大角嘴 街坊抵食推介

Text| Carrie

舊區之中 大角嘴 很討好，極具七八十年代風情的富多來新村同大同新村，今日仍然保留好多街坊人情味，有着不少新舊風味美食小店。雖然 大角嘴 沒有港鐵到，與奧運站及太子咫尺之距，吃得盡興後徒步去奧海城商場大買特買，渡過一個輕鬆周末。

舊區滋味行Tasty Road

不論是大角嘴長大的，還是當區豪宅新屋苑住客，都一定識去富多來商場搵食，路經此地未必會食正餐，串燒小吃是不錯之選，街坊最新推介是滋味行Tasty Food，大讚主廚老闆夠心思，價廉物美。

「期間限定」脆脆雞皮菇卷 ($18)，雞皮香脆不油膩，卷起金菇來吃，一來平衡口感，二來令賣相更見精美。

生炸雞髀($20)，下午茶時間，坐下才五分鐘，已見有四個熟客來叫生炸雞髀外賣，受歡迎程度可想而知，即叫即生炸，皮脆肉嫩完美發揮，難怪成為省招牌之作。

日式炸蟹鉗($22/4件)，唔好以為去飲先食蟹鉗，當街當巷亦可買嚟通街食，呢個價錢當然唔好期望啖啖蟹肉，但炸得香口，蟹膠夠香夠彈牙，已算夠班！

蟹味噌甲羅燒($38)，響日本各個即食海鮮市場都有食過，意想唔到香港食都係番同日本差不多價錢，惹味蟹膏混入蟹肉打隻鵪鶉蛋響面放釀番入蟹蓋度燒，份量十足，邊使搭飛機去食呀！

Tasty Road

地址：大角嘴鐵樹街40號地下富多來新村二期89號店

電話：9092 7678

一族小食 煎釀三寶($5/3件)

在Tasty Road行前半個街口轉角位，聞到好香見到長龍忍唔住望望，原來係煎釀三寶，羊群效應冇蝕底，梗會排隊去睇睇，原來$5有3件，即買！食落唔算話絕頂好味，但起碼魚蛋算彈牙，豆腐都炸得外脆內軟，呢個價錢好抵食！

一族小食

地址：大角嘴鐵樹街40號地下富多來新村二期76號店

上海包餃店

舊式小店，人情味同滋味同樣重要，去到呢間上海美食小店，待應阿姐見我生面口又拎住相機頭望望就話「靚女，響外國返嚟？我哋啲牛肉包同鍋貼好得手㗎！望吓個牌先，一定我幫你落單！」聽咗阿姐推介叫幾款，果然不錯。

鍋貼、生煎牛肉包 ($13/任選4隻)

鍋貼外皮唔厚咬開仲有熱辣辣肉汁，略嫌唔夠多蔥，但呢個價錢，好抵。

生煎牛肉包皮煎得香口，內餡略嫌肉汁少，但勝在包皮與肉餡比例啱，不會太乾。

菜肉包($5)附近街坊話係早餐下午茶首選，熱辣辣有菜有肉夠飽肚，抵過大集團的空心麵包多多聲！

上海包餃店

地址：大角嘴晏架街12A號地下

May Day Burger

說到大角嘴，大同新村應該算係地標，近年成為美食區，新登場的就有這間May Day Burger。走文青路線，賣的卻是另類漢堡包，吸睛的名字是「海南雞飯堡」，細看相片就是兩片飯餅夾住海南雞絲和酸青瓜，未能讓我花上$65，於是點了「港式醬油漢堡」，看看味道跟一般漢堡分別有多大！

原味港式醬油漢堡($33)老實，港式醬油味欠奉而且略鬆散，但勝在味道比一般漢堡少點鹹味，配生菜片亦算爽脆，加埋鮮茄口感清新，都算是美味。

德國啤酒熱狗($30)可能因為太多醬，熱狗腸又不是珍寶級，所以吃不出甚麼啤酒味，即使加了香口煮洋蔥，也吃不出風味，建議減1/3醬，應該味道更佳。

南洋咖啡($18)很少南洋咖啡會打泡，但味道不錯，雖然加了煉奶也不算太甜，連埋可愛杯子，都是抵飲之選。

May Day Burger

地址：大角嘴埃華街117地下B店

電話：5437 1969

英記油渣麵

對於大角嘴原居民來說，不管老中青，英記油渣麵都是集體回憶，開業幾十年數度搬舖，都選址大角嘴，已由第二代接手，亦不減那份街坊人情味，更重要係對油渣麵的一份專注，賣幾十年都係得油渣麵賣，支持到咁大間舖仲要中午休息，味道絕對係信得過！

油渣麵($22/細)今天的油渣當然不是當年的榨豬油「副產品」，幼條腩肉看得出仍有層次，炸得香口回復當年的風采，加入冬菇和冬菜，麵條不像舊年代的稔身，換上粗身爽口的迎合新時代市場，配嗜辣的緊記要落他們自家製辣油，湯底很清，吃完也不覺口渴。

油菜($16)這年代重視健康，來吃肥腩油渣怎不可叫碟菜平衡一下，可選蠔油或豉油，比起一般麵店的大碟，而且菜亦脆綠沒渣，聽落以為很貴，但其實是超值。

英記油渣麵

地址：大角嘴菩提街4號地下

電話：2390 7397

香麥屋三色糯米滋($3/件)

喜歡小麵包店的前舖後工場，有一份看得出的新鮮，街坊門會看準出爐時間來幫趁，不過香麥屋除了有麵包抵食外，街坊推介是他們的糯米滋，BB拳頭咁大才賣$3，而且仲有芒果、豆沙和奶黃三款口味，比起通街都有，真假難分的長洲糯米滋，這裏的起碼童叟無欺，貨真價實。

香麥屋

地址：大角嘴大角嘴道115號4號舖

電話：2333 2383

延伸閱讀：

▲荃灣掃街 ！ 女仔都BUY平靚正小食

▲葵涌廣場新食力