跳高女神楊文蔚由劏房逆轉入名校！自家品牌Aim Higher Club推聯名單品

Jul 25 2023

智慧女生．獨家專訪︳花了6年時間，香港跳高女神楊文蔚（Cecilia）由1.7米進步到1.81米，達成1.88米的跳高成績，多年的無間斷的練習換來一身傷患，只因她認定跳高是「一分耕耘一分收穫」，為了達至1.9米，甚至奧運入場券的2米，雖然受傷患困擾而暫停練習，但 Cecilia 從未想過放棄跳得更高的機會，「我會盡全力睇自己可以跳到幾高，因為有突破就已經係贏咗自己」！

落入凡間的跳高女神楊文蔚童年住劏房、做「街童」

楊文蔚並非天生人生勝利組，擁有今日的成就全憑堅毅個性，「因為爸爸、媽媽離婚，我同細佬就跟住嫲嫲生活，後來嫲嫲身體唔好，我哋就去住劏房。」女神就像被打落凡間的天使，沒有富裕的成長背景，面對不一樣的童年經歷，不但沒有因而自卑，反倒造就她堅毅獨立的個性，「讀中學時都要幫手做埋家務，同時又要溫書，轉咗學校仲要勤力追成績。」不服輸的上進個性，令 Cecilia 在學業、運動上更加倍努力，「細個成日同自己講要爭氣啲，做好啲，好有好勝心。成績追唔到，咪出去補習，一係唔補，一補就要揀最好，我為咗去專科補習，開IG Shop 賺錢幫補補習費。」有了確切目標，啟動潛藏於楊文蔚內心的好勝動力。

從小學開始，楊文蔚便愛到公園遊玩，愛在公園跑跑跳跳，跑得快，跳得高，但沒有正統的訓練，雖有天賦但未能發揮。「小學三年級就加入田徑校隊，開始參加短跑比賽，但學校無專業嘅教練，初初比賽成日贏，但對手有專業正統訓練，到咗小學五年級，比賽次次輸，搞到我無心機再跑。」從小愛流連公園的Cecilia，開始遊蕩的「街童」生活，在牆上塗鴉、亂跑亂跳，「到咗升中一嘅暑假，我喺公園識咗一班打籃球、打排球嘅人，開始接觸排球呢個運動。」初中時，愛上排球的 Cecilia 加入校隊，強勁的彈跳力也因而被人關注。

為追趕同學英文能力「簿仔」筆錄用9個月跟上水平

跳高運動成績矚目，楊文蔚被傳統名校拔萃女書院招攬，由一般「中中」（中文中學）轉到「英中」，未能適應也是意料中事，「以為我喺舊中學成績幾好，運動又叻，但去到女拔，你身邊所有人都係叻，唔係運動叻就係成績好，入到去就變成『普通人』，幾叻都係『nothing』。」

Cecilia 謂同學們都只愛說英語，對於出身於「中中」的她，初初也難以融入同學圈子，但性格堅毅、不愛放棄的她，靠一本簿仔，用上9個月時間提升英語水平，「我都知自己英文唔好，同學個個都講英文，頭幾個月我連assembly 講乜都唔知，惟有硬住頭皮去學。我專登搵咗本簿仔，將自己唔識嘅英文記低，寫低字義，再用中文拼音拼番個字。」同學們都對她的「英文」簿仔相當好奇，不能理解為何會以古怪的「中式拼音」拼字，「最緊要學得識，人人方法唔同啫。」如此辛苦，當初有否想過放棄？「從來沒有諗過放棄，不過都有一啲後悔。」相信在堅毅的楊文蔚字典中，應該沒有「放棄」這兩個字。

自我要求高．曾連跳100次連教練都不敢打擾

自言性格較為內向沉默的 Cecilia，放棄排球投身跳高運動也因性格驅使，「由細到大成日畀人鬧，搞到我都唔多講嘢同成日『黑面』，不過其實我唔係無禮貌，只係我唔識表達自己。加入排球隊後，我會因為自己或者隊友打得唔好而好嬲，之後發現自己彈跳力好，原來可以去玩跳高，無師自通去參加跳高比賽，仲攞到冠軍。」一次陸運會，誤打誤撞加入跳高校隊，並認識現在的教練，陪伴她高低起跌，就如親人般了解楊文蔚的真實個性，「我係一個一想做就要做到最好嘅人，試過因為想再跳高啲，全日不斷練習，跳咗超過一百次。」在旁的教練雖知過度練習會有反效果，但眼前的女孩子個性頑強，只默默地走到一旁，等待 Cecilia 練習到最後。

