學生分享天地- 夢想中的化妝工作
之前Janice都有同大家分享佢既入行經過同經歷，
收到好多留言都話好欣賞同敬佩佢。
其實大家見佢做得好成功，
當然佢背後係花左好大努力先有今日成績啦。
而Janice成日都話成功係唔可以靠運氣，
化妝師除左要技術要好之外，態度操守都一定要好，
唔係真係化得幾好都無人再搵番你架啦！
做化妝師係好多人既夢想，
今日就搵到其中兩位同學Karen Lam,
同Yandy同大家分享下學化妝既感受，
同埋係佢地眼中Janice究竟係個點樣既老師，
一齊聽下佢地既分享啦！
Karen自己本身做開玩具設計行業，因為想改變一成不變既工作環境，
加上早年已對化妝行業感興趣，不過係生活同興趣之間都好難取捨，
所以遲遲未有行動，直到前年發生左一件事令佢下定決心學代妝⋯⋯
話說係前年Karen籌劃結婚，遇到一個好「商業化」既化妝師，
因為佢自己對新娘化妝各方面都唔係咁熟悉，結果被人硬銷，
損失左金錢又攪到情緒非常低落！
好彩最後遇到另一位真心為新娘著想既化妝師，
係Karen正式結婚當日全程都好貼心為佢打點，令到佢十分感動呀！
所以Janice成日都話化妝師除左技術要好外，態度亦非常緊要！
就因為呢件事令佢明白到化妝師既重要性，
特別係新娘化妝師肩付著好大重任，話曬結婚一生人得一次，梗係要靚絕全場，
第時自己仔女睇番啲結婚相都覺得媽咪好靚唔會老套。
由呢件事起，Karen就下定決心去學化妝啦！
由於之前無學過化妝，對於揀學校可以話無從入手，
見過有啲化妝學校只係以講書形式上堂，
學生無咩機會實踐落手落腳去化，
所以Karen搵學校既條件係上堂最好係小組形式，
仲要有機會比同學去實習。
而佢上網比較左好多化妝課程，
最後就決家報讀左我地既新娘化妝課程啦！
Karen都坦言Janice上堂既時候講說話好直接，
化得唔好既地方會直接指出，唔鐘意兜圈。
例如：「點解眼底遮完都係咁青？」
「化快啲，唔係化得幾靚都無用，化太慢人地下次唔會再搵你」
「同學化完底妝請先比我檢查先可以上碎粉。」
呢啲說話，Janice每次都不厭其煩咁重覆。
不過Karen都話好鐘意呢個上堂模式，上堂唔會求求其其，
老師要求好嚴謹，會逐個model檢查，每次都要化得滿意先準落堂，
佢亦話「嚴師出高徒」，好鐘意老師坦率嚴謹既態度。
Karen仲話好多謝老師經常介紹各種產品既好壞，
學校上堂同練妝時都提供各大化妝護膚品牌比同學用，
令到佢地花費唔洗咁大，用得好就自行購買，唔會存有任何推銷目的。
直到今日Karen已經完成新娘化妝課程，
由當日只懂用手搽BB CREAM既佢，
到而家已經可以掌握各日常化妝用品、工具的種類同用途，
對化妝增加左好多知識。
以前睇妝佢只識話「幾靚喎」、「OK喎」、「順眼喎」呢啲字眼，
而家睇妝就會好留意個妝容線條平唔平衡，眉妝眼妝是否對稱等等。
上新娘班既時候，
Janice都有用佢豐富經驗同大家分享番係唔同情況下要點應對，
Karen而家有時間都會接下唔同既化妝工作，
有幾次仲令佢印象好難忘添。
Karen:「我而家都會幫姊妹set下頭，
Janice 教果幾招簡單髮型同技巧啲姊妹都好鐘意，
真係又快又靚，同埋janice 教嘅媽咪化妝技巧，
簡單幾個重點就中晒媽媽對妝嘅要求，
試過同媽咪化妝，個媽咪好感動係咁喊，
但自己就用咗啲無咁防水嘅eyeliner product,
攪到媽媽溶晒變咗熊貓眼，自己都覺得勁唔好意思，
其實janice都有提過呢點，但自己急得濟忽略咗呀！」
「又有另一次，突然被通知幫忙同媽咪化妝，
因為時間唔夠，已同新娘講只會同媽咪簡單均勻膚色
同畫返條眼線望落精神為主,
夜晚等佢個化妝師同媽媽化返個全妝，但個新娘忘記同佢媽媽講聲，
媽媽就以為我會化晒全妝set頭，係咁話我慢，
