黃翠如蕭正楠5大甜蜜時刻！結婚1周年公開峇里島補辦婚禮多張靚相

撰文：Cyan、東方新地｜部分原文刊於《東方新地》｜圖片來源：東方新地、Instagram、微博｜編輯：Cyan

黃翠如蕭正楠5大甜蜜時刻

1.公開婚禮相 互相甜蜜示愛

黃翠如和蕭正楠二人結婚一周年，在社交網站公開了多張二人早前在峇里島補辦婚禮時的多張靚相，蕭正楠更向翠如發表愛的宣言，約定下輩子也要在一起，真的是「睇見都冧」！

原文：

「我喜歡愛着你笑。
請你一直快樂地笑下去和我走這一輩子。
如果你不嫌棄…
下輩子我們再約定…
拍一下對方額頭就會記得對方。」

而翠如也回應蕭正楠「就這樣，你跟著我，我跟著你。」好一個「夫唱婦隨」。

原文：

「你是一個沒有太多想法的人，

就是喜歡傻傻笑地跟著我走，
我說我喜歡簡單的美，
淡淡的艷，
你也跟著說你喜歡，
好吧，
就這樣，
你跟著我，
我跟著你。」

2.讚老公浪漫 貼心吹頭

早前翠如接受《東方新地》專訪時談到認為夫妻二人誰較浪漫的時候，她表示：「佢浪漫好多，因為我係好褦襶嘅人，好多細位，例如佢會幫我吹頭。」找到一個愛錫你、細心至為你吹頭的人，真的幸福。

3.黃翠如公開家訓 蕭正楠超sweet回應

這對夫妻常常在社交網站打情罵俏，早前3月23日蕭正楠生日，黃翠如就在凌晨12時發帖文祝老公生日快樂，更用「你大爺上」作下款。看來平日蕭正楠一定非常寵愛翠如BB了！

黃翠如發帖文寫道：

「致我大爺，
在你生日的好日子，我仍然停留在煮早餐的程度。
在你生日的前一日，我仍然要你排隊幫我買珍珠奶茶。
在你生日的後一日，我還需要你早上五點車我返工。
我為你感到幸福，因為聽說施比受更為有福。
我還聽說，以後你的生日，也變成你太太的生日。
所以每年3月23日，請好好為我慶祝。
生日快樂😎
你大爺上」

兩位互稱對方大爺，如此有趣的一對，相處一定很Sweet，快樂呢！蕭正楠也回應翠如：「只要是你煮..餐餐食早餐也是幸福，和一班中小學同學仔一齊排隊買珍珠奶茶可以讓我變年輕，早上五時的空氣最好..遊車河一流！我生日你快樂」

4.黃翠如公開示愛：「拍劇拍到搵到條佬」

在上年的《萬千星輝賀台慶》台慶短劇中，參照當時大熱的劇集《是咁的，法官閣下》輪流召喚不同劇集的主角出來「問話」，當叫到黃翠如、洪永城的時候，被問到在TVB工作有多好？黃翠如就非常自豪地說：「好簡單㗎啫，拍劇拍到搵到條佬」，全場聽到嘩嘩聲！公開示愛不一定要男生做主動，女生公開示愛都好sweet呀！

5.公佈結婚 印下「世紀之吻」

蕭正楠與曹永廉上年憑《兄弟大茶飯》奪「最受歡迎電視拍檔」，由黃翠如、洪永城頒獎。蕭正楠講得獎感受時，正式公開黃翠如為太太，令全場藝員同事超驚喜！蕭正楠多謝太太令他成為一個懂得照顧人的男人，全場起哄要他們「錫錫」，二人有求必應，來了一個世紀之吻，閃到眼都盲！

早前《東方新地》專訪找來黃翠如大談誤打誤撞入行，由細台主持到入大台拍劇的種種經過。新婚的她又分享跟丈夫蕭正楠的結婚過程及的相處，還談及了生B計劃，一起來看看吧！

黃翠如過檔TVB原來同一個人有關

對於是否誤打誤撞去了有線電視，黃翠如說：「我畢業嗰年沙士，搵唔到工，我驚無收入，嗰時有線電視請 人，我仲記得我一入行得三千蚊，03年得三千蚊，好得人驚。」

「開頭我係娛樂記者，我嘅轉捩點係我上咗喜馬拉雅山探電影《喜馬拉亞星》班，我無做過啲咩返嚟，但公司覺得我拍咗旅遊節目返嚟，跟住調咗我去做旅遊節目，發現我做旅遊節目比新聞好，直到洪永城過咗 Now TV 一年，我見佢做《一個地球》嘅budget好似好大，我咪跟住過Now TV！」

再過檔TVB，翠如覺得感恩自己發展：「我好記得我一入TVB，個記者問:『 你憑咩覺得自己有資格可以入 TVB，可以有一個位置?』我答『 呢個係一個入場券，佢隨時可以攞走。正如我前半生做好多旅遊節目，每個地方兜完個圈我會走，無一個地方係永遠留低。對於我嚟講 TVB又係一個新嘅國度，但唔係全世界，對我嚟講係一個探索嘅地方。』」

對於「 每個人心目中都有個黃翠如 」這句，翠如笑言：「我到依家都想知係咩人寫，文筆咁好。洪永城嘅文筆係好差㗎!」

與洪永城關係:太舒服

至於問到翠如是否同意男生和女生，可以是純朋友的關係，翠如即答：「好明顯係啦，我同洪永城之間！我哋兩個之間實在太舒服嘞，所以任何人講任何嘢都好難影響到。佢平時唔會點打畀我，但由佢知我同佢女朋友一 齊出 event，佢不停咁煩我，叫我好好睇住佢女朋友，我對於佢嚟講，係理所當然要幫佢做任何嘢嘅態度。調番轉，我對佢亦係互相無畀面嗰種舒服。」

秘婚過程

問到為何選擇秘婚，翠如直言：「其實無專登選擇任何嘢，都係一個唔係好有計劃嘅計劃。佢同我求咗婚，我哋去旅行，去嘅時候諗唔知會唔會註冊到，去到攞表格、上網搵律師，等咗幾日，我哋繼續去玩，律師提我哋需要戒指，四圍去搵但無我 size，因為對於西方人我手指太 幼，改又改唔切，最後喺市集買用餐具整成嘅戒指，證婚人都係律師嘅鄰居。」

翠如續說：「求婚嘅時候，佢已經送咗隻戒指畀我㗎嘞，但我唔知依家擺咗喺邊。」至於老公和她哪個較浪漫，翠如就話：「佢浪漫好多，因為我係好褦襶嘅人，好多細位，例如佢會幫我吹頭。」

生B計劃

至於生小朋友，翠如就表示自己無計劃：「計劃從來都係佢做，佢比我諗嘢多啲。佢媽咪同我爸爸媽咪一樣，都係好放任。我屋企無計啦，我屋企五個女唔值錢嘅，少咗個都唔覺，做咩都得啦!佢媽咪好錫佢，亦都好錫我，任我哋點都得嘅!」，不過相信大家都好希望快點聽到他們的好消息！