馬國明暖心回應「安心偷食」 指擔心黃心穎

撰文：Cyan｜圖片來源：instagram、電視截圖、facebook

馬國明大方得體回應「安心偷食」

馬國明今日開工前接受了媒體的訪問，大方回應「安心偷食」事件，他指：「呢件事我知道之後，好快已經冇咗嬲嘅感覺，我係好平靜，同埋我係好快變成擔心，好擔心呢件事牽涉入面嘅所有人，任何一個受到傷害我都係唔希望嘅。」

真男人 繼續為黃心穎說話「佢仲好年輕 希望大家俾啲空間佢」

「我唯一可以係代表佢（黃心穎）講少少嘢，其實我都知佢都知自己做錯咗，我亦都知道佢係好想出嚟同大家講，但公司好似暫時驚佢嘅情緒唔係好穩定驚佢講錯嘢，所以冇安排到佢出嚟同大家講，咁…我知佢啱啱出咗IG係佢講咗嘅嘢，咁佢都講咗啦，我只可以話佢仲係好年輕嘅，咁未來仲有好多路要面對好多路要行，我希望大家會俾啲空間佢。」

「絕種好男人」馬明繼續專心工作

「至於我呢大家就唔需要擔心我，嚟嘅呢我都會好專心我自己嘅工作，我會繼續拍好我嘅戲，其實我而家仲係開緊工嘅，我唔希望影響到戲嘅進度。」

「除咗安仔太太外，冇人有資格發言」

馬國明又指「安仔自己都講咗嘢，咁我唔會發表任何意見，因為我覺得呢個世界冇人有資格發言嘅，除咗安仔太太之外，其實大家都係冇資格發言嘅。所以我希望呢件事盡快可以平息咗…就算啦。」

好仔馬國明最著緊家人

「希望大家不要放大我媽媽嘅說話，亦唔會就佢講過嘅任何一句說話回應，我只係希望大家唔好嚇說我屋企人。」

最後馬明再次表示自己會專心工作，不希望事件影響更多人：「嚟緊日子會好專心做自己嘅嘢，希望大家高抬貴手，唔好令到呢件事再發酵，令到更多人受傷害。」

馬國明回應傳媒 黃心穎社交網撰道歉文

發生「安心偷食」後黃心穎昨日一直沒有回應，終於剛剛她在ig上發布了帖文指：

「對不起，我做錯了。是我做了非常錯誤、難以令人原諒的事，感到十分羞愧、歉疚。我在此向所有受事件影響及受到傷害的人誠心由衷道歉。犯下如此嚴重的過錯，我無法面對自己，也不知道怎樣去面對家人、馬明、朋友、公司、同事…… 不敢奢求大家的原諒，只懇求大家能給予所有受牽連的人一點空間。我認真反省自己的過失, 接受懲罰承擔後果。再一次『對不起大家』」

不過有不少網民卻未有接受她的道歉文，亦有網民認為她應親身現身向公眾道歉。