雞手鴨腳煮兩味

昨日年初四開工，先和社長曹老闆與東方新地一眾同事食開年飯，食過飽飽後，我便速速回到崗位做埋手頭上的工作，再飛奔到朋友家拜年。每年新正頭到朋友家拜年，晚上都係叫吓外賣飲番兩杯就算，難得今年我叫做學識煮西餐，朋友又不介意做白老鼠，我決定煮一餐比佢哋食。在年初三的下午，我已經買定餸攞埋上朋友屋企，預備年初四晚煮一餐似有把握但又唔夠信心的菜，因為我呢班朋友唔似鍾意食西餐，不過講咗就係架啦!最終我遲了放工，朋友們餓了，我一上到朋友屋企放低件褸後便衝入廚房，我一路煮就一路比班男性朋友催，搞到我雞手鴨腳咁，其實最難係要保持所有餸菜的溫度，所以一邊煮意粉一邊炒蝦，一邊炒蝦又一邊煮蜆，加上10個人的份量，難度再升級，煮咗大槪一個鐘，終於上菜啦!好彩最終只有一個愛吃中餐的人彈我的手勢，佢就係我堂家姐啦!佢望住自己碟意粉話:「真係唔好意思，意粉乾咗啲!」個心即刻有啲酸，不過唔緊要，其他朋友話好食，廚師朋友就話:「新手算係咁啦!個蜆好好食吖!同埋個西洋菜蕃茄青瓜沙拉，味道唔錯之餘我都係第一次食呢個配搭，好新鮮吖!」我即刻開心晒!

原來煮嘢食比朋友，比煮給男友的壓力更大，不過我會再接再厲，下一餐，要煮給我的爸爸、媽媽、哥哥、姐姐等家人吃吧!

朋友話最好食嘅係香蒜炒蜆，咖哩蝦和聖子都唔錯，但飛魚子帶子白汁意粉就唔係好夠味，我下次識做啦!

朋友們都是第一次食呢個西洋菜蕃茄青瓜沙拉，還覺得美味呢 ，我超開心呀!

相識多年的好朋友，一年都係見一兩次，所以大家都玩得很開心。