雙料亞軍鄧卓殷轉數快 全場爆笑！盤點歷屆9位索爆港姐亞軍 絕對唔比冠軍弱㗎！

撰文：東方新地｜圖片：新傳媒、Instagram﹑東方新地、Instagram、YouTube |編輯：heitung＠central

｜鄧卓殷

【港姐2018】雙料亞軍！

現年23歲的20號鄧卓殷(Amber)除了奪得亞軍，仲攞埋最上鏡小姐，成雙料港姐。Amber畢業於港大建築系，現職是是一名見習建築師。在學期間，她曾在由亞洲權威雜誌Perspective舉辦嘅年度設計頒獎盛事A&D TROPHY AWARD獲獎，同時學咗十幾年中國舞，真係才貌雙全。

決賽當晚，從小習舞的Amber表演強項中國舞，難怪獲田蕊妮、朱千雪及蔡思貝等星級評判激讚。

Amber笑容甜美，比賽當晚表現自然又有自信，獲亞軍也相當合理！

問答環節轉數快 全場爆笑

亞軍鄧卓殷獲讚泳裝環節騷急才，引得全場歡笑及拍掌。農夫就話Do姐成日叫佢哋做「垃圾」，如果Amber要幫農夫改過個新名，會改做咩呢？

Amber臨場就想到為農夫改新名「播種的機」，意思係可以更有效率咁將Hip Pop嘅種子傳播出去啊！農夫同Do姐當然有搞笑寸吓佢，但Amber全程都保持笑容，相當淡定得體！

問答妙趣橫生，搞到台下評判都笑到收唔到聲！

然後農夫又出招！再問Amber如果佢要幫Do姐改個新外號，又會係咩呢？

Amber就依然笑住回答，Do姐係香港女性嘅典範，自然係「香港一姐」啦！農夫隨即就話，即係Do姐之後可以去警務署做啦！Amber轉數好快咁接話，Do姐霸氣仲勁過警務署署長啊！

咁醒目，難怪譚俊彥都點名話覺得Amber答得最好！

賽後鄧卓殷就謙認賽前做足功課，有找過農夫的背景資料。

黑馬跑出 鄧卓殷參選之路

鄧卓殷身形「的骰」，身高只有5呎3吋，三圍31.5、22、33，但勝在夠哂甜美可愛，小編由首輪面試開始已經開始留意佢！

Amber喺首輪面試時身穿黑色長裙，較其他參加者低調，不過出眾樣貌當然唔會被忽視！

去到次輪面試，Amber換上一襲橙色露肩短裙，加一對長長耳環，配埋本身招牌甜美笑容，即時Sharp醒唔少！

同冠軍陳曉華Hera係好朋友？

次輪面試時，Amber更與Hera一同現身，原來兩位靚女喺第一輪面試後已經成為好朋友，依家一個冠軍一個亞軍，都算係皆大歡喜啊！

雖然Amber身材比其他佳麗瘦小，但睇腹肌都睇得出都有操過嚟！

港大建築系畢業

Amber畢業於香港大學建築學系，志向係成為一位有影響力的人，透過參與社會服務同埋利用自身嘅專業知識去連繫唔同人。真係又靚又叻又心地好！

動靜皆宜 幾跳得㗎！

睇Amber斯斯文文的外表，以為佢都係比較文靜，但睇佢喺決賽嘅精彩中國舞表演，先知佢咁動靜皆宜，讀大學時亦有參加開跳舞表演！平時Amber嘅嗜好係跳舞、唱歌、觀賞電影及電視劇、畫畫、設計同健身。

長情加分！上《後生仔傾吓計》自爆初戀係現任男友

同初戀對象拍了6年的鄧卓殷（Amber），第一次拖手仔經歷同馮盈盈一樣，在戲院發生，當時還未開始拍拖，男方就大膽拖住卓殷的手，卓殷即時嚇到縮咗手，不過幸好冇阻礙呢段戀情的開始。

