七月首爾之旅－－shopping血拼第二站：東大門
行完新村，第二站便是鼎鼎大名的東大門，由於首爾的時裝批發中心位於東大門第二區，所以不少人以為到東大門購物就是到批發區買平貨，其實批發區並不招呼遊客，買貨除了要有舖頭卡片外，更要求以韓語溝通，非常麻煩。而遊客逛的應是第一區，這裡的商場營業時間是由早上10:30至翌日凌晨5:00，一向以為香港的舖頭營業至晚上十時，已是全球最照顧購物狂的地方，怎知東大門更利害，可以暢快地逛至凌晨，不過我參加的是旅行團，在東大門的限定購物時間只有一小時！！！！
我集中火力主戰Doota，因為這座shopping mall有童裝、精品、飾物、男女裝衣飾、運動服等等，更於裝修後於地下一層引入了一些富特色的地道品牌，甚具看頭。剛巧這時囝囝睡了，家人於是代我看著囝囝，讓我逛得痛快。我當然第一時間衝上6樓的mom & kids，大部分都是童裝，更有不少韓國的童裝名牌分店，款式特別之餘，最緊要是質料很好，而價錢真的是平到你唔信。由於只有一小時，買到後段，我已沒有看價錢，睇o岩便買，以最短時間掃貨，旁人看來還以為我在參加甚麼「極速掃貨」此類的電視節目吧。
左：Twinkids灰色開鈕tee每件 ₩29,000 (約HK$194); 右：Twinkids深藍色短褲 ₩15,000 (約HK$100)。
狂掃了差不多45分鐘，離集合時間不夠15分鐘，我立即快跑到地下一層看女裝，怎知跑到三樓時撞見我的家人，他們說：「你個仔醒咗，喊住要搵你喎。」我苦惱地說：「但我仲未行女裝呀！」哥哥見我如此可憐，「咁你快啲去行啦。」可是，囝囝已經追到來，死抱住我不放，唯有抱住他極速逛，如此狼狽下，只求其買了一件裇衫。最可悲的是經過此役(瞓睡唔見咗我)，囝囝不讓我離開他的視線範圍。吃過晚飯回到酒店，嫂嫂家姐們意猶未盡，決定搭的士去再掃過，我這個shopping精自然舉腳贊成，我哄囝囝跟舅父表哥們回酒店房玩，他堅決不肯，更立即樹熊上身，緊纏住我，就算舅父出動他最愛吃的雪糕也不為所動，迫我放棄shopping，姨甥女說：「你唔開心咩？佢咁嗲你。」我無奈地說：「但係我真係真係好想好想行街呀。」當看著家姐阿嫂柴娃娃地跳上的士，我卻抱住囝囝返房瞓，那種痛苦至今仍清楚記得。唉，shopping狂無得去shop，等於唔俾劉翔跨欄、唔准碧咸踢波同嚴禁o靚模晒胸一樣，慘無人道！！！我邊行上房邊說：「你瞓著咗，媽咪先去shopping囉。」囝囝即時應道：「瞓咗就瞓咗啦，仲shopping ?」都話佢係我尅星啦。
囝囝身上的純棉貼身tee和貼腳四個骨褲都是購於東大門，質地都很柔軟具彈性。
Green Tomato粉紅色貼身tee₩5,000 (約HK$34)，Twinkids藍色四個骨褲₩10,000 (約HK$67)。
Doota
網址 : http://www.doota.com
電話： +82-2-3398-2386~7
交通： 乘坐2號線地鐵，在東大門歷史文化公園站下車；或1、4號線地鐵，在東大門站下車。
營業時間 : 10:30-翌日05:00
休息時間 : 週日23:00~週一19:00
更多韓國之旅的戰利品，刊於今期#657 (7月13日出版)的More內。
“shopping狂無得去shop，等於唔俾劉翔跨欄、唔准碧咸踢波同嚴禁o靚模晒胸一樣，慘無人道！！！” 你真係好搞笑, 可以想像你嘅失望!
原來男仔著粉紅色都可以好靚, $34太抵啦!!! 我都好想去買….
我都係working mom, 睇咗你嘅Blog好耐, 好鐘意你嘅shopping心得&同仔仔嘅點滴, 加油喔;>
所以話呢, 親子團絕對唔好去有得Shopping既地方, otherwise妳會比死更難受law, 希望我個女大啲會貪靚啲, 咁我地就可以一齊shop law…….(發夢ing)
好靚呀d 衫仔..好cute呀..點解hk冇d咁靚又抵既衫仔賣既…你仔仔真係得意到暈呀..
