令女朋友變得賢淑嘅方法
話說我成日笑女朋友唔識煮飯，一啲都唔賢淑，呢個當然係激將法啦，令佢畀我激到講句：「好，我就煮畀你睇！」
但原來，畀我發現到一個更加有效嘅方法，如果你女朋友受軟唔受硬嘅話，尢其有效，仲要係短期內，甚至即日變到好賢淑。
而大前提係，你要明白，女仔係無法抵抗靚嘢。
成件事要回溯返我同女朋友啱啱一齊住嗰陣⋯⋯
Text, Image: 莎比亞
我哋食完飯，喺街上面，行行下我話：「如果妳日日煮飯畀我食就好喇⋯⋯」然後咁啱經過一間舖頭，櫥窗上擺滿咗一系列，粉色系嘅玫瑰煲，佢望住其中粉紅色嗰個：「好靚呀⋯⋯如果可以用呢個煲煮嘢，我一定會日日煮畀你食！」（真實反應，不是植入式廣告）
價錢有啲貴，佢好似一個小朋友咁，覺得買個靚書包，用靚文具，成績就會好啲。只要用咗呢個煲，就係廚神，或者唔食得，都睇得⋯⋯
我問：「妳係咪真係會煮㗎⋯⋯」佢不停咁點頭，眼神充滿熱誠，終於我拎咗銀包出嚟，喂難得有人煮飯，貴少少就貴少少囉！
女朋友收到呢份禮物，一路捧住，吖，係睇住我一路捧住，佢就一路開心到返屋企。
結果係點？可能你都估到⋯⋯
頭幾日，真係幾餸一湯，畀足心機玩煮飯仔，而兩個禮拜後，個㷛已封塵，包米都好似擺到有蟲⋯⋯
歷史係會重複，女人貪得意嘅心態都會永遠存在，再下次，佢買咗個光波爐⋯⋯再下下次買咗個夾餅機、仲買多個多士爐話要日日整早餐。