周遊列國

自認比較男仔頭的Amber，個性似乎都係較好動，見到佢有唔少旅行照，周遊列國呢！

Amber以前啲造型都幾百變喎！佢又唔怕同大家分享舊照，抵讚！

｜劉穎鏇

現年只得21歲的劉穎鏇於1997年出生，喺2016年港姐競選奪取「亞軍」、「最上鏡小姐」及「現場最受歡迎佳麗獎」三個獎項，擁有青春無敵的甜美外貌加上174cm模特兒身材，兼有豐滿上圍，外在條件無得輸！當年都有唔少觀眾話佢比馮盈盈更值得攞冠軍！

做完是非精再拍劇

劉穎鏇選港姐後加入TVB，雖然暫時未有突出表現，不過加入咗《學是學非》吸收主持經驗，作為是非精，肯定會儲到一定人氣！

劉穎鏇早前第一次參演新劇《兄弟》，劇中飾演女拳手，打得拳拳到肉，令人期待！

｜王卓淇

可能大家都唔係好記得，王卓淇係2014年香港小姐亞軍，當年冠軍係邵珮詩、季軍則為何艷娟。就快27歲的王卓淇近年開始多咗參演劇集，不時都大晒無敵長腿。佢自己本身喺社交網站都不時分享靚相派福利，男網民們當然無任歡迎！

長腿成標記

招牌長腿又白又滑，已成王卓淇的標記！

王卓淇 劇集初嚐性感

之前喺《果欄中的江湖大嫂》其中一集中，見到王卓淇以泳裝現身，除咗不停擺甫士外，仲向住鏡頭撒嬌，性感之中帶點可愛！然後王卓淇又大晒小蠻腰，一個字，正！

美女學徒一員

王卓淇係新一輯《美女廚房》「美女學徒」之一，話晒出名有對修長美腿，制服短裙仔上陣自然非常吸睛！王卓淇以前留有一把長髮，不過最近就改為中短長度的啡金頭髮，加埋副圓框眼鏡，成個日本妹咁，kawaii！

｜何依婷

2017年香港小姐冠軍由雷莊兒奪得，不過當時小編就比較喜歡亞軍何依婷！有齊天使面孔，加埋迷死人笑容，有唔少網民都話唔明白點解佢去年會失落冠軍寶座，似乎都為佢輸咗俾雷莊兒而感到不值！

校花look迷死人

何依婷之前喺兒童節目《Think Big Family》中，著住校服扮學生妹，紅色外套灰裙子，又靚又pure！何依婷無論輕輕淺笑或哈哈大笑都係咁可愛迷人，仙氣隔住個mon都感覺到，難怪網民都不禁大讚佢絕對係校花！點解小編當年啲同學……

何依婷身材都係比較纖瘦，唔算話有豐滿上圍，不過勝在夠平均又皮膚白滑，甜爆靚樣搭夠！

｜黃心穎

2012年港姐亞軍黃心穎，即係依家大家好熟悉的心穎BB，選港姐後加入TVB後事業可謂平步青雲，現為大台力捧花旦之一！

近年有唔少人睇番轉頭，都話其實2012年呢屆港姐真係超高質，除了現時大受歡迎的小花黃心穎及朱千雪外，仲有「靚湯」湯洛雯、身材出眾的林泳淘、陳潔玲，以及袁偉豪前女友岑杏賢等。

黃心穎加入TVB後成為《學是學非》「是非精」之一，之後又有唔少參演劇集的機會，形象愈來愈入屋，演藝事業愈見出色！

熱情如火緋聞多多

青春無敵的黃心穎有樣有身材有學歷，熱情如火，唔好話觀眾或網民被佢迷得一陣陣，同佢合作過的男藝人都頂唔住！雖然緋聞多多，不過都無損心穎BB的魅力！

男神私有化

連被稱為「無綫筍盤」的男神馬國明，都被心穎BB私有化！

現時熱播的《宮心計2深宮計》，亦有心穎BB份～

黃心穎之後喺新劇《丫鬟大聯盟》更首度擔正女一！

｜蔡思貝

現年27歲的蔡思貝曾到紐西蘭及德國留學，在2013年就讀德國海德堡大學民族學期間，趁暑假返港參選港姐，以5萬觀眾投票輸畀同屆的陳凱琳，屈居亞軍，而該屆季軍是劉佩玥。最終蔡思貝決定放棄學業簽約TVB，開始入行拍劇。

