護士大爆辛酸史：「咪當我哋有求必應！」

資料來源-經濟一週

護士 辛酸1：食飯時間都無

重要有時唔止係問啲同病情有關嘅問題，有同事就試過有個家屬走嚟問佢啲私人問題，幾歲呀、邊度畢業呀、入咗行幾耐呀、甚至人工…… 原來想搵你同佢個仔相睇。同事避而不答結果被鬧「懶巴閉」。

其實我哋醫護人員雖然一日chur足咁多個鐘，但都係suppose有點點私人時間。特別係如果你見到我哋仆緊落canteen，唔該唔好再截停我哋！因為醫院canteen唔係開廿四架！

你截一截，我就要焗住去食杯麵或者咬三文治…… 點解之前見到救護員半夜去買外賣呀？唔係貪方便渣救護車呀，係因為我哋係人而人要充饑！如果唔係咪唔夠力救你哋呀！

護士辛酸2：硬食死貓

家屬們，請你哋唔好乜都話係醫療事故。

明明同事已經向你交代咗個病情唔樂觀，但你就即刻兇神惡煞咁問係咪醫療事故，話自己畀得起錢，點解唔開特敏福。

唔知幾時開始喺大部份嘅市民心目中，特敏福變咗神藥，頭暈又嗌特敏福，抽筋又嗌特敏福，就嚟連扭親都嗌特敏福……

其實之前都有同事喺網上公開為醫護澄清過，特敏福唔係咩靈丹妙藥，而且佢嘅副作用好大，未到最後一刻都唔會亂用，正如你都唔會因為便秘而入院切咗條腸啦係咪呀？

醫護面對病人家屬討論病情轉差時，唔係真係隨口up。

之前有位L醫生話我哋有時唔敢同家屬講病人病情轉差，係因為佢呢啲咁嘅高層根本唔知下面發生咩事！咩唔敢講根本係無可能，我哋日日見慣生死，從來堅持坦誠，邊有話咩唔敢講吖？

只係有時報危後，有啲生命力強嘅病人捱得過，明明就係一件天大嘅喜事，但偏偏有啲家屬唔會開心咗先，而係第一時間去鬧啲同事，話我哋嚇佢、亂咁講嘢、差啲害死佢。

唔該，我哋從來無否定奇蹟嘅存在，點解救返又要畀你鬧、救唔返又要畀你鬧+投訴？

護士辛酸3：祖宗十八代被問候

呢個世界人權泛濫，依家啲病人都好識講人權。明明手術前唔可以食嘢，就話你虐待佢要投訴。

用緊氧氣罩，話要拖住舊嘢落去行吓，阿生，你知唔知舊嘢唔係無線供電架？你點落lift呀？唔畀你去，仲話我哋禁錮佢又話要報警咁，仲鬧爆你祖宗十八代

其實醫護雖然向你提供緊醫療服務，但其實我哋唔係服務性行業！就算係，都唔代表可以畀你侮辱！我哋可以告返你，只係如果真係每一個醫護都要告嘅話，我驚排到十年後都未完相關案件！