同學仔眼中的「美」
上星期同大家分享過同學仔學化妝既心路歷程，
今次我地都搵左另外兩位同學仔，
除左問一啲關於佢地做化妝師既經歷，
佢地亦都分享左佢地眼中認為既「美」，
究竟學左化妝，甚至做左化妝師之後，
對「美」既睇法又有咩改變呢？
同學仔Ivy畢業之後一直做文職，做左2至3年， 同大部分都市人一樣，工作日日重複又重複， 沉悶之餘，最大問題係冇晒目標冇晒理想， 個人自然就愈來愈頹廢。 之後為左令自己有返啲目標，就由興趣出發， Ivy話佢本身都鍾意睇make up或者fashion既節目同事物， 自己出街都會畫下眼線化下妝， 所以就開始上網搵下有無make up course讀。
咁喺上年Ivy就黎左workshop學化妝，由basic班讀起， 佢自言其實都唔知自己適唔適合化妝，都係想試下， 不過佢話學化妝可以create一啲野，加入自己既風格， 令佢有返努力既目標。
至於搵學校，佢自己比較想搵一啲小班教學多過大型名師學校， 因為佢覺得學skill既話都係小班比較合適。 所以報名前一兩個月煲晒Janice個blog， 亦都有報名上左之前我地舉辦既talk， 加深左對化妝認識就下定決心報名喇！
Ivy學完basic班，亦都學埋新娘化妝同髮型班， 甚至學化妝途中辭埋職，專心學好化妝， 因為佢覺得返住份正職好難抽時間練習， 索性將全副心機放晒落去！
宜家Ivy有時跟workshop出outjob， 或者跟出面既化妝師去實習， 佢覺得所有野都係on process， 所以都耐心地等待一個正式成為make up artist既機會。 佢希望自己暫時可以向各個方面發展，咩都試下， 從而搵到最適合自己既方向同定位。
Ivy話佢最鍾意係歐洲果邊既妝容，尤其係天橋妝， 除左可以學到唔同用色，仲學習到好多唔同既妝容。 佢亦有補充自己鍾意型格style既妝容打扮， 對於「美」，佢雖然無特別限住一個框框， 但就習慣左行街時睇下人地既妝容有咩需要改善既地方， 好似scanner咁，將人由頭到腳掃一次， 然後喺腦內幫人大執一番！
Ivy話由於學化妝初期成日煲好多reference、報章雜誌， 睇得多靚野，對於個人化妝或打扮， 甚至幫其他人化妝，都有一定既轉變。 佢笑言自己學左化妝，身邊朋友都有讚佢taste好左， 無論係著衫、打扮，都唔同晒。
同學仔Joanne同Ivy唔同，本身已經係多方面能手既佢， 5、6年freelance唱歌、配音、司儀… 不斷學習多方面才能既Joanne想學化妝既原因好簡單， 都係為左想多一條出路。 佢直言freelance收入唔穩定， 所以有多個方面發展對自己有一定既保障。 而由於平時上台出show都要幫自己化妝， 所以慢慢對化妝有興趣既Joanne就開始化妝師之路啦！
Joanne初初去學化妝，都係未知自己有無potential， 但學左化妝就對自己第時出job都有好處， 所以就keep going去試下， 不過Joanne都覺得自己好唔定性， 就算之前喺其他地方學過化妝， 都係幾堂幾堂既個人化妝班，學習既機會唔多。 黎到workshop，係唯唯一個令佢坐定定學足10個月地方。
學完basic同advanced班，學緊髮型班既Joanne， 被問到係咪想向media方面發展多啲，佢又有唔同睇法， 雖然佢自己都係偏向喜歡幫廣告雜誌model化妝， 但佢覺得用advanced班學到既skills，再加上自己既variation， 睇多啲老師既示範同reference，都可以應用喺新妝化妝上， 而調返轉學新娘班，可能就難以應用喺其他方面， 所以佢都希望可以向唔同方面發展。
學左化妝之後，Joanne話佢自己成日行過地鐵站， 都會企喺度望住啲poster，望下人地個妝點化、 條眉點樣化得咁靚、個咀點樣可以再化得好啲… 佢直言自己化唇妝比較弱， 就算以自己做練習都未必有進步， 所以就會比較留意人地咀唇既形、色等等， 亦都會睇下model個妝係咪match返廣告， 笑言自己高層次左咁！
至於鍾意咩「美」妝， Joanne就話鍾意裸妝，最自然咁突出到個人最「美」果一面， 化左好似無化，但又要遮住短處、放大長處， 其實係好難做到，需要既技巧亦都要比其他妝容多， 學黃子華話齋『你落咗妝我認得你就叫做化妝； 你落咗妝我唔認得你就叫做「喬裝」』， 要「美」得好睇都好難架！
訪問完兩位同學仔， 佢地兩位都不約而同覺得化妝師既審美觀係唔應該被局限， 而係因應唔同人唔同style去審視，每個人都有自己「美」既地方， 而一個「美」既妝容都應該因應個人輪廓、化妝技巧等等既因素定奪， 所以化妝師要不斷學習，先可以不斷upgrade架！
＊＊＊
如欲取得更多第一手美容及扮靚資訊 可瀏覽Girls Talk Main Blog：www.girlstalk.hk/blogs或Like我們的Facebook專頁：www.facebook.com/janicelammakeup
（版權所有，未經同意不得轉載。)
