日本集運網站推介

Dec 23 2014

今次要同大家介紹下幾個比較實用既網站，
因為我自己都經常online shopping，尤其係日本網站，
宜家兌日元仲要跌到6算，真係平到癲左！
有時遇到岩自己心水既貨品，發覺只限送國內，
有得睇無得買，都幾sad。
不過，之後就比我搵到好幾個集運網站，
從此乜都訂到返黎，仲可以call埋朋友一齊訂添！

唔知大家有無淘寶開，其實個steps都差唔多，
而且唔使驚唔識日文，大部分集運網站都有繁中顯示架。

1/ 喺集運網開account
2/ 登記完之後佢會顯示一個日本地址(連會員no.／轉送no.)同電話

3/ 喺你想訂野既網站登記做會員
(記得填返真名再填集運網既地址電話
email都要填真實既mail address
唔係就收唔到確認信架喇！)
4/ 買野 -> 付款 -> 收到確認email
5/ 集運網收到你件包裹會email通知你，
而你亦可以登入集運網睇返詳情

6/ 付運費 -> 收出貨email -> 等收貨
(只要追蹤返出單no.就可以隨時睇到件貨去到邊啦！)

第一個要介紹既係「Jshoppers」，
呢個係我最常用既集運網，
原因就係一個字－平！

佢地係用順豐速運，相信淘寶既朋友都非常熟悉，
佢地既運費比EMS或者其他運送方法平，
而且一星期內一定送到，
又可以揀直接送到屋企或者到門市自取。

不過，最近Jshoppers多人用左，
登錄訂單既速度足足要delay 9日，
即係當佢地今日收到你件貨，
要9日後先會通知你件貨到左倉，
同埋話知你運費係幾多。

直接轉送通常你比左錢之後既一個工作天就會寄出，
所以都算ok快，如果係急件當然就唔建議用佢地。

要集合捆綁就會delay 8日，夾夾埋埋都成十幾日架，
要自己衡量，想快定想平，
我自己就唔mind遲啲，所以暫時都係用Jshoppers比較多。

第二個要介紹既係「御用聞き屋」
呢個集運網相對比較少人識，
我覺得佢地既服務態度好好，
收貨通知同發貨出度都好快。

佢地既手續費都唔係太貴，
如果要重新捆綁所有唔同店舖既貨品，
甚至想佢地幫手將貨品輕量化，
都係完全唔使另外收費，
而貨品最耐可以寄存喺倉庫一個月。

呢個係我之前訂貨既email，
佢地另一個好處係會問你想以咩方式郵寄，
如果貨品唔係太大件可以以小形包裝寄就一定最平，
用船便就太慢，起碼兩星期先到，
EMS最快但就最貴。