周潤發（發哥）獨家回應新冠肺炎抗疫政策看法 關注勞動階層心繫醫護
發哥周潤發一向親民和善，不少觀眾更以「民選藝人特首」來形容他。熱愛行山的發哥，在新冠肺炎疫情下依然風雨不改，早前日就有記者發現他避開人潮凌晨5時許出門，到東壩行山。記者更訪問到發哥對香港政府「全日禁堂食」防疫政策的看法，發哥就緊皺眉頭，更狠批措施不當，心痛一班勞動階層市民。
原文刊於：東方新地｜編輯：venus.y
發哥周潤發狠批防疫政策
發哥周潤發非常遵守生活要有社交距離的防痠守則，日前凌晨5點就出門口，天未光條街都未有人，他揸車由九龍塘去太子接一名女友人，到達北潭涌郊野公園後泊好車，再轉新界的士去東壩，已65歲的發哥花了約一個多小時，由東壩跑回北潭涌，全程十公里，戴住口罩依然面不改容，並協助女友人跑後鬆筋。
一星期跑足七日 享受運動抗疫
這日發哥心情甚佳，笑笑口對記者說：「我日日都做運動，朝朝都去，不過跑完就返屋企唔再出街，間中跑完都會買啲嘢返屋企食，盡量少出去囉！依家疫情咁，盡量戴口罩呀！勤洗手同注意衞生，返到屋企所有消毒程序都要做足晒。呢個疾病主要襲擊我哋心肺，最緊要係做多啲帶氧活動，喺屋企都要慢慢跑吓，我日日都要跑，比之前再fit啲係要嘅，到其時冇好嘅身體點去拍戲呀？不過唔好畀自己太大壓力，我喺東壩出嚟都係行吓跑吓，好好享受做運動。」發哥表示一星期跑足七日，每晚9點就上床休息，生活非常有規律。
回應張建宗：「我買個飯盒跑完喺郊野公園食埋先走囉！」
發哥在疫情下只能堅持跑山，至於出街食飯同買餸都受到影響，他說：「食肆得兩個人可以一齊坐都唔係多啦，好多嘢都避無可避，咁你困喺屋企都會抑鬱㗎啦！盡量去啲人少嘅地方囉！去郊野地方囉！咁張建宗都叫我哋食嘢要去郊野公園食㗎嘛！我買個飯盒跑完喺郊野公園食埋先走囉！」
體諒醫護工作艱辛自嘲蟻民無權提出意見
看來發哥對政府的防疫措施甚有意見，對於早前曾實施全日禁堂食，他反應更大：「梗係慘啦！你睇嗰兩日所有勞動階層喺街度好似乞兒咁，政府話唔好意思，但諗時有冇諗過市民？過咗就算喇！疫情始終會過，大家都係要見步行步，小心為上，有傳等到11月就有疫苗嘛！我好期待呀！頂埋呢個幾月啦！(記者追問發哥點睇醫療床位唔夠，之前發生掉亂測試樣本？)掉亂都係一單啫！班醫護都好辛苦啦大佬，醫療中心崩潰咁滯，日日百幾宗呀！」深知民間疾苦，無時無刻發放正能量的發哥，不愧為我們心中的民間特首。
「仲慘過大蕭條」、慨嘆香港「一鑊清晒袋」
周潤發發哥雖然已是荷李活巨星級，但他心繫香港，對於香港遇到史無前例的經濟及生活困境，他表現得極之心痛：「唔好講我哋呢行受到咩影響，最前線做餐飲業嗰啲已經死晒，全香港都死晒，仲慘過大蕭條，80年代經濟起飛儲埋儲埋嗰啲都一鑊清晒袋。我哋一定要打贏佢，唔怕！香港係福地嚟嘅！一定會過到個疫情，大家畀啲心機，畀啲忍耐。樂觀啲，咬實牙關，見步行步啦！怨天怨人都冇用，人係要靠自己，總之盡量做好自己，一定要做多啲運動，要有強健身體頂住呀！最緊要個個都身體健康。」雖然對防疫政策有微言，但發哥未有提出任何建議，他說：「呢啲政策嘅嘢等政府自己諗喇！我哋只係一般蟻民，做到啲咩啫？我都係聽指令咋嘛！佢叫我做咩我咪做咩囉！」發哥不慍不火的回應卻是言之有物。
身家超過十億的發哥，一直與民同行，他完全感受到市民因疫情帶來的影響與困苦，可惜愛莫能助，只能發放大量的正能量去勉勵大家，如發哥所講，大家都要鍛鍊好身體，香港人自求多福，頂住呀！
