千祈唔好睇小女朋友嘅處事能力
唔好睇小女朋友嘅處事能力。
其實佢做到好多你意想唔到嘅事。
Text, Iamge: 莎比亞
初初識佢嘅時候，佢已經好獨立，因為係家姐，由細到大都照顧幾個細妹。
所以我英雄無用武之地，冇辦法喺佢面前展示一下男性嘅魅力。
喺佢眼中，我反而係個嬌生慣養嘅獨子。
但直至一次，突然標出一隻小強，明明之前徒手捉都唔驚，但今次驚到彈起，係咁拉住我：「快啲捉咗佢呀、快啲捉咗佢呀！」To be 誠實，其實我係驚小強的。
幾經辛苦，我終於KO咗隻小強，然後就問女朋友：「乜妳唔係唔驚㗎咩？妳之前話徒手捉都得㗎喎！」
女朋友仲未驚完咁款：「你喺度我就驚㗎喇⋯⋯」
自此，喺屋企佢係一個堅強嘅家姐，但同我一齊，就係一個想受到保護、希望被照顧嘅女朋友。
而我，慢慢由一個怕事嘅毒L，成為想照顧佢嘅大男人。
但同居之後，關係又再一次轉變。
好多家頭細務由佢負責，由一個「依賴男朋友嘅港女」變成「得啦我自己搞得掂」嘅賢淑女友。
又有一次，我哋喺I字頭嘅傢品店買咗一個書架同一張枱，咁重當然由我搬啦。
但一搬到番屋企，因為我約咗朋友食飯，所以放低啲嘢就走，出門之前我同女朋友講：「等我番嚟搞啦，妳休息陣。」
結局當然係，我一打開門，女朋友已經一手一腳砌好晒，平時唔識就等我做嘅佢，原來都有獨立嘅一面。
