學生分享天地 – Vicky: 如何踏上當化妝師的追夢之路 (下)

上次我都有同大家提過雖然我好鍾意新娘化妝，但同時又覺得新娘化妝競爭大，為左令自己可以做一個全面既專業化妝師，所以我之後就繼續上埋專業化妝進修班同埋City＆Guilds證書課程。

唔怕話你知，初上進修班既時候我已經好興奮，因為可以學到好多特別既化妝技巧好似紅唇妝，閃粉妝，年化妝等等。雖然好多人覺得呢啲誇張既化妝技巧平時未必用得著，但其實有睇開外國Fashion show既我就成日都見到Fashion show 上 model既妝容都係由唔同既年代妝容特色加上特別既化妝技巧演變出黎， 啲外國化妝師真係化得好靚架！不過香港化妝師可以化到呢個水準既就寥寥可數喇，我真係好希望將來自己都可以成為其中一位出色既化妝師！

不過上進修班真係要比之前再勤力練妝好多倍先得，因為每個妝睇Janice示範都好似好易咁，但到自己化個時就成日搞到揦手唔勢！例如有堂教化skin care 妝，原本以為好簡單，點知要將model由皮膚唔好化到皮膚自然透亮又要有零妝感係好考底妝功夫； 仲有化閃粉妝個時，Janice無論化散閃定實閃都唔會跌閃粉，但到自己化個時明明化緊實閃以為自己壓到啲閃粉好實，點知化完望下model塊面成面都係閃粉，結果又要化好長時間用膠紙痴走啲閃粉。所以平時我地上堂通常都會 overrun, 但都好彩呢到就算上堂超時都唔會趕我地走，所以我每次上堂都會好俾心化好個妝俾Janice睇左ok先會安心走。當然，上完堂之後我都會keep練妝黎熟習一下化妝技巧，練妝我最鍾意就係約同學仔番學校練，一黎學校化妝品夠齊，二黎同同學仔互練可以互相俾意見再一齊進步。

至於我覺得最難既妝就係呢個六十年代妝喇。上堂前搵reference個時我仲覺得淨係單色眼影加條線好似好易咁，但到親身化個時先發覺眼窩上面條線要畫得靚仲要兩邊對稱真係好難，我第一次化呢個妝淨係畫眼窩上面條線都畫左勁耐，真係差啲以為自己手殘。為左畫好眼窩位呢條線，除左搵同仔練妝，我仲晚晚番到屋企都對住塊鏡畫一次，宜家都總算畫得唔錯既。

至於讀City＆Guilds 證書課程，其實一開始我都真係唔知有咩用，純粹課程包埋咁咪照學。後尾自己上網check番先知呢個係國際認可既證書，而宜家好多大品牌就算請專櫃化妝師都要求有認可證書，同埋如果日後要做化妝導師都會易啲拎到相關資格，所以讀埋City＆Guilds證書都算係對自己多一個保障。同埋呢個課程都幾重視皮膚學理論同埋強調衛生。好似皮膚分析咁，除左要分析model係乾性油性定混合性皮膚，仲要分析彈性，有咩紋。之前我個model望落去有粒粒好似油性皮膚咁點知原來係太乾同皮膚敏感。所以我宜家都幾慶幸我有讀到City＆Guilds證書課程，如果唔係第時俾錯護膚品個客用搞到影響妝容同埋model皮膚就真係大獲喇！

好多朋友學完化妝都好心急接out job同埋好擔心接唔到out job，但我就反而覺得一開始唔需要咁心急接out job。俗語都有話淡淡定定有錢淨，老實講，其實完成左化妝課程只不過係你”認識”晒化妝技巧，而唔係代表你手藝已經好好，如果咁心急即刻接有薪 out job又化得唔好只會令人下次唔敢再搵你。所以就快完成晒所有化妝課程既我宜家都仲好勤力咁keep住搵同學仔同朋友練妝，裝備好自己同有十足信心先接有薪job。

當然，為左拎多啲經驗，最近我都開始報名學校既實習機會，雖然只係跟Janice出去睇下out job實況，但已經可以好好感受下真實out job同上堂既分別為將來出Job做好心理準備。 同埋我宜家都會義務幫朋友手化妝拎下經驗，好似前排我就義務幫朋友salon既interview video擔當化妝師。個日幾為hair stylists會為model set風格好唔同既造型。由於我都係個日先知hair stylists 會為model 染咩髮色整咩造型，所以我就要即場諗幫佢地化咩妝！好彩個日我幾乎將所有既化妝品都帶左過去先可以化到風格唔同既妝。另外令我最深刻既就係當日我化完相中既model後仲要幫一個漸變啡髮既model化妝，原本我諗住就咁幫佢化個普通靚女妝，點知個hair stylist行過黎同我講佢想要型啲既感覺，可唔可以幫佢加條粗眼線，個下我先發覺自己忽略左同hair stylist溝通, 呢次經驗真係令我謹記溝通既重要性。

另外仲有一次out job就係同幾個同學仔一齊幫手為隊業餘dancer化舞台妝。因為我同同學仔都係新手化妝師，個次大家都好緊張，工作前一個星期已經不停係group到討論要點化，又好confused 係咪真係要用咁濃既假眼睫毛。到正式dance show 個日，我地終於感受到”時間”真係正式化妝工作同平時練妝既最大分別。正式dance show個日，基本上所有野都好趕，我地係要一個鐘內化好一個model，比起平時練妝有成兩個幾鐘慢慢黎真係差好遠，所以我地都有少少手忙腳亂。好彩，我地同學仔之間都好互相幫忙，快手既同學仔就幫其他同學手一齊化，最後我地都順利為dancer化好妝。見到dancer佢地出完show後仲專登影相黎讚的我地同多謝我地，個下真係好有滿足感。

相信大部分想學化妝既朋友都好似我咁想將興趣變成事業，將夢想成真。而呢條路，雖然唔易行，但只要有一份膽量同一份堅持，相信你都會好似我咁慢慢走近自己既夢想。