秋夏交界啱飲！補而不燥 雙參海竹頭無花果湯
話說早前參加活動時收到一樽花旗參，原來打算留嚟冬天時煲湯用，點知喺網上見到原來花旗參仲啱夏天飲，所以就即刻買齊材料，跟住試下煲呢個雙參海竹頭無花果湯！
Text, Photos: 小小豬KINSEY | Source: Sundaykiss
雙參海竹頭無花果湯
其實呢一樽仔花旗參我都收咗好耐，一直都覺得呢啲參類係補嘅食材，係要冬天先啱用嚟煲湯，但原來花旗參就係除外，因為佢嘅功效就可以滋陰補氣、寧神益智及清熱生津，而且仲係補而不燥，所以都好啱一家大細飲用呀。
我喺網上見到呢個食譜，將花旗參、沙參、海竹頭、枸杞子加埋一齊煲，可以養陰清熱，潤肺化痰，生津止渴同埋增強免疫力。小小豬都就嚟開學，加上又開始轉天氣，係呢個情況下增強 免疫力 係好重要，所以就跟住煲嚟飲下啦！
材料包括花旗參、沙參、海竹頭、枸杞子各1兩(一兩相等於37.5g)，無花果5粒，及瘦肉約$40。
瘦肉洗淨汆水；其他材料就浸洗備用。
煲內放約3L水，待滾起時，加入所有材料。
然後用大火加蓋煲約15分鐘。
再轉慢火加蓋煲多1.5小時。
加入鹽調味後就可以飲得啦！
其實初頭都好擔心嗰一種花旗參味小小豬係會唔鍾意，唔肯飲個湯(咁就浪費咗我一番心血)。好在呢隻豬仔都算乖乖，唔算太抗拒呢個花旗參味，都肯半合作地飲咗一大碗湯啦！
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
BY 小小豬的成長日誌