我唔小心爆咗句無辦法啦時間唔夠，
攪得媽媽有少少不滿，同新娘講話我唔係好得，
真係有啲唔開心，但其實janice教過說話係要有技巧，
如果我表達得好啲，就唔會被人誤會我話怪佢時間唔夠啦！」
Janice上堂成日教大家，做化妝師除左化妝set頭要靚之外，
講說話一定要有技巧!唔係話大家坦白直賜直肚唔好，
只係有時候太直接可能會令客人好尷尬或者唔高興，
做job大前題都係要客人開心滿意，各位同學都要注意呢點呀！
Yandy之前係機場任職地勤，亦試過轉出去做其他文職，
但覺得工作好千篇一律，直接啲講就係好悶！
之後Yandy同家人透露想學化妝，
而佢妹妹就係任職於一個護膚品牌曾經同Janice合作過，
所以當Yandy話想學化妝時佢妹妹都二話不說推薦佢去搵Janice學化妝。
而Yandy自己都上網做過資料搜集，覺得學校口碑好好，
係比較過價錢，上堂模式各方面下，就決定揀workshop學化妝啦。
未學化妝既時候，Yandy都知化妝係難，
但佢原本以為學完所有技巧就可以化邊個都無問題，
但當學完化妝之後先知原來唔係咁簡單 ！
除左技巧要好之外，分析能力都要好高，
要就唔同人既面型、眼型、感覺等化一個適合既妝容，
並唔係化曬所有step就叫靚架！
讀緊新娘化妝班既Yandy就話覺得新娘班同Basic班差好遠，
佢覺得Janice對新娘班既同學要求十分高，
學Basic班既時候係學最基本既技巧，
而上到去新娘班就開始要識得根據model唔同既特質
改善面型輪廓，改善眉型，要帶出面部立體感等等。
絕對唔會copy A妝，B妝，C妝咁去教。
所以Janice點解會連BASIC班同學要求都咁高？
就係因為佢會對進階班既同學要求更加高呀！
如果連根基都打得唔好，讀上去就會跟唔到進度架啦。
Yandy亦都話Janice上堂既時候好嚴厲，
不過就好鐘意呢個咁嚴厲又坦言既佢，
每當佢直接指出錯處，同化得唔好既地方Yandy印象都會好深刻，
係Pre exam既時候Janice會逐個model好仔細去check妝，
逐part講邊度做得唔好，要同學去改善，
到exam既時候就唔會犯同樣錯誤啦！
Yandy好多謝學校免費提供好多護膚同化妝品比同學用，
等大家試多啲唔同產品，不過Janice都成日提住同學仔
就算係免費任用產品都要善用同珍惜資源，唔可以浪費，
因為所有野都係得來不易架！
另外，大家上過新娘班既同學都知道，
除左妝要化得好，頭亦要set得靚！
Janice係新娘班考試除左check妝，對髮型要求都好嚴格。
Yandy都係一個set頭初哥，
初初望到新娘髮型既相都心唸：「哇！點先可以整到咁靚？」
以前都未接觸過咁多專業set頭工具，
例如：「點解要用粟米夾？」「點解要用Carmen捲？」
心中真係有十萬個為什麼⋯⋯
上完幾堂髮型班，經過老師既講解同教導先知道
想set個靚頭都唔係想像中咁難，
只要識運用技巧同善用工具想set靚頭都絕對唔係難事呀！
每堂學完老師都要同學番去做練習功課，
make sure同學唔會學完就算，
整頭同化妝一樣，唔練習就一定會退步架啦！。
Yandy話上堂除左學識化妝set頭技巧外，
仲學識左做化妝師一定要心思細密！
可能有客人並唔太熟悉化妝，
如果直接問佢鐘意咩妝，佢真係唔知點答。
但可以經過傾談慢慢了解客人喜好，
再設計一個適合既妝容比佢啦！
同學們都直言覺得化妝師前景好，
所以好多人爭住入行！競爭都好大！
不過Janice成日都教大家只要化得一手靚妝，
態度好，有禮貌又有交帶就一定有人搵番你做job。
與其擔心競爭大，不給先裝備好自已，練好一手靚妝，
第時就有job都接唔切啦！各位同學仔要加油呀！
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
