欣宜御用飄眉師擁40人團隊、飄眉過萬條！憑一信念學藝：唔做點知自己唔得？

Sep 2 2022

智慧女生．獨家專訪欣宜御用飄眉師︳讀書只是人生其中一個關卡，讀書的那道門打不開，那就打開另一道吧，或又有別的美麗風景。「讀書唔成」好像是學習一些「搵食」技能的最強動力，現時擁有5間專業美容店的星級半永久化妝師Hebe，正正就是「讀書唔成，咪學門手藝」的人辦。8年前勇敢入行，憑住努力與勞力，至今成為不少明星的御用飄眉師，欣宜，小儀、連詩雅、雨僑的美眉都出自Hebe之手，就連最美千金何超蓮也是客戶，「我由當年學飄眉開始，基本上都無乜停過，每日都最少飄幾條眉，數數吓，都應該有過萬條。」要成功不靠父幹，而是真真正正靠苦幹。

欣宜御用飄眉師︳飄眉從「讀書唔成」開始

老一輩抱著「讀書唔係唯一出路，但肯定畀我哋更好嘅路」，但做人並非只得一條路，讀書不成，難道就一事無成？學習一門技能也許是大部分自認為「讀書唔成」年輕人最好的出路。現在的年輕人會做slasher，但10年前的男生會去學電腦修車，女生就主攻美容行業。年輕的Hebe深知自己不是讀書料子，一畢業就加入零售行業，及後認識現時的另一半，20多歲就膽粗粗學人創業賣Bra，「自己都知自己讀書唔成，畢業後就去做零售業，之後識到依家個老公，嗰時仲係男朋友，咁啱佢哥哥係做日本胸圍生意，我見貨品質素好好，但香港竟然無人識得入貨去賣，而自己可以輕易攞到貨源，就膽粗粗試下創業開鋪。」

讀書唔成有乜所謂，最緊要知道自己定位，肯學肯努力，都會成功。

成功的生意商人，都說要創業成功，錢重要，膽量更緊要。Hebe首次創業賣Bra雖未致富，但短短時間已有3間分店，建立一個小小團隊。「賣Bra生意上咗軌道，我就想學吓嘢，做一啲自己想做嘅事。」女生都愛美貪靚，Hebe也是尋常女生，當然不會例外，「我好鍾意化妝扮靚，8年前與老公去聖誕Party認識了位新朋友，得知有飄眉這個行業，既有商機，我又有興趣，就二話不說問吓詳情，先知原來台灣先有得學。」賣Bra做老闆，賺取的不止金錢，也有零售與服務行業上的經驗，為日後做飄眉及美容生意埋下順風之路。

一個信念赴台學飄眉．成就今日美容事業

無論是創業還是學飄眉，都是機緣，但也要懂得把握機遇，「出發前無諗過自己會唔會成功，只係諗住『時間唔等人』，想做就去做；同埋你唔做過點知自己得唔得，唔做就一定唔得！所以嗰時一想去就即刻Google台灣飄眉學校，發現原來只係得幾間，咁就揀最多人search個間，一執好行李，唔夠3日就同媽媽一齊出發去台灣。」別人看來的「衝動」，對於Hebe來說是個機遇，有齊「決心、天分、行動力」，識得捉緊這個機會，就成就了這個星級飄眉師。

時間機會都唔等人，錯過就返唔到轉頭，試咗先，唔試，你點知自己得唔得？

於台灣學成歸來並非即時上手「開工」，始終飄眉屬一門熟能生巧的手藝，還要有先生性因素：天資與美學感，Hebe就用了一整年時間去天天飄、天天練習，「嗰時返到香港覺得飄眉好適合自己，就日日係咁練習，所有屋企人、好朋友都係練習對象，老公、細佬都唔放過。」Hebe自言今日的成功，全因背後有家人的無限量支持與體諒，最強後盾令她無後顧之憂，「其實出發去台灣學藝時，我第一個小朋友都係一歲左右，但我好想趁後生學自己想學嘅嘢，老公同屋企人都支持，令我好安樂咁出發。返到嚟要練習一定先搵最親嘅人，初初唔熟手試過𠝹到老公成條眉都係血，雖然有紓緩膏，但我諗應該都有啲痛，佢仍然笑笑口話無事，叫我繼續練。」得到一班神隊友的支持，讓Hebe更快上手。

好多謝屋企人嘅支持，全靠佢哋我先可以安心又決心咁去學飄眉。

讀書要不斷溫習課本，任何技能其實也需要不斷溫習，在於非單單課本上知識，還有練習過程中的經歷，「嗰時日練夜練，練到咁上下就決定租一間細房仔，開始接job，當時都係做朋友介紹嘅客為主。」從事美容行業最靠口碑，尤其是飄眉，誰想掛著一道難看粗毛上街，細心、可靠的飄眉技術，口耳相傳，自然客人紛至沓來。這樣就由當初一間「房仔」，發長到兩間房，「一年之後多咗好多客，有時客人遲到難以叫人等候，就決定多租一間房，可以等客人安心等，我又可以安心做。」美容王國最強的宣傳方法，是「人」，客人滿意再介紹朋友，口碑才是最好的宣傳口號。

