八款粉底試用
今次揀咗幾款質地嘅粉底試用比大家比較下，
分別有粉底液、creamy foundation同粉餅，
其中大部份仲係新出嘅產品添，
唔知大家有冇去專櫃試過呢？
我本身屬乾性皮膚，有雀斑、暗瘡印、膚色不勻等問題，
對粉底嘅要求一定要夠潤，要有光澤感，
遮到紅印同部分雀斑就夠（因為冇晒雀斑感覺好奇怪），
效果自然最緊要，
以下嘅試後感比大家作為一個參考啦。
而之前我地都有教過大家揀粉底，
粉底都分為好多種，
唔同質地會適合唔同既人架，
可以參考以下條link ,
之前收到full set嘅NARS foundation同碎粉，
今次就試試佢新出嘅All Day Luminous Weightless Foundation啦。
全新12種色調，淺至深膚色都照顧到，
獨特無重技術令質感輕盈，妝容能持久達16小時，
配方不含油分、香料、酒精，確保唔會形成粉刺。
NARS All Day Luminous Weightless Foundation$460/30ml
一見佢樽身寫住Luminous 、Weightless呢啲字眼
就知佢質地透薄輕盈啦～
質感好水好薄，一滴已經可以搽晒全面，
而且好易推開，感覺好透薄，
均勻到膚色之外亦能修飾紅印，
以咁薄身嘅粉底液嚟講，遮瑕度算適中，
我雀斑比較多，不過我都唔需要遮到一粒都無既，
對我黎講已經好OK啦。
GUCCI Lustrous Glow Foundation SPF25
GUCCI上年推出埋化妝品，包裝都係切合番品牌一貫高貴經典形象，
用上黑色金色條紋及GG 標誌圖案，
真係一睇就認到係GUCCI呀。
又係見到Lustrous 、Glow呢啲字眼，
唔洗試都知係令身同薄既粉底，
如果你比教乾，有乾紋同無咩光澤感就可以用佢啦。
質地水液狀，效果好透薄，好易推，
好水潤但唔會笠架。
膚色均勻咗，亦改善咗微絲血管位置，
但如果要遮暗瘡印就要再加遮瑕膏，
增加咗光澤感，有修飾毛孔效果，令皮膚更細緻。
本身皮膚冇乜瑕疵，只係有少少微絲血管就好岩用啦，
完全做到裸妝效果。
D&G Perfect Reveal Lift Foundation SPF25
配方含有Gold-Flavo-Silk Tricomplex™,
Gold Silk Sericin萃取, 意大利橄欖油同Vitamin B3，
恢復肌膚天然水分，有助減少細紋皺紋，令肌膚更細滑。
呢款寫有Lift字眼就知佢好潤身啦，
質感好滑，推開有啲似face oil嘅質地，
但唔係油淋淋果種感覺，
透薄有光澤感，可均勻膚色，
有第二層肌膚咁既效果，
遮瑕度屬一般。
如果你化妝技巧一般，只係想均勻下膚色，
又無咩瑕疵既人就岩用啦。
日本品牌一到春夏天就會出美白成份既產品，
一般有美白成份既粉底都會偏乾，
不過以下ALBLANC呢個粉底就無呢個問題啦。
ALBLANC Moist White Liquid Foundation SPF25 PA++ $400/30ml
含ALBLANC潤白美肌精華，修飾同時修護，
採用透明感提升技術及「薄片透亮粉體」，
令妝容透出自然光澤，增加立體感。
含洋甘菊精華、藥蜀葵精華、尤加利精華，有效保濕，
成份亦不含香料。
Maybelline Satin Skin Liquid Foundation SPF24 PA++ $139/30ml
泡沫氣墊技術加上「氣墊彈力粒子」令粉底質感形成空氣咁嘅透薄氣墊，
8小時長效保濕，不堵塞毛孔，敏感性肌膚亦適用。
「氣墊彈力粒子」究竟係咩黎？
唔識唔緊要， 最緊要睇個妝效，
質感幾滑，唧出嚟有啲似啫喱嘅質地，
我乾皮膚都覺得好容易推開推薄，
感覺好水潤，
有少少令身，可以增加皮膚光澤感，
但令得黎又唔會好跨張，
亦唔會覺得太厚，
鼻翼位置紅印同膚色不勻都改善咗， 效果自然，
睇起嚟皮膚滑咗。
真係幾有驚喜，可以話係平價之中既好物呀！
以上兩款都係比較水劑嘅粉底液，
如果連春夏天都覺得乾既朋友就可以揀潤身啲既粉底，
可以睇下下面幾款。
SHISEIDO Future Solution LX Total Radiance Foundation
含專利成分Skingenecell 1P，有助預防衰老，
幫助重整膚質，緊緻肌膚，提升輪廓，改善暗啞膚色。
SHISEIDO 旗下既粉底，如IPSA，cle de peau等，
JANICE同同學仔都好鐘意用架。
質感好滑，好似cream咁，
質地rich啲，但係好易推，
唔好以為佢會好厚，
除咗紅印之外，暗瘡印同雀斑遮到8，9成，
遮瑕度的確幾好，
粉底有啲令身，令面部睇起嚟更滑更細緻。
呢款市面上大約賣緊七百幾蚊，
一般creamy粉底都會貴少少，
不過每次只需用好少份量就可以搽曬成塊面，
其實計落都幾抵用架。
而且效果咁好，可以話係物超所值架！
我多數聽到“粉餅”都會諗，妝感應該會厚啲，
或者乾皮膚嘅人用就一定會好易“kick”粉，
仲會驚好粉樣，
但試過以下兩款粉餅之後覺得有啲驚喜，
可以考慮一試～
cle de peau beaute鑽光粉餅
近睇帶少少閃嘅粉餅，可配粉掃或粉撲，
想效果透薄自然啲可選擇粉掃，
想遮瑕度高啲可選擇粉撲。
cle de peau 既粉底好用就係人都知啦，
粉質好滑好細，以為咁薄會冇乜遮瑕度，
估唔到遮瑕度好唔錯，紅印、暗瘡印、雀斑都遮到，
而且效果自然，仲有啲光澤感添，就算印幾層都唔乾同厚粉，
如果本身好似我咁乾皮膚嘅人都覺得佢唔乾，
都真係唔錯，可以不妨一試！
ALBLANC Moist White Powder Foundation SPF28 PA++ $390/10g 專用粉盒 $100
其中一個賣點就係
「持久聚合物EX」可固定皮脂，
因此粉底有耐汗、耐皮脂嘅特性，
咁就唔驚妝容變色同溶妝喇。
「薄片透亮粉體」可改善暗啞，令肌膚明亮有光澤，
另外仲添加咗保濕成分，洋甘菊精華及透明質酸，
改善粉餅令皮膚乾燥問題。
同liquid foundation一樣，都係無香料架。
另一特別之處係佢嘅專用粉撲，
分別有海綿同絨毛兩面，
先用海綿面印上面，
再用絨毛面令粉更均勻緊貼肌膚表面，
令妝容更貼服。
遮瑕度幾好，連雀斑都遮到部份，
而且塗一兩層粉都唔會覺得乾同厚粉，
而且兩面粉撲設計特別，
令粉質更薄更貼。呢款都算唔乾幾滋潤，
如果你屬於中性偏乾皮膚可以揀呢款，
如果真係好乾就可以揀cle de peau 既粉餅啦。
如欲取得更多第一手美容及扮靚資訊
可瀏覽Girls Talk Main Blog：Girlstalk Blog
或 Like我們的Facebook專頁：
Janice Lam Makeup Workshop Facebook
（版權所有，未經同意不得轉載。)
