又熱又凍有霧氣？30秒擊退眼鏡起霧妙法

Jul 25 2016

大暑之後果然仲係好熱，室外依舊好似《熱情的沙漠》咁火燙，但寫字樓同商場就例牌凍過雪櫃冰箱。每日都要遊走於30幾度熱情同10幾度冷靜之間，除咗不時「攝」親之外，最令我困擾嘅其實係眼鏡起霧嘅問題。不過好彩呢個並唔係「死症」，坊間亦流傳不少平、快、靚、正嘅鏡片防霧秘訣。以下五個只需30秒嘅眼鏡去霧法，四眼嘅你一定要識！

一、防霧劑

最簡單直接就當然係用眼鏡（或泳鏡）防霧劑，皆因兩者起霧嘅原理同出一徹。之不過防霧劑屬鹼性物質，會腐蝕眼角膜組織，如果使用不當會或對雙眼構成損害。

建議大家不妨用甘油混入梘液（3:1）同幾滴松節油自製「家用防霧水」，用時只需以眼鏡布將防霧水塗抹鏡片兩面就大功告成，防霧效果大概可以維持三至四小時。有心人仲可以用化妝瓶隨身袋住一支出街，每隔四小時補一次！

二、洗手液、沐浴露、洗頭水、番梘水、洗潔精

上述任何一樣都蘊含油脂成分，因此將其中一樣抹喺鏡片上再用眼鏡布擦乾就能夠謝絕水氣，達到防霧效果。呢個方法勝再夠平，值得一試！

三、牙膏

其實牙膏同梘液洗頭水嘅方法同功效差唔多，只係牙膏質地厚啲，塗抹比較需時。另外要注意嘅係，牙膏入面嘅研磨劑容易刮花鏡片，所以擦洗力度要輕，同埋唔建議經常使用。

四、納米防霧眼鏡布

上面嘅方法最多可以keep幾個鐘，而呢個方法就最「長效」喇，正常情況可以防霧兩日左右。首先將鏡片過水，之後用普通眼鏡布抹乾，最後再用防霧眼鏡布擦「令」鏡片就搞掂。不過記住記住記住，塊防霧布千祈唔好濕水，如果唔係就會洗走啲防霧分子啊！

五、口水

係！你無聽錯，雖然呢個土炮小技巧聽落唔多衛生，但好多網民親身喺泳鏡驗證完都話幾有用，大概可以維持半個鐘至一個鐘左右。好就好在既免費又方便，但個人嚟講就硬係覺得會好大陣味……………Well，只能講句：「試不試由你。」

終極方法：選擇PC鏡片