哇~~~~~其待左你po首爾之旅既文章好耐啦~~~~
我未去過korea呀… 因為一直對呢個國家冇乜特別好感, 而且食方面又完全唔岩我食… 不過睇完你既文章之後… 好想去下… 又好想試下打減肥針~~>3< 不過要十日真係冇乜可能…
最最最主要係想去買童裝同女裝呀~~~哇… 喺hk, 求其喺d小店到買童裝, 不知名牌子, 都要二百幾三百蚊件衫仔 / 裙仔… 咁喺korea d衫仔真係抵好多呀!! 仲有女裝呀… 哇~~~~ 又多一個旅行既目標lu~~~~
哈哈… 睇到你既形容 “shopping狂無得去shop，等於唔俾劉翔跨欄、唔准碧咸踢波同嚴禁o靚模晒胸一樣，慘無人道！！！” 真係會會心微笑… 我個小朋友仲細, 未識得咁樣阻止我去shopping住… 到佢大個d, 我想像得到… > . <
p.s. 你幫你仔仔咁樣襯得幾好睇呀~~~~ 粉紅 + 灰, good taste~~~ ^ ~ ^
Hi Vivian,
多謝你既鼓勵！
其實男仔著粉紅色真係ok好睇，唔使下下都著藍色咁悶，不過主要係我個仔超鐘意著粉紅色，仲有呀，雖然係$34，但質地很好，柔軟勁有彈性，著完一日都唔會變形。超抵！！！
Annie,
去旅行帶埋小朋友去shopping都唔係問題，我最錯係冇帶爸爸啫，上次去日本有爸爸陪佢，就完全無問題啦。生女係可以一齊shop, 不過我家姐話一齊shop至大＂穫＂，因為自己買阿女又要買，買多好多。
Jovi，
係呀，香港真係冇咩靚既童裝，女仔還好，男仔個Ｄ款都好街童feel，韓國真係買童裝既天堂。
MORE~~~i love it!! ^^，
我都係一直對韓國無興趣，如果唔係屋企人一齊去都唔會去，點知竟然有驚喜，我都想再去多幾次，不過首爾只岩shopping，無其他野值得去，不過shopping真係無敵。我咁少時間都買咗咁多，可以想像Ｄ野幾得同幾平，Ｄ童裝既質地靚過香港個Ｄ童裝品牌多多聲。
其實對於果晚我冇得去shopping，仍然耿耿於懷，我是完全想像不到我點解會冇得去行街，而要留係酒店房，最慘係冇得發脾氣冇得嬲，我諗唔到會有人可以阻止到我去shopping，母愛真係偉大呀。
妳就好啦….我如果想shopping既話, 除咗唔可以同阿女之外, 連老公都唔可以, 因為佢唔like shopping…..費事閙交啦…….慘……
D 衫真係好令, 質地很好, THANK YOU SO MUCH, 見倒冇得買, 真可憐, 再去過3曰夜, 夠哂!
hI Annie,
老公都唔鍾意shopping架，所以佢咪寧願陪阿仔囉，唔係帶佢去shop，而係帶佢去湊仔呀。
Hilda,
我都真係想再去買過，齋shopping, 3日夠晒。
Hi Michelle,
Thanks for your sharing, i like the clothing for Ozone, as you said that your shopping time is very limited but why you still have time for photo-shoot on the clothing.
hi lo,
我只係係等俾錢時用iphone襟咗兩張相, 仲有d鬆添, 都ok啦, 其實寫咗blog之後, 已經養成咩都影咗先算, 我今次算影得好少相, 有d都係用我姪仔d相咋.
michelle, 最慘係佢除咗自己唔LIKE SHOP外, 仲唔LIKE我SHOP呢, 作死
哈哈哈！你寫得好好笑！媽媽真偉大！！！
Annie,
大部分男人都唔鐘意shopping，同大部分女人都唔鐘意睇波一樣，不過坦白講，同佢地去shopping，個心始終掛住掛住不能盡興，應該搵機會到Ｄ姊妹去好過啦。
wingyee,
我呢幾日都反覆係度諗，原來母愛真係大得咁利害，因為我諗返，如果果晚就算阿仔放我去行街，我個心都會掛住，又驚佢突然要搵我，都唔會行得暢快，無辦法啦，鬼叫我生咗佢咩。
係law….不過我不能離開HK的………掛死人咩
“…死抱住我不放，唯有抱住他極速逛…囝囝不讓我離開他的視線範圍…他堅決不肯，更立即樹熊上身，緊纏住我…”
EXACTLY!!!! SOOOOOO TRUE!!!
Thanks for speaking up for all the shopaholic moms!!!
Hi Echo,
哈哈, 原來大家也有過這樣悲慘的經驗呀.