利尿去水腫消暑湯推介 營養師Annie Lee分享冬瓜、老黃瓜湯食譜

撰文：營養師Annie Lee ｜編輯：venus.y

利尿去水腫消暑湯 冬瓜、老黃瓜湯食譜推介

利尿去水腫消暑湯湯水 1. 老黃瓜粟米鬚湯

逢星期日, 我負責煮飯俾全家食, 但天氣熱, 無咩胃口, 都唔知煮咩好. 見到街市有好多夏天蔬果, 索性煮個老黃瓜粟米鬚湯消暑. 今次只有四樣食材: 老黃瓜, 粟米仔連鬚, 豆腐, 蜆肉 (因為工人姐姐唔食豬肉, 所以用豆腐同蜆肉代肉, 一樣清甜鮮味).

工人姐姐未煲過呢個湯, 見到啲食材, 好多疑問: 老黃瓜駛唔駛去皮? (唔駛).

粟米頭髮係咪唔要? (唔係, 要一齊落) 吓? 呢啲係粟米頭髮, 點可以用嚟煲湯咖?

呢啲粟米頭髮, 其實不知幾有益! 粟米鬚可以加肉煲湯, 或煲水當粟米鬚茶, 都有助消暑, 有利尿, 祛濕的作用.

煲湯可以加冬瓜, 薏米, 赤小豆, 或好似我今次加老黃瓜, 連豆腐, 蜆肉, 幾乎一滴油都無. 清清甜, 我自己一個人都飲咗兩大湯碗連湯渣, 當晚餐, 飽肚又健康.

利尿去水腫消暑湯湯水2.消暑蜆肉冬瓜湯

簡單材料包括兩大片冬瓜，蜆肉，生熟薏米和蜜棗。因為工人姐姐不吃豬肉，所以改用蜆肉，更鮮甜。

中醫角度，冬瓜具有利水袪濕，清熱解毒，除煩止渴的作用。

而從營養學角度，冬瓜的確是減肥消暑的恩物。它熱量極低，根據食物安全中心顯示 ，每3安士只有約8卡路里, 又含有豐富纖維和鉀質，飽肚之餘亦有助利尿去水腫。
不過要提提，其實好多人鍾意食嘅冬瓜粒湯飯，並非人人啱食。因為邊食飯邊飲湯會減少胃酸分泌，對於消化力較差話有胃酸倒流的人士，其實最好飲湯和食飯分開。

利尿去水腫消暑湯湯水3. 清補涼冬瓜湯

如果怕煩, 可以直接去藥材舖買包現成的清補涼湯包, 再加片冬瓜和瘦肉;
又或者, 其實自己執都好簡單.
清補涼的用料大致包括: 薏米、淮山、蓮子、北沙參、玉竹、百合、茨實.
中醫角度，清補涼這醫食同療配方有養陰生津，健脾開胃​的功效。
而從營養學角度，所有食材都屬低脂低熱量, 而且亦含有多種微量營養, 包括鉀質等, 有助消暑去水腫. 不過所有食材都含有澱粉質, 如果連渣吃, 需減少正餐粉麵飯的澱粉質量, 或索性連渣吃一碗, 比吃白飯更多營養更健康~