【拍拖很煩】點先可以有共同興趣？
成日都話拍拖最緊要夾，其實好難。
天生已經係兩個陌生人，來自兩顆星，又點可以和平共處？起碼我唔想陪妳行街買衫⋯⋯妳又冇興趣同我睇模型先啦喂！
雖然先天不足，不過可以後天培養。
方法好簡單，首先⋯⋯
Text, Image: 莎比亞
假設你已經有男女朋友，而佢成日都逼你／你被自願做一啲你心理，同生理都好抗拒嘅事。
例如，我一行入化妝品部就會不停打喊露、覺得陪女朋友睇Bra會好尷尬、女朋友一陪我睇波就會瞓著。
記得有次旅行，女朋友好鍾意睇啲古蹟，好想去一間好細好細嘅教堂，而車程係來回6個鐘，未計再要行上山嘅耐力。
「吓⋯真係要去呀？」坦白講，我有少少唔情願。
「只要望到一眼，我就心滿意足。」
「問題就係用咁耐時間，但係望得一眼嘛⋯⋯」
最後，我都選擇陪佢去，除咗其實我係冇得揀之外，都想尊重下佢嘅決定。
《那些年》話「人生本來就有很多事，是徒勞無功的啊。」其實，「拍拖本來就有很多事，是徒勞無功的啊。」
幾浪費時間，幾冇意義都好，就由兩個人去賦予意義，令成件事覺得值。
嗰間小教堂，最後原來每人只限參觀10分鐘，但車程嘅6個鐘我哋開大食會、心事時間、挨住瞓覺，再睇多套戲，時間好快就過咗。
男又好，女又好，是但一個首先尊重咗對方，另一方亦會願意配合你。