思貝 達哥分不清

蔡思貝早年留短髮，先後被指似陳煒、梅艷芳，木村拓哉，又或者係網絡紅人重「達哥」，佢話被指似樣撞樣唔緊要，但最介意係網民喺佢專頁叫佢做「蔡思達」，甚至直接叫佢做「達哥」，佢認為：「我叫蔡思貝，就一世都係蔡思貝，而唔係其他名！」

拍劇負皮如潮

由於唔少資深花旦離巢，蔡思貝初出道就被無綫力捧，先後喺多套劇集中亮相，可惜其演技幼嫩得很，講對白時又被指「尖聲」、「煩膠」等，負皮史無前例地多。

《踩過界》「癲姐」獲讚

後來蔡思貝等到演藝生涯中最重要的角色，在《踩過界》中飾演師爺「癲姐」，犧牲靚樣扮哨牙，演技自然流露，加上角色設定討好，終於有人讚！

蔡思貝亦憑「癲姐」呢個角色，在今年初台慶奪得「最受歡迎女角色獎」，一吐烏氣！

離奇變靚啲

唔知係咪事業漸見順利，蔡思貝近年連個樣都唔同埋，留番較長頭髮女人味漸濃，加上本來身材就有睇頭，唔少網民都讚佢索咗好多，已經少咗人笑佢似男人或者達哥！

｜ 張秀文

現年30歲的張秀文係TVB咪神就無人不知，但大家仲記唔記得佢係2010年港姐亞軍？當年冠軍陳庭欣、季軍莊思明，三人現時都喺大台發展中。

一代「咪神」誕生

張秀文都加入大台一段日子，雖然唔算有咩代表作，不過勝在肯搏肯露，無論係出席活動、遊戲節目、做主持還是拍劇，都例必谷盡其34D導彈上圍，自此成為一代「咪神」！

張秀文近年都多咗機會拍劇，亦因肯露body而獲王晶導演賞識，有份演出《冒險王衛斯理》系列，角色係余文樂表妹，同樣係負責騷身材的！

｜龐卓欣

2015年一屆港姐，雖然幾乎係「十優港姐」麥明詩由頭帶到尾，但當時仲有一位靚女同佢勢均力敵，就係最後的亞軍得主龐卓欣！同樣係名校出身、外國留學、家底豐厚，「既生瑜 何生亮」所以當年不時傳出佢同麥明詩不和的傳聞！

唔憂做唔簽無綫

2015年選完港姐的龐卓欣，奪亞軍後冇簽約無綫，反而專注發展自己的事業，一邊教唱歌、一邊拍片做KOL。本身有家底，加埋富三代男友Solomon的無限支持，真係事業愛情兩得意。

導彈胸大解放

龐卓欣本來就係身材有料之人，無大台制肘更加係鍾意著乜都得，早前佢同男友去美國參加音樂節，著住件白色喱士tube top晒火辣身材，4吋事業線一覽無遺！

音樂節片段中，龐卓欣不時跟隨音樂節拍扭動小蠻腰，一對導彈胸跟住擺動，真係睇到網民眼都凸埋！

既然有索爆身材，龐卓欣一啲都唔孤寒，不時都會喺社交網站分享性感相片，仲要唔噴血唔post，勁吸睛！

｜張曼玉

講到成就最傑出的港姐亞軍，點可以唔提張曼玉 – 1983年港姐亞軍兼最上鏡小姐？當年冠軍和季軍分別為楊雪儀、李月芙。相中可見19歲的張曼玉仲有少少baby fat，一把長黑髮夠晒鄰家女孩感覺，一件頭泳衣look好迷人！

張曼玉多年來拍過無數經典電影，更曾五奪金像獎最佳女主角，著實係香港最出色女演員之一！

張曼玉雖已年屆53，近年都較少公開露面，不過依然風韻猶存~