「受夠了！我要加人工」 7招教你年尾加人工

Text、 Source：新Monday | Photos：Instagram、WhatsCap、Youtube截圖

年尾博加人工7個有效方法

要老闆出錢真的很難！要老闆伸手去銀包拿錢出來的三秒動作，對於一眾老闆而言難過奧運舉重，當他真的拿錢出來時，那怕只是一點點，他都已經覺得好像贏了奧運獎牌般值得歌頌自己！不過所謂關關難過關關過，香港人最叻就是創造奇蹟，等小編教你7招如何創造要老闆加人工這個奇蹟中的奇蹟吧！

1. 不時畀說話你老闆聽

有時與老闆食飯閒聊或辦公室內講開買乜乜的時候，可以不時輕輕帶句「啲嘢好貴呀」、「生活艱難」、「份糧唔夠用呀」，老闆即時如何回應並不重要，這主要是希望給你波士一點Hints知道你想加人工。雖然大部分波士都可能九成九即刻側側膊扮聽唔到，但若然老闆是通情達理的話，在你經常話自己無錢潛移默化下，或者可以博到加人工的一線生機！

2. 單刀直入！直接同波士講你想加人工

其實你都心知肚明你波士是一個怎樣的人，大概會知上述第1招在老闆身上的成效有幾大。所以若然你沒有耐性或者想更進取的話，與其旁敲側擊，不如你直接向老闆開聲。不過需要注意的是，開口前你最好要有自知之明，如果你一向返工又唔準時、做事沒交帶、工作成績又不是特別好的話，貿然出口加人工只會被老闆反咬一口批評你的工作表演，結果只會得不償失。

3. 隨時update自己的Portfolio

不要以為Portfolio是見工才用得到，其實平時應定時update自己的Portfolio。將平時自己做得好、波士讚你的資料／Showcase 儲起來並整理好，適當時候就拿出來同老細review一下，作為你加人工的有力理據。展示你的重要性之餘並讓老闆知道「唯獨你是不可取替」的。這招不單止想加人工時適用，甚至要求升職、或者搵下份工時都適用，可以深深impress對方，留下好印象。

4. 用數據證明你UNDERPAID

這一點與上一點有些相似，老闆是一個看「數字」的生物，你空口說白話是沒有用的。到底市場上其他同類公司出甚麼條件給你同一個職位的打工仔呢？自己的薪金是否追得上個market？不妨做多點功課，定時上各大求職網頁了解一下行內的趨勢，摘錄一點數據資料，整理一下再展示畀你波士睇，以數字證明你是underpaid，需要加人工，否則遠走高飛！

5. 不要輕易「耳仔軟」

出得嚟行，最忌感情用事！要記住老闆的角度永遠是想節省成本，唔想加你人工！所以老闆永遠有一萬個理由唔加人工給你：市道差、生意差、上面唔開心、佢唔開心、等多排、畀啲耐性…… 總之就唔想加人工但又要留住你。所以同老闆對峙時切忌心軟耳仔軟，強調自己加人工的理據。怯，你就輸了。

6. 問清楚老闆加人工的要求

有些老闆好好耐性，同你耍太極耍足幾個鐘都企硬唔加人工。這個時候你再糾纏下去也沒有用，不如開宗明義問老闆到底要達到甚麼條件才會加人工畀你，即使不是立即加人工，起碼你也知道自己的目標要如何達成！不過記得企硬問清問楚，不要讓老闆又蒙混過去，否則下次都只會又有其他原因耍走你。而如果你老闆向你提出一些無理要求或你無法完成的要求的話，你就要諗清楚是否應該轉工了。

7. 加人工失敗 都要老闆一些承諾

加人工從來都是一場戰爭，贏的機率並不高，但若然戰敗都不緊要，所謂「跌落地都要拿番揸沙」，即使是放假又好、加津貼都好，總之加唔到人工都要拎返啲嘢走！或者要老闆承諾你加人工的日子等等。如果你可以無條件投降嘅話，便會讓老闆覺得你易恰。所以要為自己爭取一點bargaining power，不要輕易屈服，你要記住你是make a deal，唔係嚟plead佢嘅！