愛的謊言

舊同學C跟男友拍拖7年，本打算年尾結婚，怎料上個月C發現了第三者，男友哭着哀求C原諒，又解釋只是一時貪玩，發誓永不再犯….，當時C被突如其來的真相嚇得手足無措亂作一團，畢竟多年感情，便姑且原諒了男友，但過後卻愈想愈氣、愈想愈傷心，更想過分手取消婚約。
上星期我們飯聚，C仍忿忿不平地重覆：「佢同個女仔一齊一年，即係佢呢年幾以來一直講大話呃我，我仲點可以同佢一齊呀！」常說寧教人打仔莫教人分妻，我們幾個都不敢作聲。
突然V問道：「咁你男友係咪真係甩咗果個女人？」
C想了想答道：「係啩，雖然我唔敢100%肯定，不過佢而家除咗返工，所有時間都係陪住我，就算有應酬都會自動打嚟報到，對我都好好，無論我點發脾氣點樣無理取鬧，佢都會氹我就我。」

V接著說：「咁你仲想點呀？」
C瞪大眼睛理正氣壯地說：「佢呃我呃咗咁耐喎！」
V慢條斯理說：「佢呃你，都係代表佢唔想失去你，佢花咁多心思呃你，係因為驚比你知道咗你會走。」
説到這裡我忍不住插嘴：「唔想失去就唔應該有第三者啦，在乎你就唔應該一拖二。」
V答道：「係，無可否認你男友對你嘅愛係唔夠，先有機會俾人乘虛而入，但係佢可以瞞你咁耐，又無被人撞過，即係代表佢好清楚自己只係逢場作興，先會識得避忌，如果真係唔愛，佢真係連呃都費時！」
我不太明白問道：「掉返轉頭諗，都可以係太愛第三者，為咗可以同佢一齊，所以盡佢所能呃你！」説完，自己都覺得有點砌詞。

V邊笑邊説：「如果真係咁愛，就一早飛你啦，仲要講大話咁煩！何況當你好愛一個人嘅時候，你會想拖住佢周圍去，而唔係淨係拖上床；你會想介紹佢比你所有朋友識，而唔會冇一個朋友知啦。」
C仍有點不忿：「但係佢同個女人一齊成年，為咗個女人呃我咁耐，咁都叫愛我咩？」
V説：「係人都會犯錯，分別在錯喺邊，而男人普遍都錯在不忠，佢有第三者係佢唔啱，你接受唔到可以選擇分手，若果對佢仲有愛，想重新開始，就要學識放低。佢雖然話呃咗你成年，但至少係呢年裏面，你係咩都唔知嘅情況下，係咪過得開心幸福先，一年後先知，即係將痛苦延遲一年，算賺咗啦，係有啲阿Q，但係你諗下第三者咩都知，你認為佢開心咩，佢嘅快樂係以為男人為咗佢而呃你，佢永遠都唔明白其實男人愛你先要呃你，咩都唔介意你知，係因為佢就算失去你都無咩所謂。」

當我們還在咀嚼箇中道理，V繼續説：「最重要係喺最後關頭，佢揀嘅係你，你哋又未結婚又未有小朋友，佢都有咁嘅決定，都好肯定佢愛嘅係你，可能真係一時貪玩啦。」
聽完V的一番話，C好像想通了，心情也較放鬆。

事後我私底下跟V再談過，她説：「睇得出C好愛男友，好想原諒，但係有時就係啖氣落唔到，如果一時意氣下分手，第時後悔就太遲。我以前就係太激動太唔忿氣，所以點都唔肯原諒，之後睇番其實只係為咗啖氣，覺得佢不忠就應受懲罰，而事實上唔止懲罰佢，都一樣懲罰我自己。」
V坦言這段情曾令她迷失，當時她以為被騙是最痛苦，於是刻意搭上一個有婦之夫，寧願當一個完全知情的第三者，可是試過後才知道原來一個男人肯呃你才代表在乎，連呃都不會才最可憐。

估不到同一件事，可以有完全兩樣的詮釋，一直以為欺騙和謊言無可原諒，但原來只要從另一面想，看到的竟然是如此不一樣，我又上了一課！