健身教練教路 如何加速肌肉修復
天氣開始轉涼，人開始懶，開始多冬季飯局…. 食多咗，但運動少咗，自然容易出番個小肚腩。
要重新pick up 健康身形，最難的一關是的起心肝做運動，太耐無運動，一郁完第二日乳酸 (Lactic Acid) 積聚，肌肉痛足幾日。
想快啲加速肌肉修復，原來運動前後都要勤做拉筋。好友兼健身教練 Wong Sir 表示， 運動前拉筋，有助預防受傷如抽筋、拗柴等；而運動後拉筋，則有助加速乳酸代謝， 紓緩肌肉疲勞。
至於拉筋需要幾長時間，就視乎運動涉及的肌肉範圍，以及運動的強度。
例如最簡單的緩步跑，需要大腿小腿的不同肌肉，每組肌肉如拉筋約30-60秒，整個拉筋如進行一次，就需要約5-10分鐘， 如果運動量加大，則需要再長些時間。
另外，多補充水份，進食含豐富維他命和礦物質的蔬果，亦有助帶走乳酸 。所以運動後如進食一大碗雜菜沙律，配雞蛋和低脂芝士，有益又健康！
