學做有態度有實力的化妝師
之前同大家分享過大師姐Frances既化妝整頭經歷，
今次就請到另一位大師姐呀Jan為大家分享啦，
佢亦係我地最早期畢業既專業班學生之一，
而家已經同Frances一樣係我地髮型班既導師。
大家應該對呀Jan都唔會陌生，
好多時Janice都會拍住呀Jan同Frances出唔同類型既job,
例如：珠寶show，廣告，Fashion show，
beauty brand training等等。
大家都知Janice要求好高，
如果Janice成日揀得佢地出job，
即係呢兩位大師姐都做到Janice既要求，
現時化妝學生都比舊時有優勢？
呀Jan係好耐之前都有係其他化妝學校學過，
不過就無而家我地啲學生咁幸福，
可以跟學校出去outjob學野，
而且而家資訊科技愈黎愈發達，
可以透過好多麼網上平台分享自己作品，
宣傳下自己，增加outjob機會。
化妝行業競爭大？＝無機會？
呀Jan就覺得唔需要擔心呢個問題，
不過佢就好建議同學要先裝備好自己，
到有機會既時候就要好好把握。
當初佢學完化妝都接好多無錢既工作，
幫身邊朋友化妝set頭，
雖然無錢，什至可能蝕車錢，
不過就賺左口碑，
之後佢既化妝工作就愈接愈多啦！
佢建議同學一開始唔好怕蝕底，
爭取多啲學習機會，自然大把job接啦
Jan而家自己接job已經好一段時間，
佢就覺得做學生時當然無咁大壓力，
因為做錯事都會有人提點，
練妝練頭既model都係自己既朋友，
就算整親人都唔會比人鬧，
不過出job就無錯既機會啦！
因為一次做得唔好，
可能唔會即時比人鬧，
不過人地下次就一定唔會搵番你囉。
出job遇過咩難忘事呢？
曾經試過出job既時候，
係幫一位奶奶set頭，
呢位客人其實唔算太難攪，
不過佢身邊就有幾個七嘴八舌既朋友要求佢要點化點化….
又試過有一次幫奶奶化妝set頭，
明明位奶奶完成時佢都覺得好滿意，
但佢出去宴客時過一陣就入黎同Jan講個頭唔得，
要再整過！
原來呢位奶奶覺得自己同另一位親戚個頭比起上黎唔夠「爆」，
想再set得高D，爆D，令個髮型睇起上黎更有氣勢….
其實我地成日都提到做化妝師除左要有實力之外，
態度都係極為重要，
好多時候，反而唔係個客要求多多，係佢身邊既朋友有極多既意見，
咁應該點解決呢？
咁首先梗係要保持住親切既笑容先啦！
亦盡量做到佢地既要求，
如果真係做唔到既話就要同佢地耐心解釋番，
千期唔好黑住面話做唔到就算啦。
et奶奶髮型同新娘頭有咩分別呢？
呀Jan亦非常擅長set奶奶髮型，
一般上左年幾既女士頭髮都會比較稀薄，
唔似得年輕既新娘一般頭髮都夠長同豐盈，
而且仲會頭髮長度會比較短，
所以set頭時運用既技巧同工具都會唔同架!
例如要運用加假髮，髮芯，同頭髮纖維等等。
而市面上確實比較少呢類專為奶奶髮型而設既課程，
不過Jan就建議同學多啲睇有關髮型既書籍增加靈感
學做一個貼心既化妝師
Jan就覺得除左靚既妝頭要靚之外，
貼心既服務都係非常重要架！
有一次，佢做完自己既工作之後原本可以走人，
不過因為佢留意到房入面全部都係女家既親戚好熱鬧，
而男家果位媽咪因為同其他人唔熟所以自己坐左係度，
顯得比較寂寞，
而呀Jan就即刻好主動去關心呢位奶奶有咩要幫忙，
例如幫佢換下衫，整理好衣物，
再執下妝同頭，
問下佢有咩需要等等。
等佢整理好所有野，而果位媽咪自己既親戚亦陸續黎到
Jan先放心執野走。
好多時其實只要做多一點點，比啲關心人地，
已經可以令人覺得好窩心滿意，
雖然做多啲定做少啲都係收果個價，
不過就可以令人地留下美好既回憶啦！
我地做化妝成日講要儲客，
客人其實就係咁自自然然儲番黎架啦，
當人地下次要搵化妝既時候就會唸起你，
呢啲就係回報啦！
所以同學仔出去做野時唔好怕蝕底，
妝同頭固之然要靚，
不過貼心既服務一樣係好重要架
有望大家都能做到一個有實力有態度既化妝師！
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
