婚禮 七不思議事件

Text| Avis

又到結婚季節，亦係不停收到紅色炸彈嘅時候！參加 婚禮 咁開心，場面甜蜜溫馨更能感染在坐嘉賓，但係如果遇到以下呢七件不可思議嘅事件，大家除咗O咀之外，仲可以俾咩反應呢？

1. 「窩心」回禮
出席得婚禮都係戥一對新人高興，回禮呢啲都係錦上添花，小小心意感受到兩位嘅甜蜜都好開心！每人一份A4 size精裝本新人結婚相薄？好大手筆，但有幾多賓客攞返屋企仲會細細閱讀再會心微笑呢？家中放置別人結婚相會唔會太怪異？所以都係唔駛咁厚禮喇，送大白兔糖都夠㗎喇，多謝晒～

2. 婚宴變公司春茗
例子：男女家父親各自邀請公司同事出席子女婚宴，席間新外父同新老爺分別上台演講，多謝公司仝人多年支持，仲有幸請到某某主席、公司德高望重董事出席，阿仔阿女都係佢哋由細睇到大，但阿仔阿女連眼前呢位uncle係邊個都未知……新人頓時由主角變成大配角，完美體現「婚禮唔係兩個人嘅事」。

3. 長命 Speech
新郎新娘上台講致謝辭，多謝父母親人，多謝為婚禮出過力幫過手嘅人，多謝另一半，三數分鐘就夠了。曾有新娘由幼稚園同學、外國親戚、公司同事，一直講到同丈夫相識經過、即將為人妻心路歷程、籌備婚禮細節如數家珍講足15分鐘，大家嚟參加婚禮，唔係想做人物專訪呀，俾啲空間大家，不如盡快完咗個speech切蛋糕吖～

4. 甩轆才藝表演
好多新人喜歡把握呢個大日子，作才藝表演獻俾另一半。表演得好令晚宴加分，但事實上大多數演出者會因為太緊張而導致甩碌失水準，其實如果未練好就唔好勉強啦，少一個環節大家唔覺嘅，樂器彈錯晒唱到走晒音，賓客比台上面嗰個更尷尬呀！

5. 自High婚禮司儀
MC仲開心過新人，搞氣氛固然重要，但係可唔可以唔好三句唔埋兩句就尖叫woohoo，同埋可唔可以唔好中途打斷一對新人致辭呀，好冇禮貌囉！

6. 新娘子「一生人一次豁出去」超誇造型
黃色珠片七層蛋糕裙、孔雀石綠眼影、閃粉頭……都冇話唔得嘅，如果你想賓客嚟到唔認得你嘅話，再誇啲都得㗎！

7. 飲醉酒
新郎未開席就被親友灌醉，結果march-in 致辭祝酒全部取消，仲要新娘尷尬上台交代……呢啲情況好少發生，但賓客醉酒喧嘩甚至鬧事，大家一定有遇過。去飲係去戥人開心，適可而止就好，要盡興等after party先啦，飲大兩杯斷晒片，醒返先知失儀再道歉補鑊就冇意思啦！

大家又覺得婚禮上最不可思議嘅係咩呢？

延伸閱讀：

▲ANGELABABY 婚禮妝容的秘密http://goo.gl/BmE7K7

如欲率先接收資訊，請讚好我們的FB專頁並於「已讚好」選單設定「搶先看」，多謝支持。
More Facebook:https://www.facebook.com/morehk.hk