一個令男友唔會偷食嘅方法
話說我女朋友嘅朋友嘅男朋友畀人捉到偷食，我心諗：「關我乜事」之際，女朋友就即時無名火起，好激到咁同我講：「如果你係咁，我一定同你分手！」
當我真係打算開口講：「關我乜事」，佢又加多句：「我仲會即場剪咗你。」
Text, Image: 莎比亞
聽到呢句，已經隱若痛痛哋。古語有云：「黑狗偷食，白狗當災」原來係真，只要有一個男朋友偷食，就會引起全世界女朋友嘅警號，彷彿我哋都會終有一日成為罪人之一。
更甚，女朋友身邊嘅女性朋友，都非常疑心重，檢查男朋友嘅手法仲層出不窮，Check電話係指定動作，報到行踪係例行公事、扮索女Add自己男友，最近仲透過《Pokémon GO》GPS睇佢定位喺邊⋯⋯
「佢畀得手機對方睇，都事先Del咗晒啲嘢啦！邊會咁唔小心畀你知？」我反駁。
「實會有啲蜘絲馬跡發現到，女人係好醒。」女朋友再反駁。
女朋友同我解釋，嗰位偷食嘅男朋友，原來就係一時唔記得，彈咗個曖昧對話出嚟，當場斷正。
「講還講，可唔可以唔好再講個『斷』字？」
女朋友本身亦都疑心好重，我呢啲毒L有女朋友已經係奇蹟，又邊會偷食，但佢都仍然擔心，為咗Check手機呢個問題亦嘈咗好多次，我話我覺得侵犯私隱，好難受，佢話如果冇嘢怕咩畀人睇。
信任同尊重，呢個理據，其實佢哋明白，但唔會因為有道理，就可以掩蓋佢哋內心嘅感受。
「我都唔想咁，但我真係好驚。」
驚對方偷食，就好似佛地魔對哈利波特咁，你唔知佢幾時會出現，但就凝住佢失驚無神就彈出嚟嚇你。威脅同恐懼，無聲無息存在，揮之不散。
後來，我想女朋友安心啲，一人讓一步，間中都會畀佢睇下，間中佢又會信我唔睇。
對於驚男朋友偷食，我問：「係咪冇其他方法令你冇咁擔心？」
「有。」
我希望難度唔會太高。
「就係我自己做得好啲，令你一直都會咁鍾意我，就算有其他女仔搵你，你都會諗：我已經有個好好嘅女朋友。」
佢再補充：「萬一你真係偷食，都只係你損失。」
聽完之後，我有啲眼濕濕。
