不可錯過的任食新熱點
雖然話Dining娜個胃係黑洞，潛力無限，食親放題、自助餐都永無蝕底，但Dining娜重量之餘更加重質，尤其對任食就更加挑剔，因為以前中伏太多，飽係夠飽，但無樣嘢特別好食，咁就浪費咗個胃嘅消化力喇！呢期朋友聚會多，竟然俾我哋誤打誤撞食到兩間唔錯嘅任食餐廳。
韓迷必捧！$150燒烤放題
第一間喺放題熱場兆萬中心，呢度嘅放題店特多，口碑好壞參半，向來鍾意試新嘢嘅Dining娜就建議成班friend試食新開嘅韓日屋燒烤放題。一入到去見到牆上掛住G Dragon嘅畫像，幾個姊妹都忍唔住叫咗出嚟！呢度主打韓國料理，醬油蝦、人參雞湯、泡菜海鮮煎薄餅、卡邦尼芝心年糕同香辣炸雞等都任點任食，而且質素相當唔錯，特別係醬油蝦入口鮮甜啖啖肉，枱枱都爭住翻點，我哋當然都唔輸蝕啦！
仲有，呢度啲韓式壽司個名好搞鬼，咩黑蚊蚊、靜雞雞、熱辣辣、軟綿綿、碎濕濕同笑蝦蝦，大家鬥估有咩食材喺入面，成晚笑聲不停，而啲壽司賣相亦非常吸睛，擺上網放閃最正。
長龍店驚喜任食火鍋
另一間係位於柴灣嘅上海餐館，港島朋友經常嚟呢度gathering，貪佢地方夠大又遠遠地，星期六、日都唔使等位。點知無食一排，近日再去竟然要排長龍攞飛仔！原來佢哋新加咗任食火鍋，全包價每位唔使$150，最驚喜係啲料真係好新鮮，生蠔、海蝦、鯇魚片、墨魚滑、響鈴同各款蔬菜等一入口就食得出係靚貨，肥牛亦好鮮好爽，完全估唔到呢個價錢會有呢個級數嘅食物，回本無難度。
唯一改善位係order配料後等得比較耐先上菜，可能因為搞任食火鍋之餘又要兼顧上海菜，人手不足所致。建議大家早啲入座，遲嚟嘅話，唔少配料已沽清，咁就蝕到入DNA喇！
韓日屋燒烤放題
地址：旺角西洋菜南街1號兆萬中心15字樓
電話：2989 9433
太極樓京滬飯店
地址：柴灣柴灣道238號青年廣場4樓A舖
電話：2904 4333
圖片來源：韓日屋燒烤放題、太極樓京滬飯店
