巴黎遊記～Apartment Visit～
今次黎到Paris好開心，有個地方係好值得去，
就係可以參觀到Coco Chanel apartment。
今次參觀既地方唔會對外開放，
所以今個機會對我黎講好珍貴，
可能一生人得一次機會參觀呢個地方。
其實Coco Chanel既apartment就喺總店隔離，
大門側邊有條長樓梯，上到去就係apartment，
不過平時去到會見到有staff看守住唔比人入去。
今次佢地安排左一位負責導賞既CHANEL staff
一邊帶我地參觀共四層既總壇一邊講解，
第一層係CHANEL店面，之後就係Coco Chanel apartment既地方。
初時行上去已經覺得好得意，因為好多面鏡，
倒影出黎又斜斜歪歪咁，大家會唔會覺得好熟面？
如果大家有印象既話，
之前既一個fashion show就係以呢條長樓梯作靈感，
而好多時CHANEL既創作都同apartment有好多巧合之處。
當我行呢條樓梯既時候都覺得斜斜地，
所以我就問一問導覽員，
原來係因為呢度既地板都係木製，
同埋好多年前既樓，以前既手工可能無咁平滑，
不過佢地想保留呢度所有物品，
所以大部分都原封不動，就算樓梯斜斜地都無更新同更換過。
而呢度咁多鏡既原因，原來係Coco Chanel會坐喺上面，
從鏡既倒影即時睇到客人既反應。
上到第三層，就係Coco Chanel既apartment，
呢度有好靚既水晶燈同鏡，
因為我自己都好喜歡家品既野，
所以我都好開心睇到法國人既裝修同擺設，
但原來呢度係好中西合壁既感覺！
導賞員解釋因為Coco Chanel對中國既神秘面紗一直存有憧憬，
佢仲喺屋既周圍怖置左好多中國古董屏風。
大家可以睇睇呢段片先，一齊欣賞下Coco Chanel apartment。
呢度牆身係用木製屏風砌成，我自己都好想摸下，
但由於係歷史建築，所以唔可以直接觸碰，
大家都睇到好多屏風都有濃厚既中國特色，
其實呢啲真係直接喺中國運返法國，
仲係好出名既杭州木匠去tailor made整完送黎既。
呢張白色既凳睇落平平無奇，但導賞員就話呢張凳好有歷史價值，
因為當年Coco Chanel就係坐住呢張凳l喺影樓影左一幅相，
如果有睇過佢既生平照，應該都會見過呢幅相。
宜家張凳就放左喺休息室度，作為一個紀念。
同埋呢張好舊好舊既凳，係Coco Chanel工作時會坐既凳，
上面既紋理就好似見證住CHANEL既成功一樣。
參觀完小客廳，黎到下一個門就係進入主客廳。
我行到去每個唔同既地方，就更加好奇同覺得好有趣，
感覺可以更加了解CHANEL既創作歷程同獨特個性。
呢個客廳既樓底好高，盡入眼簾都係特色既擺設。
我發覺茶几底、附近都放左好多唔同既小物，
導賞員解釋原來好多都係Coco Chanel既賓客、朋友送比佢，
而茶几上散置住既幾個大紅色盒，
係Coco Chanel同西敏公爵
（曾經係大英帝國最有權勢既男人）熱戀時既回憶。
另外，放喺牆角既麥穗象徵富足同豐饒，
舊時既法國人覺得呢啲小物係有招財意思，
Coco Chanel年幼時家境都唔係太富裕，
所以佢都會有迷信既一面，
屋入面仲有其他地方放疊住好多麥穗既擺設。
之後我就見到呢個青蛙，咦？
明明中國人係放銅錢落青蛙口，但呢個係一粒水晶。
導賞員就話青蛙同風水無關係，但就有個小故事。
Coco Chanel平時好喜歡宴客，
有次Mr.Givenchy黎到既時候唔小心整跌左水晶燈既水晶，
然後就順手放左落身旁青蛙擺設既口中，
後來Coco Chanel見到，就覺得放喺呢度都幾好睇幾得意，
所以就呢粒水晶就一直放左呢個位置。
呢個佛像手上拎住既係山茶花，
大家都好好奇點解會咁？
佛像既手本應係放於胸前，手掌向外，手指伸直，
但由於運送途中有幾隻手指斷左，
所以Coco Chanel靈機一觸，放左呢個小擺設落去，
出到黎效果又出奇地match。
大家見到我坐喺梳化呢張相，其實當時我真係好開心，
因為一直行我都好小心，唔想整到呢度既野，
但係當行到呢度，導賞員邀請我坐低，仲幫我影左呢張相。
最後去到小偏廳同飯廳，
呢度都係貫徹左Coco Chanel喜歡既style－中西合壁，
值得留意既係屏風上唔同既pattern，有漢字、亭台樓閣等。
呢個pattern長方形、正方形，我一見到就影低左，
因為呢個pattern巧合地同CHANEL既香水樽身好相似。
成個飯廳有一樣最吸引我既地方就係鏡，
因為我自己都好鍾意啲特色既鏡既裝飾，
呢塊鏡除左有pattern，仲有邊框位置加左水晶，
成個好立體，望落去好宏偉，
而且手工好好，每樣都做得好仔細，
其實一塊好靚既鏡真係好難搵，
呢塊真係岩晒我心水，可惜宜家既鏡未必做到，
唯有影低等自己有時間再欣賞下。
之後再上就係第四層，不過我就無參觀到，
果度係Coco Chanel既工作坊，裁縫做野既地方。
雖然只係行左短短一個鐘，呢度地方唔係好似宮廷式咁大，
但就好有特色好有個人風格，
遺留左好多Coco Chanel既歷史印記。
我好欣賞Coco Chanel對fashion充滿熱忱之外，
對家居藝術怖置同樣都一絲不苟，
而呢個地方到宜家都仍然對CHANEL有著重要既影響。
Coco Chanel apartment係今次我去Paris既最後一站，
亦係呢個行程我最期待既地方，
今次去Paris有好多得著，尤其係更加了解CHANEL既誕生同發展，
好開心成個行程以此作結，完滿結束，
希望之後會再有機會黎到呢個地方啦。
如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
