編輯：Sylvia Liu｜原文刊於：東方新地

陳豪由壞男人變好爸爸？與陳茵薇衝擊南灣親子同樂

Moses貴為TVB一線小生，人氣甚高，各劇集受歡迎使得他可北上賺錢的機會接踵而來，然而他放棄這一切，決定只在香港拍戲，原因只有一個，就是「家人」。他更說到，現在做的事都以家人為先，而留在TVB可以讓他時間自由一點，周末亦有多點機會放假照顧家庭。

影帝級的陳豪演技已經無懈可擊，最近在新劇《殺手》中演百發百中的殺手，經常口花花，為此劇更操到大大隻，不過劇一完陳豪即變回廿四孝老公兼好爸爸，把chok爆的殺手形象忘得一乾二淨，而身上的六嚿腹肌亦隨著時間流逝化成一嚿。

最近因為疫情關係小朋友要停學，陳豪同陳茵媺日日都要為仔女安排節目，家住港島南灣對住無敵大海景，最好的消閒活動當然就是陽光與海灘。

於（7月21日）沙灘仍未關閉，陳豪一家五口在南灣海灘盡情玩樂，三個仔女似足父母真性情，游出浮台瘋狂跳水，又活捉蟹仔實地上科學堂。

49歲陳豪完全拋開視帝形象，赤膊只穿泳褲，厚切身形稱霸泳灘，43吋胸肌已變「鬆肌」，落水後髮線更見現形，幸好還有陳茵媺的火辣比堅尼閃耀南灣，廿四孝老公與幸福人妻加上三個活力十足的仔女，構成最幸福的畫面。

陳豪陪仔女開心炸水

（7月21日）下午太陽曬正頭頂，陳豪陳茵媺一家大細連外傭共七人成為南灣海灘最疊馬的泳客群組，仔女都穿上充氣浮水衣，全家配備泳鏡浩浩蕩蕩游出浮台，並霸佔了浮台一段時間。

雖然帶埋兩位外傭出浮台負責幫眼照顧小朋友，但緊張爸爸化身救生員，全程牛咁眼望實仔女與老婆陳茵媺，大仔Aiden與二仔Nathan跳水無限Loop，細女Camilla亦有樣學樣，仲鬼馬地推陳豪落水又父女拖實炸水，今時今日的陳豪甘願為前世情人變成深水炸彈，玩到興起大叔上身，把塑造多年的chok爆形象暫時拋諸腦後。

陳茵媺綠色比堅尼身材依然火辣

玩完浮台跳水，陳豪帶領全家好似鴨仔家族一樣游上岸，這個時候終於到三子女之母陳茵媺騷Quali來個大解放，身穿綠色比堅尼的她34D身材依然火辣，她帶住仔女走向石灘捉蟹仔，而陳豪則與其中一名外傭去取回放在沙灘上的衣物。

陳豪與陳茵媺非常注重身教，二人的真性情亦感染了三個仔女，一家人在海灘上毫無顧忌的玩樂，兄妹間非常有愛，沒有爭執與爭吵，看得出陳氏出品都愛笑愛玩，充滿正能量。

未當人父前 自爆曾是蒲精

最近陳豪跟黎耀祥兩大視帝接受由伍詠薇、林盛斌主持的邵氏兄弟出品之訪談節目《Tiger’s Talk》時，陳豪直認曾是蒲精一名，他自爆拍攝電影《晚九朝五》的年代，一星期蒲足五晚。

不過有一日突然醒覺，陳豪說：「當時感覺就好似一盞射燈照住你，突然醒覺咁樣好浪費時間，係時候為人生做返啲嘢，於是就180度轉變，自此之後冇再踏足夜場，好努力為人生拼搏。」

伍詠薇追問是否有好多女生親近你？陳豪笑言：「諗係咁諗，但真實係永遠都空手而回，講就無敵，做就無力。我係唔會飲到爛醉嘅人，主要落去跳吓舞，自己溝唔到女咪睇人溝女。我相信每個人成長都需要花段時間去認識自己，後來先知其實自己根本唔鍾意呢啲生活，只係想陪朋友，嗰時啲朋友想去就陪埋一齊去。」

陳豪卡數冚卡數 試過一年沒收入

被喻為無綫金蛋的陳豪，演藝路看來相當順暢，當模特兒時收入豐厚，又做過電影主角，不過陳豪話都有兜茂時：「我雖然冇祥仔捱得咁耐，但當我有心做演員時，電影圈又唔太吃香，開始冇嘢撈，試過一年都冇工開，完全冇收入。

唯有卡數冚卡數，差不多有成十萬卡數，但我唔會問屋企人拎錢。」後生時玩夠蒲過，先有今日愛家庭愛老婆的陳豪。

家庭改變了陳豪 結婚6年恩愛不減 阿Mo：「她和孩子讓我的人生變得完美」