Hello CAMPER: 一玩愛上露營樂

Jan 10 2015

上次同大家分享左入營前要準備既物品，
唔知大家有無心動想即刻相約朋友去玩返晚？
上星期六、日我就去左一個由團體草原地圖舉辦既
露營活動「草民音樂營」，
今個星期即刻同大家分享返有幾好玩先！

今次去呢個露營都係無意中喺facebook見到有朋友share出黎，
覺得佢地都有好多活動，好似幾得意就參加左，
佢地有３日２夜、２日１夜同日營揀，而我join既係２日１夜，
不過當日去到發覺唔少人join day camp，
入去聽下音樂會、同朋友野餐煮野食同傾計，都好唔錯！

基維爾營地喺飛鵝山上，係屬於童軍總會既營地。
咁岩我去果幾日天氣非常之好，山上係大風少少，不過有太陽都好和暖。

第一日去到入口處要同工作人員做返登記，
每人都會有返一個牌以知悉別，
入面仲有營地既地圖方便參加者睇返。

（大家都見到唔少參加者真係準備充足，個backpack多野到呢…）

我登記完之後周圍行左一圈，順便睇下喺邊個營區紮營，
因為我去到既時間已經係下午，好多人已經一早紮左營，
所以最後就揀左比較偏靜同要再向山上行既營地。

一直行都見到好多唔同既帳幕，呢個真係好好好靚呀！
一個大既白色營，初時我以為係for 4-6人用，但原來係兩個人用咋。
帳篷外面同入面都怖置得好別緻，有旗子、風車、捕夢網等等，
而營內仲用左好多民族圖案既布鋪墊床舖。
呢個營後面仲有一個係半開放式既帳幕，
係for煮食、坐低傾計既地方。
對於第一次黎露營既我，真係比呢個營吸引住。
之後我亦都有同帳幕既主人傾計，好開心知道多左有關露營既事物，

亦令我好想快啲再去多次camping！

營地中間有個位置係for煮野食，
好多人一家大細黎玩，佢地煮既野食都好吸引！
仲有人煲蠟腸飯、煎pancake、烤麵包、煮芝士麵…
真係愈睇愈肚餓！原來大家都會帶好多野食上山架！

其實我去之前都喺７５９掃左好多唔同既零食，
不過最後發覺都唔多夠，零食真係好邪惡，一開始食就好快食晒！
所以下次我會再買多啲！

營地入面真係有好多唔同既活動，
有故事地攤、交換草場、導賞團等等，
可以圍埋坐喺地下同唔同既朋友傾計，
了解下佢地既故事、去旅行遇到既特別事情等等。

不過今次主打係音樂營，所以唔少人主要都係想黎聽下音樂，
有好多唔同既單位喺大台表演，大家席地而坐，氣氛好好。

到左晚上，音樂會既氣氛更加好！

而夜晚音樂會完左之後，會再有營火會，
一齊圍住營火，聽住舒服既音樂，真係好愜意。