家居日常小智慧

新居入伙無耐，好多野要執，好多野要放，
雖然一個人住，都多野到不得了，
咁因為我真係好鍾意買野，比平常人多好多
衫褲鞋、skincare、cosmetics…
同埋有時PR送黎既gift等等，
所以我都會想盡辦法收好啲野。

－收納篇－

我訂左兩個由樓頂到底既大櫃，
每層都用分類兜仔裝好，
好似第一層係bodycare、第二層係lotion/cream等等。
因為個櫃都好深，用兜仔既話拉出黎就睇到晒，好方便。

呢啲兜仔都係喺12蚊店買，我總共買左十個，
佢個pattern類似Franc Franc果啲，但就平靚正。
個兜仔分別有幾隻size，我買左白色最大同矮身，
一來白色靚，二來其實個容量都幾大，
可以將所有野分類得好好。

有時啲細細件sample，travel set，香水等等，
就可以放喺呢幾個簿身膠兜度，易睇又易搵。

相信好多時女仔都會以款色為先，
會揀藤籃、木盒、布袋等等去裝住物品，
但以我個人經驗，昆蟲仔就好鍾意匿埋喺果啲兜仔，
同埋香港天氣潮濕，要揀方便清潔既話，
都係膠盒最好。

黑色尼龍袋係喺IKEA買，有大中小size，
workshop既stock room都係用呢個去分類，
唔用時又可以揩返埋收起，好方便。

另外，建議大家可以買呢啲間隔，
將啲物品再分類得仔細啲同整齊啲。

之前我買過呢３款，
下面心形果隻貪佢靚，但質料太軟隔唔到，
而中間啞通紙做既又好快殘，
最好就係最上面果隻，塑膠夠硬最襟用。

你睇下我啲指甲油，就算好多都排得好整齊，
呢個抽屜既高度可以將啲指甲油直擺，
我就鐘意平擺，可以擺到兩層，
拎黎用時就可以好方便睇清楚啲顏色啦。

呢啲base，粉餅，同其他化妝用品都係一樣，用間隔條分開咁擺，
可以依自己需要設計點樣去隔開啲物品。

呢兩個首飾格我喺MUJI買，一個$80，
可以放晒我啲耳環、戒指落去，
下面有個闊位仲可以隨時放啲比較大既飾物。

放頭飾既呢個盒其實係IKEA廚房部既廚房用具黎，
不過我發覺啲位夠大，用黎放頭飾岩岩好。

－好物篇－

跟住就介紹大家呢個隔熱手套，
係喺１２蚊店買入，
佢個款都ok架，而且size岩岩好，
女仔手細，好多時市面既都太大個太鬆，
呢個就岩岩去到手腕，拎熱野食既時候好好用。

女仔一個人住，日常生活上有時都會有啲不便既地方，
就好似係開蓋咁，無咩力水真係開唔到，
不過比我發現到呢塊軟膠，
係專用黎開蓋，仲可以當保鮮紙，
有大細兩個size，我呢塊係細既。
大size等於係一個碟咁上下大啦，
只要好輕力就幫手開到個蓋架啦。

跟住就係呢個係IKEA搵到既隔水兜仔，
專係用黎放廚房洗完碗放喺度，個size岩岩fit到盥盤位，
佢既角位係圓既，就唔怕會刮花啲地方啦。
我搵過市面好多款都麻麻，呢個classic黑色就簡單易襯。

而且佢好薄身亦好易清洗，價錢仲好平添。
如果係鐵質就可能好易生鏽，
同埋宜家好多廚房組合櫃既枱面都會係corian(人造石），
如果係鐵既話，拖拖拉拉就好易整花張台，

平時屋企有儲開刀叉既朋友，
就可以買呢類型既膠兜仔啦！
佢一個已經分好左幾格，
一個正常既廚櫃size都可以放到兩個架啦。
而我個廚櫃既抽屜都放左兩個，
我就用黎放刀叉匙等等既食具。

平時呢種膠兜只係得一層，
而呢個就分左上下兩層，上面果個可以左右移，
可以放到好多用具，又方便到我，
呢個喺AEON買，都係$70。

最後，建議大家第時訂櫃，都可以好似我呢個櫃咁，
啲抽屜由上面薄身到下面厚身，
咁就可以因應需要放到唔同類型既野，
唔使浪費左啲空間喇。

今次就同大家分享住咁多生活上既小智慧，
相信大家都有自己既一套，
如果你地有咩好方法都不妨share下，
又或者有咩日常問題都可以email比我問問架！

如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)