對付躁底女朋友嘅最佳方法
女朋友，係地獄黑仔王，每一日都會遇到連環不幸事件：出門口搵唔到嘢、轉頭又漏嘢，仲要咁啱目送架車走⋯⋯心情極差，萬分躁底。
而身邊嘅你，當然好容易一個唔小心，火上加油，燒埋你嗰啖。
而幾乎日日都觸焦嘅我，面對女朋友嘅情緒，開始知道要點做⋯⋯
Text, Image: 莎比亞
最初級嘅，成日都會犯嘅，就係自己都躁埋，一句轟埋去，「你唔好咁啦！好小事啫！開心返啦！冇事喇！」，嬲得仲勁。
男人眼中，好多事都只係小事，所以冇乜耐性，而喺女朋友眼中，任何事都係大件事，徬徨無助，希望你伸出緩手，而唔係一句「冇事嘅」，就會冇事。
而第二級，就係「扮明」，當佢同你講解發生咩慘事，你就點頭「嗯」、「係囉」、「又會咁都有嘅！」、「好慘呀真係！」，頭幾分鐘好似都仲Work，但無幾耐佢就會識穿你嘅Hea應：「你根本都唔明。」
然後，所有憤怒，又遷移到你身上面，so sad。
喂，咁方法到底係點呀？唔好心急，我依家開估，你一定以為又係啲咩細心聽佢講、畀多啲耐性、唔好唔理佢感受之類嘅廢話啦！錯喇，我邊會咁冇誠意。
對付躁底女朋友嘅最佳方法－就係⋯⋯躁過佢。
當一個不幸嘅人，見到另一個人比佢更不幸，就會覺得自己原來都幾幸福。
所以，當女朋友遇到慘事，你講一件比佢更慘嘅事，佢就會覺得原來都冇乜嘢啫，突然充滿正能量，掉返轉安慰你轉頭。
