！
試後感：質地比一般handcream 厚身，但又好易推開，好少份量已足夠搽晒雙手，搽完感覺好潤好滑，似帶咗對隱形手套咁，滋潤效果出奇地持久， 又唔會覺得油立立，夏天用都絕對冇問題。大愛呀！
推介3. 立即變黑 即遮白髮Mascara
黑彩Kokusai Hair Mascara #栗黑 $58 (龍城大藥房)
我天生勁多白髮，以前幾乎每隔一個月至個半月就一定要染髮。但自從陀住BB，為咗BB健康，惟有忍～忍～忍！搞到成頭白髮，唔駛出街見人就無問題啫，但有時都會去吓event，約吓朋友去街。我就會用呢支黑彩即染白髮Mascara作掩眼法。我上一胎，懷孕期用咗兩支，今次我又去咗龍城補貨喇。
設計如睫毛液一樣，佢仲有黑色及栗啡色選擇。
試後感：用法十分簡單，只需於白髮表面上來回輕掃，直至將白髮遮到變咗黑色為止，啲質地一啲都唔立，又易上色，每次洗完頭就甩。完全唔會掂到頭皮，非常方便。我試過諗住慳錢，用睫毛液來掃，點知睫毛液又快乾，又易結粒粒，掃時不夠順暢，整到一撻撻仲衰。
左：Before 、右：After
有甚麼好用面膜推介？
在琳瑯滿目的面膜中，選擇成分安全的面膜非常重要，即睇：8大保濕面膜推薦／消委會19款安全面膜清單。除了紙面膜，深層清潔泥膜推薦有效幫面部皮膚深層清潔，可去除肌底的污垢、黑頭、粉刺等。如果想用成份天然的面膜，不妨跟女星們學習自製天然面膜教學！
正確的敷面膜方法是？
保濕面膜愈敷愈乾？可以試試懶人「三日濕敷法」。另外不少女生都抱著不想浪費保濕面膜中的精華液的心態，以為敷得愈久肌膚就能吸收愈多水份，這樣就正中保濕陷阱，想確保面膜用到盡就要學10大敷面膜步驟回本攻略！
