皮革手作-行李牌DIY
今次同大家分享一次我去學整皮革行李牌既經驗啦~
果次係約左去一間皮革手作店度做，1 ON 1咁，
你想整咩色咩形，都可以同店主講左先，
咁佢就會事先prepare好啲材料，
然後再step by step咁去教你做。
由cut皮到畫圖側到之後每一樣工序都會教，
所以有左呢次經驗之後，
發覺只要有材料都可以自己喺屋企做架！
要整行李牌，首先要剪左一塊岩size大小既皮出黎先，
因為我想整到前面放透明膠片，後面就有個卡位放野，
所以分別要三塊長方形既皮去做中間間隔、面、底。
度好size，用枝比較易睇到顏色既筆勾返個形，
記住要畫喺皮底，如果唔係就見到筆痕架喇！
畫好之後就可以剪左外圍出黎先，
內圍就可以用界刀去cut返膠片位、卡位邊，
而扣皮帶既圈圈位就要用長斬同鎚仔鑿返個圈位出黎。
跟住cut一張岩size既透明膠片，記得留邊位，
用白膠漿塗上邊位，將膠片痴落皮革度，風乾。
之後同樣用白膠漿塗上邊位，將三塊皮痴住。
呢個step係為左固定三塊皮，
等之後鑿孔同縫線時唔會走位。
等膠水乾左之後，用鎚仔同四孔菱斬將三邊打洞，
打好洞，就可以量度縫線長度，
大概係三邊邊位長度既3至4倍，
因為係去workshop整，所以我用既時候縫線已經上左蠟，
如果自己整，買返黎既縫線又未上蠟就要做多個step喇。
跟住用兩枝手縫針穿起縫線，做成雙頭針，
以8字穿線法，由兩條線相互交錯，
開端要喺同一個洞先穿兩次拉緊，
然後開始向下縫，
每交會一次縫線，都要用雙手拉緊作調整。
到最後用單針縫回針，打結，再剪斷剩餘既線。
縫好後，就要用透明邊油同打磨器，
去磨返靚幾邊既邊位。
第一次做呢個行李牌，我用左三個鐘。
因為要聽店主一邊教一邊做，
如果自己落手整，又唔係整得咁複雜，
應該個半鐘至兩個鐘都整好。
呢度係我上次去整既皮革店資料：
LEATHERISM HANDMADE PRODUCTS 港產皮革工作室
地址 ：九龍西洋菜南街234號4/F (太子港鐵站B2出口)
電話：3488 6490
營業時間：星期二至日 1400-2200 (依facebook公佈為準)
希望同樣對皮革有興趣既大家，
會喜歡我今次既分享啦！
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup
（版權所有，未經同意不得轉載。)
