今個春季要讓肌膚飲飽水

Jan 20 2015

不論冬天或者夏天，水份對我地嘅肌膚嚟講非常重要，特別係冬天呢種咁乾噪嘅天氣，我地更需要好好為肌膚補水。相信有好多朋友係投入咗社會工作之後，會發現自己嘅皮膚比以前變得無咁有彈性，肌膚經常出現缺水嘅話，再加上平日工作帶嚟嘅壓力，就會加快肌膚老化，影響肌膚彈性。

今次我地就會為大家介紹幾款保濕水同精華！

首先同大家介紹兩款質地較為爽身嘅嘅保濕化妝水

肌研極潤彈力肌立體透明質酸保濕化妝水（HK$160/ 170ml）

入面除咗有多種分子透明質酸之外，加上維他命A誘導體同膠原蛋白，有淡化細紋同緊緻肌膚嘅作用之外，仲可以提升肌膚彈性，令肌膚更加水潤同飽滿。佢質地屬弱酸性，對肌膚嘅刺激好低，而且不含香料、色素、礦物油同酒精。所以無咁易會對作敏感。

質地係透明白色嘅乳液狀，無香味，質地唔杰好易推開，只需要少少份量已經足夠整塊面使用。好適合出油比較多嘅朋友使用，而佢價錢仲好經濟添！

JOSERISTINE TIME REVERSE Rejuvenating Essence （HK$349/ 125ml）

佢入面有94.8% 修護成分酵母精華，可以加快肌膚細胞更新同埋皮膚嘅新陳代謝，令肌膚整體亮白度同緊緻度有顯著改善。加上8種氨基酸，令肌膚底層得到豐富嘅營養，有撫平細紋、淡化色斑、緊緻提升、深度補濕同煥發光澤五個功效。另外，佢入面不含酒精、香料、色素同防腐劑。

佢質地好水唔杰，拍上面有補濕功效之外仲唔會覺得笠，呢支Essence 係彩豐行可以買到，相信唔少人都聽過彩豐行賣嘅產品多數價錢比較經濟，所以呢支Essence 大大支都幾抵用!

上面為大家介紹嘅化妝水質地都比較清爽，下面會為大家介紹兩支Essence，佢地質地比教水潤，乾性皮膚可以用作Toner，用完之後照平時咁再用Essence 護膚，油性皮膚就可以直接當作Toner咁用，效果都會好好！

AOGI Gold Essence (HK$1,280/ 150ml)

呢支Gold Essence 入面加入咗活金肽，玟瑰精華同香檬果提取物，精華入面嘅微分子會導入肌膚深層滋養，有平滑肌膚同細緻毛孔嘅功效。用嘅時候會聞到陣陣玫瑰水味，聞落好舒服，用完皮膚感覺好幼滑，好滋潤。另外，佢入面有保加利亞玫瑰精華水，可以平衡賀爾蒙。

銷售點：香港中環威靈頓街26號Chic Corner 3樓

Covermark PRECIOUS BRIGHT Lotion (HK$560/ 150ml)

COVERMARK Precious Bright 系列入面加入咗珍貴嘅漢方精華，針對性咁改善肌膚嘅新陳代謝，阻止肌膚老化，同時有美白功效。 Precious Bright Lotion 入面加入咗「蘋果酸」，可以去除肌膚老化角質，同時又可以滋潤肌膚，增加肌膚嘅柔滑感。用時會聞清香花味，質地好水唔杰，少少份量已足夠滋潤整塊面嘅肌膚。佢嘅效果比上面介紹三款較為滋潤，適合極乾性肌膚嘅朋友使用。

平日大家返公司又或者出街，皮膚長時間吹著冷氣又或者暖氣都會令皮膚水份流失，咁岩化咗妝想拍下化妝水上面真係唔係好方便。所以以下會為大家介紹幾款補濕噴霧！

THERMAL SPRING WATER 温泉舒緩噴霧

La Roche-Posay溫泉水入面嘅硒元素有豐富嘅天然抗自由基，有舒緩同柔滑肌膚等等嘅特性。佢有效治理敏感或者受刺激嘅皮膚。噴上面時呢支噴霧無香味，用後肌膚唔笠，摸落仲好嫩滑。平時感覺肌膚乾躁時可將佢噴於臉上靜待2至3分鐘，然後輕拍面部。

CAUDALIE 葡萄籽活性爽膚水(HK$398/ 100ml)

佢除咗可以為肌膚補濕，仲有撫平細紋同收細毛孔功效。用之前先搖勻，再避開眼睛周圍噴於面部。做保濕前或者任何時候噴於面部，

仲有醒膚嘅功效同為妝容打底。另外，入面加入咗葡萄、橙花、玫瑰、薄荷霜、迷迭香等等，所以噴上面時會聞到好大陣橙味同薄荷味，感覺好清涼，補水效果好好，而且唔會感覺好笠。

centifolia 有機矢車菊花水（HK$139/ 200ml)

有機矢車菊嘅功效係鎮靜同舒緩肌膚嘅疲倦狀態，而且仲可以舒緩眼睛疲勞，噴上面時會聞到一陣好似蜂蜜嘅香味，乾躁肌膚噴完之後有非常好嘅效果，補水效果非常好，肌膚用後嫩滑唔笠手。另外，噴嘅時候會有陣陣清涼感覺，令人感覺好醒神。

平時可以係早上使用，噴適量嘅份量上眼睛周圍或全面後，再輕輕拍上有機矢車菊花水。除咗可以鎮靜同舒緩肌膚，仲可以係晚上卸妝後使用，有清除殘餘妝物嘅作用。

銷售點：香港銅鑼灣皇室堡1樓125號店

JOHN MASTERS ORGANICS ROSE ﹠ ALOE HYDRATING TONING MIST (HK$350)

佢入面嘅活性成分可以調理同滋養肌膚，而當中嘅玫瑰精油成分就可以促進血液循環。再加上作入面混合咗燕麥成分，可以改善肌膚因為污染而出現嘅發炎問題。另外，佢入面嘅白茶成分有豐富嘅抗氧化成分。