令女友唔再煩你嘅方法
同女朋友相處，最怕就係畀佢嘈呢樣嘈嗰樣。
Text, Iamge: 莎比亞
買少少野又話嘥錢、夜瞓又話傷身、連食嘢都話肥，休息下都話你懶⋯⋯簡直冇晒人生樂趣，而佢愈嚟愈乞你憎。
「關心你啫，都要畀你鬧番轉頭，真係落力為你好，得不到分數呀⋯⋯！」女朋友反駁。
呢個矛盾，終於畀我搵到解決方法，天下間所有男朋友會從此得救⋯⋯
首先要明白，拍拖耐咗，引起鬧交嘅事會愈嚟愈細。語氣稍為差少少、聲線稍為大小小，塊面稍為黑小小，已經足以引發世界大戰。生活上嘅瑣事，反而成為喜怒哀樂嘅關鍵。
所以，想少啲鬧交、想女朋友煩少啲，最好嘅方法就係令佢陪你一齊癲。
正所謂－「If you cant beat them, join them.」 今次就掉返轉－「If you cant beat GF, make GF join you！」
引誘佢狂買衫買鞋，讚個袋好靚對耳環好襯佢，之後佢就冇得再話你亂買嘢，因為佢都瘋狂掃貨。
之後，同佢一齊通頂睇戲，話難得放假，唔係咁早瞓吖嘛？之後佢同你一齊夜瞓，就冇得話你傷身。
食嘢就最簡單，帶佢一齊去試新嘢，佢就會忍唔到口。
兩個人一齊懶，攤喺張床就過一日，瞓醒就食，食飽就瞓，女朋友就唔會話你唔上進，因為一齊頽廢係好開心。