飄眉、霧眉、素顏眉有何分別？入行要先問自己這問題！

從飄眉至素顏眉，化妝、髮型會隨時代變，美眉潮流一直也在變，8年前於台灣學的飄眉未必再大派用場，但基礎技巧仍是根深柢固。這些年Hebe一直在學習，韓國、泰國、俄羅斯也曾造訪，各門各派各施各法，「飄眉其實都好講唔同『師傳』嘅手法同藝術感，大家最初學嘅技巧一樣，但往後發揮就各有風格。」說到底，飄眉師的技巧與藝術感真的同樣重要。

老派的硬板的紋眉和繡眉已不合時宜，近幾年新興半永久眉：飄眉、霧眉及素顏眉，著重自然度，用色較繡眉輕柔，「飄眉其實就係模仿真眉毛，顏色會比霧眉、素顏眉實色，同埋會做到根根分明，好似一條條眉毛嘅效果；近年就多人鍾意霧眉同素顏眉，色調較為自然同soft，霧眉可以做到畫眉嘅朦朦朧朧柔霧效果，唔止飄眉咁似原生眉毛；素顏眉就再自然一啲，好似用眉筆輕畫一樣，效果更加透薄自然。」潮流天天在變，要成為業界翹楚，也要與時並進。

欣宜御用飄眉師飄眉準陳太連詩雅亦放心眉毛交給Hebe主理。 — 準陳太連詩雅亦放心眉毛交給Hebe主理。（圖片來源：[email protected]）

欣宜御用飄眉師 Hebe 8年來的努力有目共睹，更成為不少飄眉大賽的評審！ — Hebe 8年來的努力有目共睹，更成為不少飄眉大賽的評審！（圖片來源：受訪者提供）

技巧重要．服務態度更為緊要！

Hebe曾飄上萬條眉，遇過難應付客人嗎？「每個人對美感嘅睇法都唔一樣，但我都會堅守自覺嘅美感，試過有客人眉毛都甩得七七八八，飄眉過了一段時間，當自生眉毛重新生番出嚟，佢竟然話點解我整到佢個眉型咁，點解眉毛咁深色？有啲客人就係以為，飄眉、霧眉過後就一勞永逸，但就唔記雜毛仍會不斷生長！」亦有些客人要求一些古怪眉型，Hebe為免過後雙方爭拗，還是早早拒絕。「大家對靚嘅觀眾唔同好難夾，唔想之後再要洗眉補救，都係婉轉拒絕。」觀點與角度不同，還是各自安好好了。

明星客人紛紛而至，明星們會較一般客人「難搞」嗎？「反倒明星真係唔難搞喎，因為佢哋對靚都好有自己一套，而且大家對美嘅觀感都好一致，所以做咗第一轉眉型設計後，就好易夾到。」這也難怪，欣宜、小儀、連詩雅、林欣彤、「大小姐」林淑敏……多年來都安心將眉毛交給Hebe。

欣宜御用飄眉師飄眉欣宜的眉毛多年都交予Hebe主理，更常於社交平台公開分享，足證信心十足。 — 欣宜的眉毛多年都交予Hebe主理，更常於社交平台公開分享，足證信心十足，絕對可稱為「欣宜御用飄眉師」。（圖片來源：[email protected]）

欣宜御用飄眉師飄眉小儀都是忠實粉絲！ — 小儀都是忠實粉絲！（圖片來源：[email protected]）

「疫情係難捱，但點都要捱落去」

從昔日一間「房仔」，到今日擴展至5間店鋪，更發展其他美容服務，Hebe憑一雙巧手實現兒時的美容夢。惟創業容易守業難，疫情令美容業生意近乎零，這兩年面對如此逆境，執笠的執笠，裁員的裁員，擁有5間分店的Hebe，如何走過美容業的低潮時期，「這兩年真係好難過，但我同我班團隊都無停落嚟，無得開工就好好利用呢段時間去進修一下，我哋都成日安排training畀同事，改進一下飄眉同其他美容facial技巧，始終飄眉好講練習，一停落嚟手藝就會生疏。我依家仍然堅持每朝練習一陣，先至開始工作幫客人整眉，練習真係呢行最緊要，客人交條眉畀你，整得肉酸真係好難受，Gel甲都可以拆，眉毛無得拆！」

欣宜御用飄眉師飄眉 Hebe仍堅持每天早上練習，不讓手藝生疏。 — Hebe仍堅持每天早上練習，不讓手藝生疏。（圖片來源：受訪者提供）

擁有兩個可愛小朋友的Hebe，不埋怨疫情帶來的低潮期，反倒感恩有這段難得的「假期」，「呢8年嚟我一直『衝』，事業上面我從來唔會鬆懈，有job就接，唔會理係咪假期，星期日、大時大節都會照開工做嘢。太投入工作亦令我忽略咗同小朋友嘅相處，呢兩年我學識放鬆，唔再迫自己每日都『衝』，多咗時間陪小朋友，一家人感情關係更加好。」

後生一輩想入行應該怎麼做？Hebe寄語想入行的女生：「呢行都好講化妝底，識畫眉好緊要，而最重要係練習、練習、不斷嘅練習。」所以說，想要成功，還是靠苦幹來得實在。