【果園打工】再次有驚無險

我在這個farm做過兩項工作，第一是用較剪剪梨，這是一件超級簡單，絕對無可能做錯的事，只是在於快和慢的問題。

但做了一個多星期剪梨的工作後，他們突然收回那把較剪，帶我們去挑蘋果！

今次真係難到我，因為唔准用手套(救命！咁咪會攪到對手又粗又黑？)，他們說採蘋果時一定要留住蘋果掟，這個⋯⋯好有難度！因為動作要好快，又要扭一扭個蘋果之後即刻用陰力輕輕一扯，我真想問他們：「點解唔可以用較剪呢？」

初時做的時候，Supervisor都讓大家先試下，而我能夠成功留蘋果掟的成功率係肯定少過30%！Supervisor和Manager都勁有耐性教我，又話對於女仔來說是比較難的，但之後可能完全接受唔到我做到錯晒，Manager突然之間急召我出去，跟佢走出去，然後，見到Katrina！

在我一頭霧水的情況下，他載我們去farm的另一邊，落車後叫我們在布冧樹練習，因為布冧的掟比蘋果的軟，易扯好多。想不到全場竟然得我和Katrina要「特別訓練」！我們在那個「訓練場」訓練了半小時，他又突然載我們返去，但就附加一句：「如果明日你們也做不好的話，就要再來這邊練過。」

我為了要留住蘋果掟，所以做得超慢，因為我以為他們好緊張quality，誰知……過了幾日又收到指令：「要做快些，留唔留到掟都無所謂，如果做得慢要炒油！」我真唔明白他們為何一時一樣，我真係無所適從！

不過，又過了幾天，我又聽到一個惡耗：「我在被炒的黑名單中，如果一天之內完成100棵蘋果樹，就要fired！」

我在那一刻竟會極度慌張，因為勤快的Katrina不在黑名單之列，如果我真的被fired，我就要自己孤伶伶做其他工？還是要她犧牲這工作陪我另覓新工呢？我未賺夠的旅費又如何是好呢？怪都只能怪我成日掛住同人傾偈，而Katrina卻默默地工作……

在那個取決性的早上，我決定整天唔出聲，一定要集中精神工作！我覺得人就係咁，唔到最後關頭都唔知驚，我那天在一秒可以挑兩至三粒蘋果仔，即使之後冒著大雨和踩著泥濘，我都可以keep住速度，加上和我一起工作的partner 幫我少少手，我終於可以在吹雞完場時剛好完成了，那一刻的心情直情要開香檳慶祝！

就是這樣，我決定work hard, play harder，一於將那一個月的糧花在往後Tasmania的兩星期之旅中，我一定要把賺到的錢完完全全地花光，一毫子也不留！