令愛情保持新鮮嘅方法
每個女朋友，都會攪盡腦汁，希望將新鮮感帶畀男朋友。
學子華神咁講，希望將愛情「保鮮」。
但似乎，呢個舉動係逆天而行，「年輕貌英」終會「人老珠黃」；「熱情如火」總會「疏淡如水」。
但實際上，真係畀女朋友搵到個方法，令我哋嘅愛情保持新鮮⋯⋯
Text, Image: 莎比亞
成日都話，喺香港拍拖，每次出街都係「倒模」。去同一樣嘅商場，食同一類嘅餐廳，行嚟行去都係嗰幾間店舖。外在環境已經係束縛。
「不如今個星期去行山吖？」
「不如今次旅行去東歐吖？」
「不如今晚試下巴基斯坦菜吖？」
三件唔同嘅事情，都有同一個共通點：都係我哋兩個從未一齊做過嘅事。
一聽到女朋友話行山，我即刻「吓」出嚟。但原來一齊辛苦上斜，中途又影下對方個喘氣樣，最後真係行晒成條山路，又真係幾開心。
一聽到女朋友話去東歐，我即刻話不如都係台灣算啦，但原來東歐嘅旅程，所帶到畀我哋嘅驚喜，當然比熟悉嘅台中夜市多好多。人生路不熟，但一齊探索未知嘅路，特別感覺到對方嘅「陪伴」。
新鮮感呢回事，絕對唔係一件驚人嘅大事，甚至只係沿自於極微小嘅細節。
放膽做一啲兩個人未試過嘅事，去一趟陌生嘅旅程，或者味蕾上嘅新鮮，都係一種嘗試。
由細到大，我哋都習慣活於一種模式。
番學番工結婚生仔⋯⋯其他事情你可能冇話事權，但愛情，相信係有最大空間，讓自己去主導嘅一回事。
拍拖拍到悶？
生活中仲有好多新鮮事可以一齊發掘，當一齊去做呢啲事嘅時候，你對佢可能有新嘅認識、有新嘅感覺。