機會是留給有準備的人，自從有了奧運這個目標，練習就成為生命中的最重要部分，「基本上除咗受傷，我會不斷練習，因為跳高係個有付出就有回報嘅運動，要進步就只有不斷練。」奪獎牌無數，哪個最難忘？「其實我仲未退役係因為我覺得而家攞嘅獎唔夠，不過要數最難忘、最有代性嘅比賽，應該係2017年亞洲田徑錦標賽嘅銀牌。嗰日比賽橫風橫雨，全部人嘅成績都唔太好，但我幾有信心，因為我成日諗住，比賽都有機會落雨，應該要落雨都 keep 住練習，所以我係有 ready，終於有機會實戰。」天氣、傷患都不阻 Cecilia「贏」的決心。

抗壓源於調整心理：「要活在當下」

運動員最大的目標，非別人，是自己，要進步先要贏到自己保持的成績，「以前我或者其他人都對自己有好大期望，諗好多、定好多目標，成日擔心又會埋怨自己，壓力真係好大。但而家我發現原來『以前』、『未來』都唔係自己可以控制，只有眼前嘅嘢你可以掌握到，不如好好過眼前生活，活在當下，唔好再想未來或太遠嘅嘢，有目標但唔好太過著緊，專注做好眼前嘅目標，唔止壓力無咁大，整個人都會更積極有動力。」走過千錘百鍊，歷經大大小小不同比賽的 Cecilia，認為壓力源於心態，懂得調整心態，自然壓力大大減少。

透過文字表達情感與基層分享成長經歷

曾多次提及熱愛中國文學的楊文蔚，讀此科的初心為了「講中文」，「入了DGS（拔萃女書院），同學老師個個講英文，唯一有機會講中文嘅，就係中國文學堂，所以就算全校只有4個人就讀，我都決心要揀呢科。」本為「講中文」，怎料此科著重寫作，「第一堂老師就話揀得呢科一定好鍾意寫作，我完全無呢個概念。」寫作需要情感，埋藏在心內的情感就由此時躍然筆上，「由嗰時開始，我就識得用文字去表達自己情感，將自己細時唔識用語言去表達嘅感情，一次過抒發晒出嚟，再次感受一下以往嘅『自己』。」現在的楊文蔚仍愛用文字表達自己，更擔當專欄作家鼓勵基層小朋友勇敢追夢，大膽前行。

憑著過人的運動潛能，由基層變為「跳高女神」，從低谷走到順境，Cecilia 期望將這份正能量帶給新一代，「嚟緊我好想同多啲年輕新一代分享我嘅故事，以前我唔知自己經歷可以感染人，但收到唔少留言，話我喺社交平台分享嘅練習片，可以帶動佢哋更積極做運動，又陪佢地走過唔開心嘅日子，我先知，原來自己咁有力量。」正受傷患影響的楊文蔚，正好利用這段時間去做分享會、慈善探訪，「時間許可我都想多啲跟慈善機構合作，去探訪低收入家庭，或者同初接觸運動嘅小朋友傾吓計；又會去中學同青少年分享下，乜都傾乜都講，我好想多啲同中學生聯繫。」Cecilia 剛創立自己品牌，並定下「平靜時間」計劃，推廣「me time」，希望女生們透過香薰與水晶頌缽，多點聆聽自己，好好放鬆。

女神最大障礙：「好怕同人傾計Dead Air」

現陼段愛情、事業皆得意，有亮麗的外表與成績，惟女神也有鮮為人知的弱點，「我係有啲社交障礙，好怕同人溝通，最驚就係同人傾計會dead air，唔知同佢講乜好，又怕人哋唔鍾意我講嘅嘢，去到 event 我都只會同啱channel 嘅人講嘢。其實社交障礙應該都係我當初揀跳高唔揀排球嘅其中一個原因。」哪些人跟女神「啱channel」？「雖然我唔鍾意講嘢同怕講嘢，但我私底下係乜都笑，係個無厘頭嘅人，所以我鍾意同同樣係無厘頭嘅人傾計，我會好放鬆，會願意同佢哋交心。」女神也有貼地一面，要打開話匣子，或許要先學一、兩個冷笑話。

「我要成為香港第一個跳過1.9M的女生」

大學時以為當4年全職運動員，畢業後就要為生計要放棄運動，但亮麗的成績令Cecilia 的收入足以應付生活，自此她就未有想過退役，「其實唔退役另一個原因係，我覺得自己現時嘅成績仲未夠好，我用咗6年時間由1.8m跳到1.88m，希望快啲可以突破1.9m！」跳高女神的終極目標是2024年的法國奧運，期望楊文蔚能躍到奧運田徑場上吧！

Aim Higher Club聯名單品銅鑼灣HER設期間限定店！

楊文蔚的自家品牌Aim Higher Club最近更和本地藝術家Peep合作，推出了一系列的聯名單品，並於銅鑼灣HER開設了期間限定店。產品融合女性柔美和運動元素，將「Strong and Beautiful」概念融入其中，即日起至8月31日於HER店內，除了首發AHC X Peep聯名產品外，還有互動藝術牆和充滿激勵句子的試身室，以傳達每一位女生也可以「Strong and Beautifuf」的信息。另外，還推出了兩款限定主題特飲，充滿AHC藍天白雲的氣息！