帶多兩個胃喪食夏日甜品
人人都話女人食甜品用第二個胃，幾飽都食得落。啱嘅，不過當你遇到好食夾大件嘅dessert時，2nd胃都未必夠用，再貪靚再堅持keep fit都抵受唔住誘惑，隨時要帶多個胃喪食。而家日日3、40度，刨冰、雪糕走唔甩㗎啦，仲有一類係幾時都想食嘅，例如窩夫同班戟，都係本人至愛。
如果要你推薦幾間有得食呢類甜品嘅舖，真係未必講得出，因為好多地方都有，質素可以差得好遠添。而我介紹得嘅，當然有D保證，先講一款輕盈少少嘅。銅鑼灣希慎大家都唔會陌生，入面除咗必須朝聖一兩次嘅誠品，間唔中會搵到D驚喜，例如WIRED CAFÉ近排出嘅刨冰。
WIRED CAFÉ
無記錯佢係喺14樓，唔止賣甜品嘅，有意粉、沙律等等西菜，水準過得去啦，不過環境唔錯，而且坐幾耐都得，呢樣好好。近排見佢出咗款宇治金時鮮果刨冰，都係D期間限定嘢，價錢唔貴，味道有驚喜。基本上佢底層係士多啤梨醬，加咗刨冰再加雜莓，仲有芒果。再上應該係雲呢拿雪糕，topping有抹茶醬同紅豆蓉。睇落似普通宇治金時，食落撈埋生果又出奇地夾，有新鮮感又無咁膩，貪靚OL食晒成杯都無咁guilty。
銅鑼灣希慎廣場14樓1403-04號舖（顯示地圖）
電話：2331 8315
ROSIE’S CAFÉ
講到班戟，我就喺沙田試過呢間。佢主打日式pancake，口感比較特別，外面焦脆，入面軟滑，雙重享受幾過癮。早排推出過期間限定嘅紫薯口味，我miss咗，唯有介紹番至愛嘅香蕉朱古力味啦。呢個組合係永遠唔會輸㗎，而且呢度嘅朱古力醬味道啱啱好，唔會過甜，再落埋跟pancake上嘅雪糕同cream，啖啖都係滿足。什麼on diet啊、要low fat啊？食咗先講啦。
沙田新城市廣場3期3樓A305號舖（顯示地圖）
電話：2598 1233
